ئەنجومەنەكەتان بۆ خۆتان

ماوەیەکە باس له‌ ئاماده‌كردنی پرۆژه‌یاسایه‌ك ده‌كرێت بە ناوی (ئه‌نجومه‌نی باڵای میدیا)، کە پرۆژه‌ یاساكه‌ له‌لایه‌ن سه‌ندیكای ڕۆژنامه‌نووسانی كوردستانه‌وه‌ ئاماده‌كراوه‌، دیاری محەمەد، بەڕێوەبەری سەنتەری میترۆ لە شرۆڤەیەکدا ئاماژە بۆ ئەوەدەکات کە سەندیکا و هەندێکی دیکە دەیانەوێت ئەنجومەنی میدیا بكەنە بە دیلی یاسای ژمارە ٣٥ی ساڵی ٢٠٠٧، یاسای رۆژنامەگەریی، ڕەخنەی توندیش لە نەقیبی سەندیکای ڕۆژنامەنووسان دەگرێت. 


تەواوی شرۆڤەکە

سەندیكای ڕۆژنامەنوسانی كوردستان، زۆر شپرزە بوون، نەقیب و سكرتێری سەندیكای ڕۆژنامەنوسانی كوردستان، لەوە ناچێت لەناو بینایەك بن لەسەر شەقامی شەست مەتری پایتەخت، لێدوانەكانیان سەبارەت بە "پرۆژە یاسای ئەنجومەنی باڵای میدیا" پێچەوانەی یەكترن.

لە دیدارەكانی ڕۆژانی ڕابردوودا، نەقیبی سەندیكا پرۆژە یاساكە بە دەستكەوتی سەندیكا وەسفدەكات، بەڵام سكرتێری نەقابە بۆ NRT دەڵێت "هیچمان ڕانەگەیاندوە بەرپرس نیین لەو پرۆژانە".

ئەوەی سەرنجی دوا كۆبونەوەی فراوانی سەندیكای ڕۆژنامەنوسانی كوردستانی دابێت، كە لە ژێر ناوی (كۆنفرانسی ئامادەكاری بۆ كۆنگرەی چوارەم)، بڕیاریان وایە كە یەكێك لە تەوەرەكانی كۆنگرەی داهاتوویان " كاربكەن لەسەر رێكخستنی بواری میدیا لەكوردستان، لە رێگەی پرۆژە یاساكانی ئەنجومەنی باڵای میدیا و یاسای بینراو بیستراو"، تا ئێستا پرۆژە یاساكانیان بۆ ڕای گشتی بڵاونەكراوەتەوە.

 نەقیبی ڕۆژنامەنووسان، لە دیدارەكانیدا لەم چەند ڕۆژەدا كە تەرخانكراوە بۆ شكاندنی ڕۆژنامەنووسان و هێرشكردنە سەر ئەو ڕۆژنامەنووس و ڕێكخراوانەی پێیانوایە ئەم پرۆژەیە دەبێتە بەدیلی یاسای كاری ڕۆژنامەنووسی و لەدوا دیداریدا لەگەڵ ڕۆژنامەی ئەلیكترۆنی پەیسەر پرێس، دەڵێت : "هەن قازانجیان لەو بێسەروبەرەییەدایە و سوودیان لێ وەرگرتووە، لە حاڵەتی ڕێكخستنی میدیادا ئەو قازانج و سوودەیان نامێنێت، لەبەرئەوە دژایەتی پرۆژەكە دەكەن و نایانەوێت سەربگرێت" ئامادەیش نییە پرۆژەكەیان بخەنە بەردەم  ڕای گشتی و ڕۆژنامەنووسان. جەختدەكاتەوە "خەڵكانێك هەن بەناو ڕۆژنامەنووسن و خۆیان بە پیشەكەدا هەڵواسیوە، ناكرێت پرۆژەیەكی وا گرنگ بدرێتە دەست كەسانێك كە شارەزاییان لە ڕاگەیاندندا نییە."

ئەم هێرشانەی نەقیبی رۆژنامەنوسان، بەكەم تێڕوانینی بۆ ڕۆژنامەنووسان و ئەو رێكخراوانەی داكۆكی لە ژینگەیەكی لەبار بۆ ئازادی میدیا دەكەن، نەك خزمەت بە سەندیكا ناكات بەڵكو خزمەتیش بە كەشی گفتوگۆ لەسەر پرۆژە یاساكە ناكات، كە بڕیارە لە كۆنگرەی داهاتووی سەندیكا گفتوگۆیان لەبارەوە بكرێت.

ئێمە لە سەنتەری میترۆ كە داوامان كردووە ڕۆژنامەنوسان و دەزگاکانی میدیا پەلەنەكەن لە پشتیوانی ئەو پرۆژە یاسایە و بە دروشمی بریقەداری وەك ئەوەی "ئەنجومەن سەربەخۆ دەبێت"  نەكەونە داوی سەندیكا و ئەوانەی زەمانێكە لەسەنگەردان بۆ ئەوەی ئەنجومەنی میدیا بكەنە بە دیلی یاسای ژمارە ٣٥ی ساڵی ٢٠٠٧، یاسای رۆژنامەگەری.

هەرێمی كوردستان لە قۆناغی گواستنەوەدایە بەرەو دیموكراسی، دەسكەوتی تەشریعی باش هەن لەناو ئەم دیموكراسیەتە ناتەواوە، بەڵام خەبات و فشاری زۆری ترمان ماوە بۆ جێبەجێكردنی ئەو یاسایانە.

نە سەندیكاو نە پشتیوانانی "ئەنجومەنی میدیا" ناتوانن گرەنتی ئەوە بدەن كە لەناو ئەم هەموو  دەزگا "سەربەخۆ"یانەی هەرێم كە بە پشك پشكێنەی حزبەكان دامەزراوە، ئەنجومەنی میدیا خۆی دەربازبكات لە هەژمونی حزبەكان، هێلكەی دوو زەردێنەمان بۆ بەرهەم بهێنێ.

ک.س