قه‌سه‌ده‌: ٢٣ چه‌ته‌ی داعش‌ کوژران

قه‌سه‌ده ڕایگەیاند، له‌ ئه‌نجامی پێشڕه‌ویی شه‌ڕڤانان له‌ سنووری دێره‌زۆر ٢٤ چه‌ته‌ی دیکه‌ی داعش کوژران و ١٨ خاڵی کۆنترۆڵیشیان ڕووخێنراون.


ناوه‌ندی ڕاگه‌یاندنی هێزه‌کانی سووریای دیموکراتی -قه‌سه‌ده‌ ئێوارەی ئەمڕۆ ڕاگه‌یه‌نراوێکی بڵاوکرده‌وه‌ و ئاماری شه‌ڕی ٢٤ کاتژمێری ڕابردووی هه‌ڵمه‌تی گه‌رده‌لوولی جزیری ئاشکرا کرد.

لە ڕاگه‌یه‌نراوه‌که‌ی قه‌سه‌ده‌دا هاتووە: له‌گه‌ڵ تۆپبارانی فڕۆکه‌کانی هاوپه‌یمانه‌تیی نێوده‌وڵه‌تی، شه‌ڕڤانانی ئێمه‌ هێرشێکی به‌رفرا‌وانیان کرده‌ سه‌ر بنکه‌ و خاڵه‌کانی تێرۆریستان له‌ شارۆچکه‌ی شه‌فعه‌، له‌ ئه‌نجامدا شه‌ڕێکی سه‌خت ڕوویدا و هێزه‌کانی ئێمه‌ زۆر تێرۆریستیان کوشتن، هێزه‌کانمان ٢ کیلۆ مه‌تر پێشڕه‌وییان کرد و ٢٤ خاڵی نوێیان دامه‌زراند.

ئەوەش هاتووە: له‌ به‌ره‌یه‌کی دیکه‌دا، شه‌ڕێکی سه‌خت له‌نێوان شه‌ڕڤانانی ئێمه‌ و ئه‌ندامانی ڕێکخراوی تێرۆیستی داعش ڕوویدا. له‌ ئه‌نجامدا زۆر تێرۆریست بریندار بوون و هه‌ژمارێک چه‌ته‌ کوژران. شه‌ڕڤانانی ئێمه‌ش کیلۆمه‌ترێک و نیو پێشڕه‌وییان کرد و ٣٥ خاڵی نوێیان دامه‌زراند. له‌ لایه‌کی دیکه‌وه‌ تیمه‌کانی ئه‌ندازه‌ی سه‌ربازی سه‌ر به‌ هێزه‌کانی ئێمه‌ ده‌ستیان به‌ پووچه‌ڵکردنه‌وه‌ی مینی چه‌ته‌کان کرد.

ئەوەش خراوەتەڕوو: له‌ ده‌ڤه‌رێکی دیکه‌ش شه‌ڕ هاته‌ ئاراوه‌ و چه‌ندین کاتژمێر به‌رده‌وام بوو، له‌و شه‌ڕانه‌دا زۆر تێرۆریست کوژران و بریندار بوون، ئه‌وانی دیکه‌ش هه‌ڵاتن. هێزه‌کانمان ٢ کم پێشڕه‌وییان کرد و ١٤ خاڵی نوێیان به‌ده‌ستهێنان. هه‌روه‌ها فڕۆکه‌کانی هاوپه‌یمانه‌تیی نێوده‌وڵه‌تی به‌ هێرشی ئاسمانی خاڵه‌کانی چه‌ته‌کانیان به‌ مووشه‌ک کرده‌ ئامانج.

قەسەدە دەڵێت: له‌ به‌ره‌یه‌کی دیکه‌، ئه‌ندامانی ڕێکخراوی تێرۆریستیی داعش هێرشیان کرده‌ سه‌ر هێزه‌کانمان. تێرۆرستان له‌م هێرشه‌دا مووشه‌کی «espigino» و ئۆتۆمبێلی دۆشکه‌له‌سه‌ر و هه‌موو جۆره‌ چه‌کێکی قورس و سوکیان به‌کارهێنا. به‌ڵام شه‌ڕڤانانی ئێمه‌ وه‌ڵامی هێرشه‌کانیان دایه‌وه‌ و کوژران و برینداربوونی تێرۆریستانی لێکه‌وته‌وه‌. هه‌روه‌ها زۆر شه‌ڕڤانی ئێمه‌ به‌سوکی بریندار بوون و ڕه‌وانه‌ی نه‌خۆشخانه‌ کران.

باس لەوەش کراوە: شه‌ڕڤانانی ئێمه‌ دوای شه‌ڕ ده‌ستیان به‌ پڕۆسه‌ی گه‌ڕان و پشکنین کرد، زۆر مین له‌ لایه‌ن تیمه‌کانی هه‌ڵگرتنه‌وه‌ی مین پووچه‌ڵ کرانه‌وه‌. هه‌تا ساتی ئاماده‌کردنی ئه‌م ڕاپۆرته‌، شه‌ڕ له‌ هه‌موو به‌ره‌کان به‌رده‌وامه‌. له‌نێو ئه‌و شه‌ڕانه‌دا چه‌ند هه‌ڤاڵێکی ئێمه‌ شه‌هید بوون و چه‌ند هه‌ڤاڵێکی دیکه‌شمان بریندار بوون.

ئاماری قەسەدە بەم شێوەیەیە:

- ٢٣ تێرۆریست کوژران.

- ١٨ خاڵی تێرۆریستان وێران کران، کارگه‌یه‌کی مین، خاڵێکی مین، ئۆتۆمبێلێکی چه‌کی قورس و کۆگه‌یه‌کی سووته‌مه‌نی ته‌قێنرانه‌وه‌.

- فڕۆکه‌کانی هاوپه‌یمانان ٢٢ هێرشیان ئه‌نجام دان.

- ٢٤ شه‌ڕڤانی ئێمه‌ بریندار بوون.

- ٦ شه‌ڕڤانمان شه‌هید بوون.


ک.ک