كار بۆ سەندنەوەی متمانە لە چەند وەزیرێک دەكرێت

لە ئەنجومەنی نوێنەران واژۆ بۆ لەسەركارلادانی ژمارەیەك لە وەزیرەكانی كابینەكەی عەبدولمەهدی كۆدەكرێتەوە، ببەهۆی ڕابردووی سیاسیی و ناکۆکیی لە قبوڵکردنیان.


محەمەد خالدی، سەرۆكی فراكسیۆنی 'بەیارق ئەلخێر' لە ئەنجومەنی نوێنەرانی عێراق لە لێدوانێكی ڕۆژنامەنووسیدا ئاشكرایكردووە، کە ژمارەیەك لە ئەندامانی ئەنجومەنی نوێنەران دەستیانكردووە بە كۆكردنەوەی واژۆ بۆ لەسەركار لادانی ژمارەیەك لە وەزیرەكانی حكومەتەكەی عادل عەبدولمەهدی، لەگەڵ ئەوەی چەند ڕۆژێكە متمانەیان پێبەخشراوە.

بەوتەی سەرۆكی فراكسیۆنی بەیارق ئەلخێر، نەعیم ڕوبەیعی وەزیری پەیوەندییكردن و ئەحمەد عوبەیدی، وەزیری وەرزش و لاوان، لەنێوان ئەو وەزیرانەن كە كار بۆ لەسەركار لابردنیان دەكرێت.

لەبارەی هۆکارەکەشیەوە، باسی لەوە کردووە، کە ڕابردووی سیاسیی ئەو دوو وەزیرە هۆکارێکە و ناڕەزایی لە قبوڵکردنیان بە وەزیر هەیە.

پێشتریش ژمارەیەك لە پەرلەمانتاران و میدیاكانی عێراق بەڵگەی بەعسییبوونی ژمارەیەك لە وەزیرەكانی كابینەكەی عەبدولمەهدی بڵاوكردەوە، كە پێشتر لەلایەن دەستەی لێپرسینەوە و دادپەروەرییەوە وەكو ئەندامی باڵای حزبی بەعس ناسێنرابوون.

یەكێك لەو وەزیرانەش كە تۆمەتی بەعسییبوونی خراوتە پاڵ، بەنگین ڕێكانی، وەزیری ئاوەدانكردنەوە و نیشتەجێكردنە، كە سەر بە پارتی دیموكراتی كوردستان-عێراقە، ڕۆژنامەنووسان و چالاكوانانی دهۆك لەماوەی ڕابردوودا داوایان لە دەستەی لێپرسینەوە و دادپەروەری كردبوو كە متمانە لە بەنگین ڕێكانی بسەندرێتەوە، بەو پێیەی ئەندامێكی باڵای حزبی بەعس بووە و لەگەڵ عودەی كوڕی سەددام حسێن كاری بازرگانیی كردووە.

ش.ف