عێراق: هەبوونی هێزی تورک لە باشیک قبوڵ ناکەین

ئیبراهیم جەعفەری، وەزیری دەرەوەی عێراق لە کۆبوونەەی گشتیی نەتەوە یەکگرتووەکاندا ڕایگەیاند: هەبوونی هێزی تورک لە باشیک قبوڵ ناکەین.


سوپای تورکیا هێزەکانی لە باشیک و دەوروبەری موسڵ هێشتووەتەوە  وململانێکانی نێوان حکومەتی عێراق و دەوڵەتی تورک بۆ دەرکردن یان مانەوەی ئەو هێزانە لە خاکی عێراقدا بەردەوامە، شەوی ڕابردوو، ئیبراهیم جەعفەری، وەزیری دەرەوەی عێراق جارێکی دیکە هەبوونی ئەو هێزانە لەناو خاکی عێراقی شەرمەزارکرد.

ئیبراهیم جەعفەری، لە کۆبوونەەی گشتیی نەتەوە یەکگرتووەکاندا وتی: هەبوونی هێزە تورکییەکان لە باکوری ڕۆژهەڵاتی موسڵ قبوڵ ناکەین، هێرشی سەر سەروەریمان بۆسەر خاکی عێراق و پێشێلکردنی سنوورەکانمان بەهیچ شێوەیەک قبوڵ ناکەین، داوا لە دەوڵەتی تورک دەکەین کۆتایی بێنێت بە پێشێلکردنی ئەو سنوورانە.

لە بەشێکی دیکە قسەکانیشیدا جەختی کردەوە، کە عێراق پێشێلکارییەکانی دەوڵەتی تورک قبوڵ ناکات، وەک عێراق هەوڵمان ئەوەیە کە پەیوەندی باشمان هەبێت لەگەڵ دراوسێکانمان، بەڵام لەگەڵ ئەوە هێرش و پێشێلکاریی سنوورەکانیشمان قبوڵ ناکەین.

پێستریش چەندین جار جەعفەری لە لێدوانەکانیدا هەبوونی ئەو هێزانەی ڕەتکردووەتەوە و داوای چوونەدەرەوەی ئەو هێزانەی کردووە، بەڵام هەتا ئێستا ئەو هێزانە لە شوێنی خۆیان ماونەتەوە.

ش.ف