شەڕڤانان کوژرانی ١٥ چه‌ته‌ی داعش-یان ڕاگەیاند

قه‌سه‌ده‌ ڕایگه‌یاند، له‌ ماوه‌ی ٢٤ کاتژمێری ڕابردوودا گورزی تووندیان له‌ چه‌ته‌کانی داعش داوه‌ و ١٥ چه‌ته‌ کوژراون و ده‌ستیش به‌سه‌ر بڕێکی زۆر چه‌ک و ته‌قه‌مه‌نی و کەرەستەی سەربازیدا گیراوه‌.


شه‌ڕڤانانی هێزه‌کانی سوریای دیموکراتی-قه‌سه‌دە، به‌رده‌وامن له‌ دواهه‌مین قۆناغی هه‌ڵمه‌تی گه‌رده‌لوولی جزیر له‌ چوارچێوه‌ی "شه‌ڕی نه‌هێشتنی تێرۆر"دا له‌ سنووری دێره‌زۆر، ئێوارەی ئەمڕۆش ئاماری ٢٤ کاتژمێری ڕابردوویان بڵاوکردەوە.

قەسەدە ڕایگەیاندووە: شه‌ڕڤانانی ئێمه‌ له‌ شارۆچکه‌ی شەفیعە و ده‌وروبه‌ری هێرشیان کرده‌ سه‌ر بنکه‌کانی تێرۆریستان و شەڕێکی سەخت هاتەئاراوە، لە ئەنجامی ئەو شەڕەدا ژمارەیەکی زۆری تیرۆریستان کوژران، شه‌ڕڤانان توانیان یەک کیلۆمەتر پێشڕەویی بکەن و ١٧ خاڵی نوێیان دامه‌زراند و فڕۆکەکانی هێزە هاوپەیمانانەکانیش چەندین جار بنکەی چەتەکانی داعشیان بۆردومان کرد.

ڕاشیگەیاندووە: چەتەکانی داعش لە دژی سەنگەرەکانی شەڕڤانانی قەسەدە بەچەکی قورس و ئامێری (درۆن) هێرشیان ئەنجامدا، بەڵام شەڕڤانان هێرشەکەیان تێکشکاند و ژمارەیەکی زۆر چەتە کوژران.

هەر لە ڕاگەیەندراوەکەدا هاتووە: له‌ ئه‌نجامی خه‌باتی پاککردنه‌وه‌ی ناوچه ‌ڕزگارکراوه‌کاندا، بڕێکی زۆرچەک و تەقەمەنی کەوتە دەستی شەڕڤانان، تیمی ئه‌ندازه‌ی سه‌ربازی چه‌ندین مینیان پووچه‌ڵ کرده‌وه،‌ که‌ تێرۆریستان له‌ ناوچه‌که‌ جێگیریان کردبوون.

ئامارەکانی ٢٤ کاتژمێری ڕابردووش بەم شێوەیەن:

ژماره‌ی تیرۆریسته ‌کوژراوه‌کان: ١٥ تیرۆریست

ئه‌و چه‌ک و ته‌قه‌مه‌نییه‌ی، که‌ که‌وتووه‌ته‌ ده‌ستی شه‌ڕڤانان‌: ٤ چەکی ئێم ١٦، چەکی بی کەی سی، چەکی لاو، سندووقێک ته‌قه‌مه‌نیی دۆشکه‌ی ١٤،٥ملم.

زیانه‌کانی تیرۆریستان: ٢٠ بنکه‌ی تیرۆریستان، کارگه‌یه‌کی ئاماده‌کردنی ئۆتۆمبێلی بۆمبڕێژکراو، ٢ ئۆتۆمبێل، ٣ بنکه‌ی تۆپی هاوه‌ن، ٤ کارگه‌ی ته‌قه‌مه‌نی و بنکه‌یه‌کی فڕاندنی فڕۆکه‌ی سیخووڕی (درۆن) ڕووخێنران.

ژماره‌ی هێرشی فڕۆکه‌کانی هاوپه‌یمان: ٢٨ جار


ک.ک