یه‌په‌گه‌ درۆنێکی سوپای تورکی خسته‌خواره‌وه

‌ یه‌په‌گه‌ ڕایگه‌یاند، شه‌ڕڤانه‌کانیان له‌ ڕۆژی یه‌که‌می ساڵی نوێدا درۆنێکی سیخووڕیی سوپای تورکیان له‌سه‌ر شارۆچکەی دێرک خستووه‌ته‌ خواره‌وه‌.


ناوه‌ندی ڕاگه‌یاندنی یه‌کینه‌کانی پاراستنی گه‌ل-یه‌په‌گه ئەمڕۆ ڕایگه‌یاند، ڕۆژی ١ی کانوونی دووه‌م فڕۆکه‌یه‌کی جۆری درۆن-یان له‌سه‌ر شارۆچکەی دێرک لە ڕۆژئاوای کوردستان خستووه‌ته‌ خواره‌وه‌، که‌ به ‌مه‌به‌ستی سیخووڕیی له‌ لایه‌ن سوپای تورکه‌وه‌ ڕه‌وانه‌ی ئاسمانی ناوچه‌که‌ کرابوو.

یه‌په‌گه‌ ڕاشیگه‌یاند: "له‌ یه‌که‌مین ڕۆژی ساڵی ٢٠١٩دا، فڕۆکه‌یه‌کی بێفڕۆکه‌وانی جۆری درۆن-ی سوپای تورکی داگیرکه‌ر، کاتێک له‌سه‌ر دێرک-ی هه‌رێمی جزیر به‌ ئامانجی سیخووڕی ده‌سووڕایه‌وه‌، له‌ لایه‌ن هێزه‌کانمانه‌وه‌ کرایه‌ ئامانج و خرایه‌خواره‌وه‌."

له‌ درێژه‌ی ڕاگه‌یه‌نراوه‌که‌ی یه‌په‌گه‌دا هاتووه‌: "ده‌وڵه‌تی تورکی داگیرکه‌ر که‌ له‌ به‌رانبه‌ر ڕۆژئاوای کوردستان و باکووری سووریا هێشتا هه‌وڵی داگیرکاریی ده‌دات، به‌رده‌وامه‌ له‌ پێشێلکردنی سنوور، هه‌موو جۆره‌ ئامێر و که‌لوپه‌لێکی ناقانوونی که‌ بکه‌ونه‌ سنووری هه‌رێمه‌کانی ژێر کۆنتڕۆڵی هێزه‌کانمان، له‌ چوارچێوه‌ی پاراستنی ڕه‌وادا بێ کاریگه‌ر ده‌کرێن، پێشێلکردنی سنووره‌کانی ئێمه‌ به‌ هه‌موو شێوه‌یه‌ک وه‌ڵامی ده‌درێته‌وه‌."

 

ک.ک