ڕۆژنامەنووسێكی تیرۆركراو لەكونجی زینداندا دەژی

(ڕۆژنامەنووسێكی تیرۆركراو لەكونجی زینداندا دەژی) ناونیشانی وتارێكی ڕۆژنامەنووس زمناكۆ ئیسماعیل-ە كە تیایدا تیشك دەخاتە سەر دەستگیركردنی ڕۆژنامەنووسی ئاژانسی ڕۆژنیوز زوبێر برادۆستی و باس لەو بێدەنگییە دەكات كە لەبەرامبەر دەستگیركردنی ڕۆژنامەنووس زوبێر برادۆستی هەیە و دەلێت: دەستگیركردنی ڕۆژنامەنووسی ئاژانسی ڕۆژنیوز، (زوبێر برادۆستی) تیرۆركردنە، لەو جۆرە تیرۆركردنەیە كە خوێنی نەڕژاوە، بەڵام بۆ چاوترساندنی ڕۆژنامەنووسانی دیكە، لە كونجی زینداندایە.


تەواوی وتارەكە:

تیرۆركردنی ڕۆژنامەنووسان لەهەرێمی كوردستان، یەكێكە لەو چەمكە قێزەون و بێزراوەی، كە چەندین ساڵە ئێمەی هاوڵاتیانی ئەم هەرێمە، پێی ئاشنابوین، لەڕابردوودا چەندین هەوڵی زۆر دراوە كە تیرۆری ڕۆژنامەنووسان ڕابگیرێت، چەندین ڕۆژ و كات و سات خراوەتە سەریەك، بۆ ئەوەی كە تیرۆری ڕۆژنامەنووسان ڕابگیرێت، بەڵام هەتادێت ئەم تیرۆركردنە، لەشێواز و فۆڕمی دیكە زیاتر و بەرفراوانتر دەبێت، لە تازەترین تیرۆركردنی ڕۆژنامەنوسانی هەرێمی كوردستاندا، زیاتر لە بیست ڕۆژە ڕۆژنامەنووسێكی تیرۆركراو، لە كونجی زیندانەكانی پارتیدا دەژی، بەڵام بێدەنگییەكی كوشندە، باڵی بەسەر ڕێكخراوەكانی مافی مرۆڤ و كۆی گشتی میدیا و ڕۆژنامەنووسان و خاوەن قەڵەمە ئازادەكاندا كێشاوە، بێدەنگییەكی شێوە خنكێنەر، كە بۆ داهاتووی كاری ڕۆژنامەگەری و ئازادی ڕادەربڕین، ڕێگرییەكان زیاتر دەبن و نەفەسی ئازادی كاركردن، بەتەسكتر دێتە پێشچاو، بە جۆرێك، ڕۆژنامەنووسان چاو ترسێن دەبێت، لەلایەك شەقام و ڕۆژنامەنووسان لەیەك دەترازێنێت، لەلایەكی دیكە، گروپ و ڕێكخراوو چالاكوانان لەیەكتر دور دەخاتەوە، بەو ئامانجەی كەبەرگریكاری كاری یەكتر و پاڵپشتی كاری یەكتری نەبن لە كاركردندا.

 لەمڕۆژدا بەڕوونی ئەوە بەرامبەر بە ڕۆژنامەنوسی تیرۆركراو، (زوبێر برادۆستی) دەبینین، ئەو ڕۆژنامەنووسەی كە ماوەی بیست ڕۆژە، بەهۆی تۆماركردنی دیمەنی بۆردوومانی ناوچەی برادۆست، لەلایەن سوپای توركیا و گواستنەوەی ئەو هەواڵە بۆ (ئاژانسی ڕۆژنیوز)، لەلایەن هێزێكی پارتی دەستگیركراوە و تا ئێستا چارەنوسی نادیارە، ئەوەش تیرۆركردنێكی دیارو بەرچاوە، كە دەیبینین بەرامبەر بەڕۆژنامەنووسێك، لەو جۆرە تیرۆركردنەیە، كە خوێنی نەڕژاوە و لەژیاندا ماوە، بەڵام لەكونجی زیندانەكاندا دەیهێڵنەوە و بە گوتەی خۆیان "دەیكەن بە عیبرەت بۆ چاوترسێنكردنی ڕۆژنامەنووسانی دیكە"، بۆ بەرچاو ڕونی دەبێت ئەوە بزانین، كە تیرۆركردن چەمكێكی قوڵی فكری و فەلسەفییە، لە دێر زەمانەوە هەتا ئەمڕۆ، قسەو باسی زۆری هەڵگرتوە، لە نەوەدەكانی ڕابردودا مایكڵ لیمەن كە باسی تیرۆریزم دەكات و دەڵێت " لەبنەڕەتدا تیرۆریزم بریتییە لە كەڵك وەرگرتن لە توندوتیژی، یان هەڕەشەی بەكارهێنانی توندوتیژی، بەجۆرێك گروپ و هێزو كەسانێك، بەمەبەستی بەرەو پێشبردنی ئامانجێكی دیاریكراو لەبەرژەوەندی خۆیان، چاوترسێنی هاونیشتیمانی و هاوڵاتیان دەكەن، ئەوەش لەڕێگای نایاسایی وەك ( كوشتن، گرتن، هەڵكوتانە سەر كەسایەتی و ڤڕاندن و وونكردن و بەبارمتەگرتن)".

لەڕوانگەی ئەو پێناسەیەی مایكڵ لیمەن، دەستگیركردنی ڕۆژنامەنووسی ئاژانسی ڕۆژنیوز، (زوبێر برادۆستی) تیرۆركردنە، لەو جۆرە تیرۆركردنەیە كە خوێنی نەڕژاوە، بەڵام بۆ چاوترساندنی ڕۆژنامەنووسانی دیكە، لە كونجی زینداندایە، ئەم جۆرە تیرۆردكردنە مەرگی ڕانەگەیەندراوە، بەڵام لەو ڕوانگەیەوە مەرگی ئازادی ڕۆژنامەنوسی  ڕاگەیەندراوە، چونكە ئەو بێدەنگییەی بەرامبەر بەدەستگیركردنی ڕۆژنامەنووس زوبێر برادۆستی دەیبینین، عەیبەیەكی گەورەیە لەسەر قەڵەم و كیبۆرد و كامێرای ڕۆژنامەنووسان و میدیاكاران، عەیبەیەكی گەورەیە لەگەردنی یەكە بە یەكەی پەرلەمانتارانی هەرێمی كوردستان و پەرلەمانتارانی كورد لەئەنجومەنی نوێنەرانی عێراق، عەیبەیەكی گەورەیە بەناوچاوی ڕێكخراو و میدیا و ڕۆژنامە و سەنتەر و ئاژانس و هەموو گروپ و تاقم و كەسێك كە كاری ڕۆژنامەنووسی دەكات، بە میدیایی حیزبی و حكومی و ئەهلی و ئازاد و تاكە كەسی و بازرگانی، عەیبەیەكی گەورەیە بە تەوێڵی ئەو ڕێكخراوانەی كە بۆ بەرگری ئازادی ڕادەربڕین  دروستبون.

ئەمڕۆ زوبێر دەستگیركراوە و تیرۆری كەسی كراوە و لە سوچی زینداندایە، سبەی من و تۆش هەمان چارەنووسمان دەبێت، دوێنێ سۆران و سەردەشت و كاوە و ویداد و دەیان ڕۆژنامەنووسی دیكە، تیرۆركران و خوێنیان بەناهەق ڕژێندرا، كەیسی خوێن ڕژانیان بەلاڕێدا برا، بەڵام ئەو كەیسانە بەتەنها لەگەردنی دەسەڵاتدارانە، ڕۆژی خۆی دێت، بكەرانی ئەو تیرۆركردنە لەبەردەم دادگای دادپەروەرانەی خەڵك، ڕیز بكرێن و بەسزای خۆیان دەگەیەندرێن، بەڵام كەیسی ڕۆژنامەنووسێكی دەستگیركراو، لە گەردنی هەر یەكەماندایە تا ئازاد دەكرێت، لەو ڕوانگەیەوە زوبێر برادۆستی، لەگەردنی ئێمەدایە و دەبێت ڕێگای ئازادبوونی بۆ بدۆزینەوە، دەبێت بەر لەهەموو كەس من و تۆ دەنگ هەڵبڕین، داواكارییەكانمان بگەیەنینە شوێنی مەبەست، هەتا گوشار بخەنە سەر حكومەتی هەرێم و حكومەتی عێراقی و چارەنوسی ئەو ڕۆژنامەنووسە، دیاری بكەن، بە بێدەنگی من و تۆ بەرامبەر بەو تیرۆركردنە، بەشێكین لە كردەی فڕاندن و تۆقاندن و گرتنی ڕۆژنامەنووسان، وەك گاری پۆتەر دەڵێت "تیرۆركردن نانەوەی كەشێكی ترسناكە بۆ چاوترساندن و تۆقاندن"، خوێنی زوبێر برادۆستی، بەرلەوەی لە ئەستۆی دەستگیركارانی بێت، لە ئەستۆی ئەو كەسانەشدایە كە بێدەنگن بەرامبەر بەو تیرۆركردنە، لەپاش تیرۆركردنی لاشە و تیابردن و لێسەندنەوەی ژیانی، نە شەقام گرتن و خۆپیشاندان، نە گوتار و پیاهەڵدانی تۆڕە كۆمەڵایەتییەكان و فەیسبوك، نە پەیككار بۆ كردن و بەستنی نە مەراسیم و بەخشینەوەی خەڵات، ژیان بە بەژنی ئەو ڕۆژنامەنووسەدا ناكەنەوە، بەڵام بێدەنگی نەكردنی ئەمڕۆی من و تۆ، دەتوانین ژیانی بۆ بگێڕینەوە، با من و تۆ بەشدار نەبین لەم تیرۆركردنە و دەنگ هەڵبڕین بۆ ئازاد كردنی.

د.ح