نەورۆزی قەندیل بە هەڵپەڕکێ و ئاهەنگگێڕان کۆتاییهات

بە ئاهەنگگێڕان و هەڵپەڕکێ، کۆتایی بە بەرنامەکانی ئاهەنگی پیرۆزکردنی نەورۆز لە بناری قەندیل هات، کە ماوەی شەش کاتژمێر بە بەرنامەی جیاواز درێژەی کێشا.​​​​​​​


کەمێک پێش ئێستا، ئاهەنگی نەورۆزی بناری قەندیل، لەگەڵ گۆرانیی هونەرمەند بەرهەمی شەمامیدا بە هەڵپەڕکێ و ئاهەنگگێڕان کۆتاییهات.

ئاهەنگەکە ماوەی شەش کاتژمێر بەردەوامیی هەبوو، تێیدا وێڕای پێشکەشکردنی وتار و پەیامی لایەنە سیاسییەکان و ڕێکخراوەکانی کۆمەڵگای مەدەنی، دەیان گۆرانی و بەرهەمی هونەریی پێشکەشکران.

لە درێژەی ئاهەنگی نەورۆزی بناری قەندیلدا، هەریەکە لە هونەرمەندان دیار دێرسیم، بەرهەم شەمامی، جاسمی ساز، ئیحسان زیرەک، کەریم سورچی، ڕۆتیندا یەتکینەر، شلێر سنەیی و ڕزگار ئیسماعیل گۆرانی و بەرهەمی هونەرییان پێشکەشکرد.

هەروەها گروپەکانی شەهید سەرحەد، میزۆپۆتامیا، ئاوازی چیا و گروپی هەڵپەڕکێی شەهید دەستینا گۆرانیی و بەرهەمی هونەریی خۆیان پێشکەشکرد.

لە ئاهەنگەکەدا، هونەرمەندی گۆرانیبێژی دیاری کوردستان، دیار دێرسیم، گۆرانییەکی نوێی پێشکەشی ڕاپەڕینی خەڵکی شیلادزێ کرد، هەروەها گروپی ئاوازی چیاش گۆرانییەکی نوێی گروپەکەیان بۆ یەکەمجار لە قەندیلەوە پێشکەشکرد.

بەشێک لە هونەرمەندان لەسەر ستەیجی بەڕێوەبردنی ئاهەنگەکەوە وێڕای پیرۆزبایی نەورۆز، ئاماژەیان بەوەش دەکرد، کە ئەم نەورۆزە نەورۆزی یەکگرتنی کورد و تێکشکاندنی فاشیزم و هەڵگرتنی گۆشەگیریی دەبێت لەسەر عەبدوڵا ئۆجالان، ڕێبەری پەکەکە.

س.ح