"هێماكانی خۆڕاگری و تێكۆشانی دیموكراتیانه‌ له‌ ڕۆژهه‌ڵاتی كوردستان هه‌میشه‌ گه‌شاوه‌یە"

ئامەد شاهۆ، ئەندامی مەجلیسی پارتی ژیانی ئازادی کوردستان- پژاک، لە شرۆڤەیەکدا تیشک دەخاتە سەر دۆخی ئەمڕۆی ئێران و ڕۆژهەڵاتی کوردستان و سیاسەتی ئەو وڵاتە، کە ئەمە دەقەکەیەتی:


رژێمی كۆماری ئیسلامی ئێران بەهۆی سیاسه‌تی نادیمۆكراتیانه ‌و قه‌یران و ئاڵۆزیه‌كانی ناوخۆیی و ده‌ره‌كی وه‌ك مریشكێكی سه‌ربڕاو له‌ناو په‌له‌قاژه‌دایه‌، به‌ بژارده‌ی سیاسه‌تی له‌سێداره‌دانی چالاكانی سیاسی، تیرۆری چالاكانی مه‌ده‌نی و ژینگه‌پارێزان و هێرش و په‌لامار بۆ سه‌ر گه‌ریلاكانی یه‌ره‌كه‌ و ده‌ستدرێژی بۆ سه‌روه‌ری خاكی هه‌رێم و به‌شه‌كانی دیکەی كوردستان، ناتوانێت قه‌یران و ئاڵۆزیه‌كانی ناوخۆیی په‌رده‌پۆش بكات و وه‌ك ڕابردوو مامه‌ڵه‌ له‌گه‌ڵ پرسی كورد و دیمۆكراسی دا بكات، چۆن گه‌لی كورد وه‌ک ئاكته‌رێكی سه‌ره‌كی له ‌سه‌قامگیری ئاشتی و به‌دیهێنانی دیمۆكراسی له ‌ناوچه‌كه‌دا خاوه‌ن رۆڵه‌ و به‌ هێزێكی تۆكمه‌ و رێكخستن كراو، دژ به‌ فاشیزم له‌ناو تێكۆشانێكی ڕه‌وا و دیمۆكراتیكدایه‌.

ئه‌گه‌ر ڕژێمی ئێران بیه‌وێت به‌ هێرش و كۆمه‌ڵكوژی سه‌ر كوردانی ئازادیخواز شكسته‌كانی له ‌ئێران، عێراق، سوریا، یه‌مه‌ن و لۆبنان داپۆشێت، جیا له ‌قووڵكردنه‌وه‌ی قه‌یرانی ناوخۆیی و لاوازی پێگه‌ی رژێم هیچ شتێكی لێ سه‌وز نابێت، رژێمی ئێران ئه‌گه‌ر بیه‌وێت له‌پێناو پاراستنی به‌رژه‌وه‌ندیه‌كانی له‌گه‌ڵ ده‌وڵه‌تانی داگیركه‌ری كوردستان بازرگانی له‌سه‌ر كوردان بكات، ئه‌وا ده‌كه‌وێته‌ ناو یارییه‌كه‌وه‌ كه‌ به‌ زیانی ده‌شكێته‌وه‌، هاوكات ئه‌گه‌ر رژێم به‌ سیاسه‌تی گرتن، تیرۆر و له‌سێداره‌دان و هێرش بیه‌وێت گوشار و گه‌مارۆ ده‌ره‌كیه‌كان و ناڕه‌زایه‌تی سه‌رشه‌قام بێ‌كاریگه‌ر و مایه‌پووچ بكات، ئه‌وا به‌ پێچه‌وانه‌وه‌ به‌نزین به‌ ئاگری ناڕه‌زایه‌تی كۆمه‌ڵگا و گه‌ل ده‌پاشێت و دۆخه‌كه‌ ئاڵۆزتر ده‌بێت، كوردانی ئازادیخواز ئه‌وه‌یان سه‌لماندووه‌ كه‌ كوردی ئازاد ئیدی نه‌ ئه‌و گه‌له‌یه‌ كه‌ له‌ به‌رامبه‌ر زۆڵم و زۆرداری سه‌ر داده‌نوێنێت و ناشبێته‌ سووته‌مه‌نی سیاسه‌تی هێزێكی بێگانه‌.

ڕژێمی ئێران به‌ تیرۆركردنی چالاكانی سیاسی، مه‌ده‌نی و ژینگه‌پارێزان ده‌یه‌وێت په‌یام به‌ كێ بدات؟ ئایا تیرۆر ده‌توانێت كۆتایی به‌ كێشه‌ی شوناس، ماف و دیمۆكراسی له ‌ئێران و رۆژهه‌ڵاتی كوردستان بێنێت؟ ئێران به‌ كاراكردنی مه‌كینه‌ی تیرۆر به‌ره‌و كوێ‌ ده‌ڕوات؟ ئایا تیرۆر ده‌توانێت كۆمه‌ڵگا، گه‌ل و نه‌ته‌وه‌یه‌ك له‌ مێژوو و ڕێبازی حه‌قیقه‌ت دوور بخات؟ ئه‌گه‌ر تیرۆر له‌ چوارچێوه‌ی نكۆڵیكردن له ‌هه‌بوونی حه‌قیقه‌تی گه‌ل و كۆمه‌ڵگایه‌ك كارا كرابێت، ئه‌وا گه‌ل و كۆمه‌ڵگا به‌ هه‌ڵوێستێكی ڕادیكاڵانه‌ پاراستن له‌بوونی خۆیان ده‌كه‌ن، تیرۆر بەهۆی ئه‌وه‌ی به‌ ئامانجی پارچه‌ كردنی گه‌ل و كۆمه‌ڵگا و سه‌پاندنی ده‌سه‌ڵاتی نادیمۆكراتیك ئه‌نجام ده‌درێت، ڕه‌وایه‌تی رژێم ده‌خاته‌ ژێر پرسیاره‌وه‌و له‌ئاستی نێوده‌وڵه‌تیش ئێران ده‌بێته‌ كانگای تیرۆر، گرتن و له‌سێداره‌دان.

له‌سێداره‌دانی چاڵاكانی سیاسی و مه‌ده‌نی وه‌ك (زانیار مورادی، لۆقمان مورادی و رامین حوسێن په‌ناهی) ئایا ده‌توانێت ئاگری شۆڕشی گه‌لانی ئێران و رۆژهه‌ڵاتی كوردستان داپڵۆسێنێت و ده‌نگ و ویژدانی ئازادی له‌سێداره‌ بدات؟ ئایا له‌سێداره‌دان ده‌توانێت ده‌نگی ئازادی و دیمۆكراسی و شه‌پۆلی تووڕه‌یی گه‌ل دابمركێنێت و كۆتایی به‌ رۆمانی شۆڕشی ئازادی له‌ كوردستان بێنێت؟ ئایا ده‌توانێت ویست و داخوازی ژیانی ئازاد له ‌هزر و دڵی گه‌نجانی شۆڕشگێڕ و نیشتمانپه‌روه‌ر ده‌ربێنێت؟ له‌سێداره‌دان ئایا ده‌توانێت كۆتایی به‌ گه‌مارۆ ئابووریه‌كان و بێكاری و هه‌ژاری سه‌ر ئێران بهێنێ و هه‌ژمۆنی رژێم به‌ سه‌ر ناوچه‌كه‌دا دروست بكات؟ ئه‌وه‌ی كه‌ ڕوونه‌ له‌سێداره‌دان له‌ مێژوو تا به‌ ئه‌مڕۆ نه‌یتوانیوه‌ ئاگری شۆڕشی ئازادی ناو دڵی ئازادیخوازان دابمركێنێ و كۆتایی به‌ رۆمانی شۆڕشی ئازادی له‌كوردستان بێنێت، بۆیه‌ ئه‌وه‌ی كه‌ پێویسته‌ له ‌مێژوو وانه‌ بگرێت، خودی كاربه‌ده‌ستانی كۆماری ئیسلامی ئێرانن، چ رژێمێك به‌ له‌سێداره‌دان و توندوتیژی ده‌سه‌ڵاتداری فاشیستانه‌ی سه‌ر كۆمه‌ڵگا چه‌سپاندبێت، ته‌نیا و ته‌نیا كۆتایی به‌ ته‌مه‌نی ده‌سه‌ڵاتداری خۆی هێناوه‌، به‌جێگای ئه‌وه‌ی رژێم له ‌ناسكترین دۆخدا رۆڵه‌كانی كورد ده‌باته‌ ژێر په‌تی سێداره‌، گۆنجاوترین رێگا ئه‌وه‌یه‌ كه‌ بیر له‌ چاره‌سه‌ری ئاشتیانه ‌و دیمۆكراتیانه‌ی كێشه‌ی كورد بكاته‌وه‌، چۆن هه‌ر له‌سێداره‌دانێك هه‌وێنی یه‌كگرتن، یه‌كڕیزی و خۆرێكخستن كردنی كۆمه‌ڵگایه‌ دژی فاشیزم و شه‌پۆڵی تێكۆشانی دیمۆكراتیك له ‌ئێران و ڕۆژهه‌ڵاتی كوردستان به‌رفراوانتر ده‌كات.

هێرش و په‌لاماری هێزه‌ چه‌كدار و به‌كرێگیراوه‌كانی كۆماری ئیسلامی ئێران بۆ سه‌ر گه‌ریلاكانی رۆژهه‌ڵاتی كوردستان و تۆپ باران و مووشه‌ك بارانی بنكه‌ و باره‌گاكانی حزبی دیمۆكرات، ئایا ده‌توانێت كۆتایی به‌ خه‌باتی ڕه‌وا و دیمۆكراتیكی گه‌لی كورد بهێنێت؟ رژێم چ سوودێك له‌و هێرشانه‌ وه‌رده‌گرێت و لێكه‌وته‌كانی بۆ رژێم چ ده‌بن؟ ئایا به‌ په‌ره‌پێدانی هێرش و توندوتیژی ئاشتی و ئارامی له ‌ناوخۆی وڵات سه‌قامگیر ده‌بێت؟ بێگۆمان رژێم هه‌رگیز ناتوانێت به‌ هێرش و په‌لامار كۆتایی به‌ تێكۆشانی دیمۆكراتیكی گه‌لێكی ئازادیخواز بهێنێت و به‌رده‌وام كردنی ئه‌و رێبازه‌ش ته‌نیا په‌لكێش كردنی شه‌ڕێكی بێ‌كۆتا ده‌بێت بۆ ناوخۆی وڵات كه‌ چاره‌نووسێكی نادیاری به‌دواوه‌ ده‌بێت، چۆنكه‌ تاكه‌ بژارده‌ی گه‌لی كورد له ‌پێناو گه‌یشتن به‌ ماف و ئازادی ته‌نیا به‌هێز كردنی خۆڕاگری و تێكۆشانی دیمۆكراتیكه‌، به‌ پێچه‌وانه‌وه‌ ئه‌مڕۆ كاربه‌ده‌ستانی رژێم له ‌ئێران، كوردستان و ناوچه‌كه‌ ده‌ستپێشخه‌ری هه‌ڵگیرساندنی شه‌ڕ ده‌كه‌ن و ناوچه‌كه‌ به‌ره‌و نائارمی و ناسه‌قامگیری ڕاده‌كێشن، ئه‌وه‌ش ده‌یسه‌لمێنێت كه‌ رژێم چ له‌ سیاسه‌تی ناوخۆ و ده‌ره‌وه‌ له‌ بواری سیاسی، دیپلۆماسی و ئابوری رووبه‌ڕووی قه‌یران و شكست بووه‌ته‌وه‌و بۆ په‌رده‌ پۆش كردنی شكسته‌كانی و نانه‌وه‌ی ئاژاوه‌گێڕی په‌نای بۆ هێرشی سه‌ربازی و كرده‌وه‌ی دڕندانه‌ بردووه‌، كه‌ به‌رده‌وامی ئه‌و سیاسه‌ته‌ بۆ رژێمی ئێران، گه‌وره‌ترین شكستی ئه‌م سه‌ده‌یە ده‌بێت.

گه‌لی كورد به‌ مانگرتنی سه‌رتاسه‌ری له‌ ڕۆژهه‌ڵاتی كوردستان په‌یامێكی ڕاشكاوانه‌ی به‌ رژێمی داگیركاری كۆماری ئیسلامی ئێران دا، هه‌ڵوێستی دیمۆكراتیك و یه‌كگرتووی گه‌لی كورد له ‌ڕۆژهه‌ڵاتی كوردستان جێگای رێز و ستایشه‌، ئه‌وه‌ش هه‌ڵویستێكی به‌رپرسیارانه‌ و شۆڕشگێڕانه‌ به‌رامبه‌ر فاشیزم بوو كه‌ مۆركی له‌ تێكۆشانی ڕه‌وای گه‌له‌كه‌مان-دا، مانگرتنی سه‌رتاسه‌ری چالاكییه‌كی سه‌ركه‌وتوو، بێوینه‌ و سه‌رده‌میانه‌ له‌ به‌رامبه‌ر سیاسه‌ته‌كانی كۆماری ئیسلامی ئێران بوو، كه‌ سه‌رجه‌م پیلانه‌كانی رژێمی مایه‌پووچ كرد، ئه‌وه‌ی رژێم ده‌بێت بزانێت كۆمه‌ڵگای كوردی به‌ یه‌كده‌نگی و یه‌ك هه‌ڵوێستی خاوه‌ندارێتی له ‌پێشه‌نگ و تێكۆشه‌رانی ئازادیخوازی خۆی كرد، بۆیه‌ ده‌بێت رژێم به‌ جێگای سه‌ركوت و كۆمه‌ڵكوژی لێگه‌ڕینی به‌ دوای چاره‌سه‌ری دیمۆكراتیكی داخوازی ڕه‌وای گه‌لی كورد بێت، رژێم ناتوانێت به‌ زۆره‌ملی ئیراده‌ی ئازادی گه‌لێك زه‌وت بكات، ده‌بێت رژێم ئه‌و مانگرتنە وه‌ك كارنامه‌ی كرده‌وه‌كانی خۆی له‌ به‌رامبه‌ر كوردان پێناسه‌ بكات و له‌و قۆناخه‌ به‌دواوه‌ وه‌ك گه‌لێكی ڕێكخستن كراو و شۆڕشگێڕ مامه‌ڵه‌ له‌گه‌ڵ كوردان-دا بكات كه‌ سه‌ره‌ڕای پیلانه‌ نه‌گریسانه‌كانی ڕژێم، هێماكانی خۆڕاگری و تێكۆشانی دیمۆكراتیانه‌ له‌سه‌ر ئه‌م خاك و نیشتمانه‌ هه‌میشه‌ گه‌شاوه‌یه‌ و یاری كردن به‌ ئیراده‌ی ئازادی ئه‌و گه‌له‌ كاردانه‌وه‌ی قورسی شه‌قامی كوردی به‌دواوه‌ ده‌بێت.

ئه‌وه‌ی گرنگه‌ له‌م قۆناخه‌ به‌دواوه‌ ده‌بێت هێز و لایه‌ن و پارته‌ سیاسی و رێكخراوه‌ مه‌ده‌نیه‌كان هه‌ڵوێستی یه‌كگرتوو و رۆحی پێكه‌وه‌ كاركردنی شه‌قامی كوردی بۆ خۆیان به‌ بنه‌ما بگرن، ئه‌و هێز و لایه‌نه‌ی كه‌ بڕوایان به‌ ئیراده‌ی ئازادی گه‌لی كورد هه‌یه‌، پێویسته‌ خاوه‌ن هه‌ڵوێست و به‌رپرسیارێتی مێژوویی هاوشێوه‌ی كۆمه‌ڵگاكه‌یان بن، یه‌كڕیزی، هاوئاهه‌نگی و یه‌كگرتن چۆن له‌ژێر په‌تی سێداره‌، تیرۆر و گرتن له‌ناو شه‌قامی كوردی شه‌كاوه‌یه‌، پێویسته‌ پارت و لایه‌نه‌ سیاسیه‌كان ئیلهام له‌و تێكۆشانه‌ هاوبه‌شه‌ی گه‌ل وه‌ربگرن، دۆخه‌كه‌ ئه‌وه‌ی به‌سه‌ر پارت و لایه‌نه‌كان فه‌رز كردووه‌ كه‌ هاوئاهه‌نگی و یه‌كێتی نێوان ڕیزه‌كانیان دروست بكه‌ن و به‌ سیاسه‌تی یه‌كگرتوو و هاوبه‌ش به‌ره‌نگاری سیاسه‌تی فاشیزمی كۆماری ئیسلامی ئێران و هاوپه‌یمانه‌كانی ببنه‌وه‌، پژاك و كۆدار بڕوای وایه‌ ئه‌گه‌ر پێشتر پارت و لایه‌نه‌ سیاسیه‌كان خاوه‌ن هه‌ڵوێستی نه‌ته‌وه‌یی و نیشتمانپه‌روه‌رانه‌ بوایه‌ن، كۆماری ئیسلامی جساره‌تی ئه‌وه‌ی نه‌بوو، هێرشێكی به‌رفراوان سه‌ر كوردان به‌ڕێوه‌ ببات، بۆیه‌ له ‌پێناو مایه‌پووچ كردنی سیاسه‌تی فاشیزمانه‌، پێشخستنی هاوئاهه‌نگی، یه‌ك گوتاری و یه‌كڕیزی نێو ماڵی كوردی ده‌بێته‌ كلیلی چاره‌سه‌ری ئاشتیانه‌ی كێشه‌ی كورد و گه‌لانی ناوچه‌كه‌.