"بۆ دیار غەریبی برا، مامۆستا، شۆڕشگێڕ و سەرکردە"

شیلان غەریب، خوشکی شەهید دیار غەریب ناسراو بە "هەڤاڵ هەڵمەت" وتارێکی دەربارەی شەهیدی برای نووسیوەو تێیدا بەڵێن دەدات، کە لەبەر ئەو هۆکارانەی لە وتارەکەدا باسی دەکات، درێژە بە خەباتەکەی شەهید هەڵمەت بدات.


دەقی وتارەکە:

ئەگەرچی گوزارەكردن و پێناسەكردنی هەموو شەهیدان زۆر ئاستەمە بەڵام باسكردن لەسەر هەڤاڵ و برای سەركردەم زۆر زەحمەترە. ئێمە وەك خانەوادەكەمان خاوەنی دوو شەهیدین كاك (دلێر و دیار) كاكە دلێر وەك گەنجێكی خۆبەخش لەراپەرینی ١٩٩١ خۆبەخشانە بەشداری لە ئازادكردنی كەركوكدا كردوو بەقارەمانێتی شەهید بوو. هەڤاڵ هەڵمەتیش هەرلەتەمەنی منداڵیەوە نیشانەی پێشەنگایەتی و رێبەرایەتی پێوە دیاربوو. منداڵێكی بەهەست و زیرەك بوو. خۆشەویسترین منداڵی خێزانەكەمان بوو. لەقوتابخانە و ماڵ  جێگەی سەرنجی هەموو كەسێك بوو لەبەرامبەر هەموو كەسێك خۆی بەرپرسیاردەبینی. هەڤاڵ (دیار)دووەمین منداڵ بوو لەدوای شەهید بوونی دلێری برام  كاك دیار برای گەورەمان بوو، بەس ئەو تەنها برا نەبوو بەڵكو هاورێمان بوو. هەمیشە هانی دەداین كە ببینە كەسایەتیەكی بەهێز. بەردەوام لەدژی زهنیەتی پیاو سالاری و كۆنەپارێزی تێكۆشانی دەكرد. نەك تەنها خۆی بەڵكو ڕێگەی نەدەدا هیچ كەسێك مامەڵەی جیاكاری لەنێوان كچان و كوڕاندا بكات. بەهەموو تەمەنی لەبیرمان نایەت دڵی یەكێكی شكاندبێت بەڵكووبە ئسلوبی نەرم ونیان و بە رێبازی دەوڵەمەند وخوڵقكارانەی باوەڕی بەكەسی بەرامبەری دەكرد. بەشێوازێكی زۆر سروشتیانە ناوەندی هیواو باوەڕی و خۆشەویستی ماڵەكەمان بوو. هەرلەتەمنێكی بچووكەوە لەگەڵ هەڵگرتنی ئەركی بەرپرسیاری و كاركردن و ڕەنجدان بۆ دابینكردنی بژێوی ژیان وەك مامۆستایەك زۆرترین وانەی  ژیانی پێشكەش بەخێزانەكەمان  دەكرد.

ئاشقی مێژووی گەلی کورد بوو  و لێی دەکۆڵیەوە

هەڤاڵ هەڵمەت لەتەمەنی لاوێتیدا دەستی بەكتێب خوێندنەوەكرد و بەدوای زانست و زانیاریەوە بوو لەهەموو بوارەكانی ژیاندا بەتایبەتی لەبواری مێژوودا وەك ئاشقێكی مێژووی گەلی كورد زۆربەووردی لێكۆڵینەوەی دەكرد. هەڤاڵ دیارلە گوندی سێوسێنان لە دایكبووە و گوندەكەمان خاوەنی ٦٨ شەهیدی كیمیابارانە و لە ئەنجامی تۆببارانیشدا چەندین شەهیدمان هەیە. دیسان شەهیدبووونی براگەورەكەم كاكە دلێر كاریگەری تەواوی لەسەر بنەماڵەكەمان هەبوو بە تایبەتی لەسەر كەسایەتی هەڤاڵ هەڵمەت. دەتوانم بڵێم خانەوادەكەمان لەهەموو ڕوویەكەوە خانەوادەیەكی نیشتیمان پەروەرو دڵسۆزبووە.

لەگەڵ ئاشنابوونی هەڤاڵ هەڵمەت بە پارتی كرێكارانی كوردستان و بەشداربوونی وەك شۆڕشگێڕێك بەردەوام هەوڵی دەدا ڕاستی ڕێبەر ئاپۆ و ڕاستی تێكۆشان بە ئێمە بناسێنێت بەهۆكاری بەهێزبوونی هێزی باوەڕپێهێنان و ئیقناع لەلای هەڤاڵ هەڵمەت كاریگەی تەواوی لەسەر خێزانەكەمان دانا. بەتایبەتی كاریگەری تەواوی لەسەركەسایەتی باوكم دروست كرد و لەماوەیەكی كورتدا باوكم وەك كەسایەتیەكی وڵاتپارێز خزمەتی بەتێكۆشان كردوو زۆرترین ئەركی خستە سەرشانی ماندوونەناسانە لەگەڵ هەڤاڵ هەڵمەت وەك دوو هاوڕێ لەخەباتدابوو هەتا دواهەناسەی ژیانی. هەڤاڵ هەڵمەت  لەسەر كەسایەتی ئێمە كاری دەكرد بۆئەوەی ئێمە وەك خوشكەكانی وەك ئەو ببینە شۆڕشگێڕ و شانبەشانی ئەو لەتێكۆشاندابین.هەربۆیە لە ڕێگەی پەروەردەكانیەوە زۆرترین كاریگەری لەسەر هەموو ئەندامانی خێزانەكەمان داناوە. تەواوی ئەو كەسانەی كە بۆ یەك ساتیش هەڤاڵ هەڵمەتیان ناسیبێت بە وتە بەنرخەكانی و بەهەڵسوكەوتی مرۆڤ دۆستانەی كاریگەردەبوون. لەگەڵ ئەوەی ئێمە بە دووری هەڤاڵ هەڵمەت لێمانەوە نیگەران بووین بەڵام بەردەوام وەك خانەوادە و خوشك وبراكانی پاڵپشتی بووین.

لە ڕۆحی نەتەوەیی و خەسڵەتی دیموکراتیدا نمونەیە

هەڤاڵ هەڵمەت ٢٥ ساڵی تەمەنی خۆی ماندوونەناسانە لەسەر پێ بوو خۆنەویست و پێداگر و فیداكارانە لەتێكۆشاندابوو. هەڤاڵ هەڵمەت لەگەڵ ئەوەی منداڵی خانەوادەی ئێمەیە، بەڵام زۆر لە ئێمە زیاتر كەسوكاری هەیە و بەهەموو واتایەك ڕۆڵەی هەموو گەلە. لەماوەی كارو خەباتیدا هێندە كەسایەتی خۆی پێگەیاند و خۆی بونیاتنا لەگەڵ تەواوی ئامانجە پیرۆزەكانی گەلدا ئاوێتەبوو. وەك پێشەنگێكی ڕاستەقینەی گەل تەواوی تایبەتمەندییەكانی كەسایەتی شۆڕشگێڕی لەكەسایەتی خۆیدا بەرجەستەكردبوو. كەسایەتییەكی بێ وێنەبوو لە بواری ڕۆشنبیرو ڕۆشنگەرییەوە بەردەوام بۆ هەموو كەسێك ڕوناكی بوو، وەك قوتابخانەیەك بوو بەهەزاران كەسی پێگەیاندووە. لە ڕۆحی نەتەوەیی و خەسڵەتی دیموکراتییەوە نمونەی سەركردایەتیەكی زانا و تادوا ڕإدە بەتوانابوو. لە بواری ژینگەپارێزیدا نمونەی كەسێكی كەبەردەوام رۆح و دڵ و مێشكی خۆی بەپاكی ڕاگرتبوو وەك تێكۆشەرێكی ژینگەپارێز لەبەرەنگاربوونەوەی سیستەمی سەرمایەداریدابوو. ئەو بەواتای وشە دیموكرات بوو، لە بواری ئازادی تاكدا هێندە خۆی پێشخستبوو، وەك خەمخۆرو هاوڕێی دڵسۆزی ژنان و تێكۆشانی ئازادی ژنان بوو. ئاشكرایە كەسایەتیەكی هێندە بەهێز دەبێـە گەورەترین كۆسپ لەبەردەم هەموو هێزە نۆكەرو گەندەڵ و کۆنەپەرستەکان. لەهەمانكاتدا كەسایەتی بەم جۆرە  دەبنە كۆی هەموو نرخەپیرۆزەكانی گەل و كۆمەڵگا. ڕاستیەكی حاشاهەڵنەگرە لەهەبوونی كەسایەتی سەركردەی وەك هەڤاڵ هەڵمەتدا مەرگی خۆیان دەبینن.هەربۆیە داگیركەران و سیخووڕان هەموو توانایەكی خۆیان خستەگەڕ بۆئەوەی هیوای هەموو گەل بشكێنن، بەڵام هەڤاڵ هەڵمەت بە ژیانی باوەڕیی و هیواو ژیان بوو. شەهیدبوونەكەشی دەبێـتە گڕكانی سەركەوتنی شۆڕش لەباشوری كوردستاندا.

هەست بە قەرزارباری دەکەم

بێگومان هەبوونی كەسێكی وەها لە ژیاندا قەڵایەكی گرنگی مرۆڤایەتییە، بە شەهیدبوونەكەشی ڕاستی هەموو لایەنە شاراوە پاكەكانی زیاتر ئاشكرابوو. من وەك خوشكێك هەست بە سەرفرازی و شانازی دەكەم كە خاوەنی برایەكی وەهام. هێز وەردەگرم لەو هەستەی كە من و كاك دیار بەدەستی یەك دایك گۆشكراوین. بەهێندەی ئەوانەش هەست بەقەرزارباری دەكەم كە وەك پێویست وەك خوشكی سەركردەیەك وەك دایك و باوكم نەمتوانی ئەركی خۆم بەرامبەر گەورەی ئەو پێك بهێنم .

پەیمان دەدەم بۆ سەرکەوتنی ڕێبازەکەی

لەكۆتایدا دەڵێم، هەڤاڵ هەڵمەت مێژوویەك پڕاوپڕلە تێكۆشان و خزمەت و مرۆڤ دۆستی و كوردایەتی  پاك ودروستی تۆماركرد. بەدەیان هەزاركەسیشی هۆشیاركردە و خستینیە سەر ڕێیەک کە بە ئازادی بژین، منیش وەك خوشك و قوتابییەكی بەوەفای هەڤاڵ دیار بۆ ئەوەی هەمیشە ڕۆحی شاد بێت پەیمان دەدەم بۆسەركەوتنی رێبازەكەی بەردەوام لە تێكۆشاندا دەبم. شەهیدان لە دڵ و مێشك و ویژدانی مرۆڤایەتیدا بەزیندووی دەمێننەوە.

س.ح