شەڕڤانان ئاماری سێ ڕۆژی ڕابردووی شەڕەکانی دێرەزۆریان بڵاوکردەوە

شەڕڤانانی هێزەکانی سوریای دیموکراتی-قه‌سه‌ده‌ ئاماری شه‌ڕی سێ ڕۆژی ڕابردووی دوایین قۆناغی هه‌ڵمه‌تی گه‌رده‌لوولی جزیر-یان ئاشکرا کرد، که‌ دژی چه‌ته‌کانی داعش له‌ ده‌وروبه‌ری دێره‌زۆر به‌ڕێوه‌ده‌چێت، بە پێی ئامارەکە لە شەڕەکاندا شەڕڤانان سێ کیلۆمەتر پێشڕەویان کردوە و سەدان هاوڵاتی مەدەنیان ڕزگار کردووە.


هێزه‌کانی سووریای دیموکراتی -قه‌سه‌ده‌ ئەمڕۆ ڕاگه‌یه‌ندراوێکی بڵاوکرده‌وه‌ و ئه‌نجامی شه‌ڕی سێ ڕۆژی ڕابردووی ئاشکرا کرد، که‌ له‌ چوارچێوه‌ی هه‌ڵمه‌تی گه‌رده‌لوولی جزیر دژ به‌ چه‌ته‌کانی داعش به‌ڕێوه‌ده‌چێت.

لە ڕاگەیەندراوەکەدا هاتووە: له‌ شه‌ڕی نه‌هێشتنی تێرۆردا دژ به‌ ڕێکخراوی تێرۆریستی داعش، له‌ ده‌وروبه‌ری ڕۆژهه‌ڵاتی دێره‌زۆر تێرۆریستانی داعش به‌ پانزێر و چه‌کی دۆشکه‌ هێرشیان کرده‌ سه‌ر شه‌ڕڤانانی ئێمه‌، شه‌ڕڤانان وه‌ڵامی هێرشه‌که‌یان دایه‌وه‌ و شه‌ڕێکی سه‌خت ڕوویدا، له‌ ئه‌نجامدا پانزێرێک ته‌قێنرایه‌وه‌ و زۆر تێرۆریست کوژران، هه‌روه‌ها فڕۆکه‌کانی هاوپه‌یمانان له‌ بنکه‌کانی تێرۆریستانیان دا.

باس لەوەش کراوە: له‌ به‌ره‌یه‌کی دیکه‌، دوای شه‌ڕێکی سه‌خت له‌گه‌ڵ تێرۆریستان، شه‌ڕڤانانی ئێمه‌ زیاتر له‌ ٢٠ تێرۆریستیان کوشت، چه‌کێکی دۆشکه‌یان ته‌قانده‌وه‌ و ده‌ستیشیان به‌سه‌ر ئۆتۆمبێلێک و دۆشکه‌یه‌کدا گرت، شه‌ڕڤانان کیلۆمه‌ترێک پێشڕه‌وییان کرد و ١٨ خاڵیان دانان.

ئەوەش هاتووە: تێرۆریستان به‌ چه‌کی قورس، پانزێر و هاوه‌ن هه‌وڵیان دا هێرش بکه‌نه‌ سه‌ر خاڵه‌کانی هێزه‌کانمان، شه‌ڕڤانانی ئێمه‌ وه‌ڵامیان دانه‌وه‌ و له‌ ئه‌نجامدا ئه‌ندامانی گرووپه‌ هێرشکاره‌که‌ کوژران و چه‌ک و ئۆتۆمبێله‌کانیشیان ته‌قێنرانه‌وه‌، فڕۆکه‌کانی هاوپه‌یمانه‌تیی نێونه‌ته‌وه‌ییش بۆردومانی زۆر باره‌گه‌، ئۆتۆمبێل و ناوه‌ندی تێرۆریستانیان کرد.

شەڕڤانان دەڵێن: له‌ به‌ره‌ی هه‌جین شه‌ڕێکی سه‌خت له‌نێوان شه‌ڕڤانانی ئێمه‌ و تێرۆریستانی داعشدا ڕوویدا، تێرۆریستان پانزێر و هه‌موو جۆره‌ چه‌کێکیان به‌کارهێنا، له‌ ئه‌نجامی شه‌ڕدا که‌ چه‌ند کاتژمێرێک به‌رده‌وام بوو، هێڵه‌کانی پاراستنی تێرۆریستان شکێنران، زۆر تێرۆریست کوژران و شه‌ڕڤانان سێ کیلۆ مه‌تر پێشڕه‌وییان کرد و ٦١ خاڵیان دانان، لێره‌شدا فڕۆکه‌کانی هاوپه‌یمانان مۆڵگه‌یه‌کی تێرۆریستانیان کرده‌ ئامانجی هێرشه‌که‌یان و هێڵه‌کانی پشتیوانیی تێرۆریستانیان پچڕاند.

قەسەدە باسی لەوەش کردووە: هه‌روه‌ها شه‌ڕڤانانی ئێمه‌ وه‌ڵامی کاروانێکی تێرۆریستانیان دایه‌وه‌ که‌ له‌ ٤٠ ئۆتۆمبێلی پانزێر و چه‌کی دۆشکه‌له‌سه‌ر پێکهاتبوو، له‌ ئه‌نجامدا ١١ تێرۆریست کوژران و زۆر ئۆتۆمبێلیش ته‌قێنرانه‌وه‌، له‌ هه‌موو به‌ره‌کاندا ماوه‌ به‌ ماوه‌ شه‌ڕ ڕووده‌دات.

هەر لە ڕاگەیەندراوەکەدا هاتووە: له‌ هه‌مان کاتدا، شه‌ڕڤانانی ئێمه‌ ده‌رفه‌تی ڕزگارکردنی زیاتر له‌ هه‌زار سیڤیلیان ڕه‌خساند که‌ له‌نێویاندا ژن و منداڵ هه‌بوون سیڤیله‌کانیان ڕزگار کرد و گواستنیانه‌وه‌ بۆ ناوچه‌ ئارامه‌کان و پێداویستییه‌ سه‌ره‌کییه‌کانیان ده‌موده‌ست پێشکه‌ش کردن.

لە ئامارەکەدا ئەوەش خراوەتەڕوو:

- ژماره‌ی هێرشی فڕۆکه‌کانی هاوپه‌یمانێتی نێونه‌ته‌وه‌یی: ١١٥

- ژماره‌ی کوژراوانی تێرۆریستان: ٢٢٨

- زیانه‌کانی تێرۆریستان: ٣ بلدۆزه‌ر، ٧ دۆشکه‌، ٢ قاعیده‌ی هه‌وان، ٦ ئۆتۆمبێلی سه‌ربازی، ٧ ماتۆڕسکیل و چه‌کێکی ژه‌فڕۆکه‌ ته‌قێنرانه‌وه‌. هه‌روه‌ها ٣٥ باره‌گه‌ی پاراستن، ٢٣ باره‌گه‌ی حه‌وانه‌وه‌ی تێرۆریستان و ناوه‌ندێکی په‌یوه‌ندییه‌کان ته‌قێنرانه‌وه‌.

 

ک.ک