ئابڵوقەی بێ پاساوی بالیسان و مردنی منداڵە ساواکە ناڕەزایی لێکەوتووەتەوە

بە پاساوی ڕێگری لە بڵاوبوونەوەی ڤایرۆسی کۆرۆنا،نزیکەی مانگێکە ئابڵوقەیەکی سەخت بەسەر شارەدێی بالیسانی سەر بە شارۆچکەی شەقڵاوەدا سەپێندراوە، ڕێگاکانی هاتووچۆ بە تەواویی داخراون و ئاسایشی هەولێر بازگەی تیایاندا جێگیر کردووە، نە ڕێگە بە دەرمان و کەلوپەلی تەندروستی دەدرێت بهێنرێتە شارەدێکە و نە ڕێگە بە هاتووچۆی نەخۆش و کارمەندانی تەندروستی و بەڕێوەبەری یەکە ئیدارییەکانیش دەدرێت، دوایین قوربانی ئەو ئابڵوقەیە منداڵێکی ساوابوو، کە بەهۆی ڕێگرییەوە پێش لە دایکبوونی، هەناسەی لێ بڕاو گیانی سپارد.

لەدوای قه‌ده‌غه‌ی هاتوچۆ و رێكاره‌كانی به‌ره‌نگاربونه‌وه‌ی ڤایرۆسی كۆڕۆنا له‌ هه‌رێمی كوردستان، چەند جارێک كێشه‌ له‌ نێوان هه‌ردوو ئیدار‌ی شارەدێی بالیسان و شارۆچکەی شه‌قڵاوه‌دا دروستبووە و ڕێگە لە بەرپرسانی ئیداریی و نەخۆش و کارمەندانی تەندروستیی شارۆچکەکە گیراوە بچنە شەقڵاوە.

ڕۆژی ٨ی ئەم مانگە، پیاوێک کاتێک باری تەندروستی هاوسەرەکەی تێکدەچێت بەهۆی دووگیانییەوە، سەرەتا دەیباتە نەخۆشخانەی ڕاپەڕین، بەڵام لەوێ ناتوانرێت کۆرپەکەیان ڕزگاربکەن و دەیاننێرنەوە بۆ بالیسان، دواتر پاش خوێنبەربونی ژنە دووگیانەکە، ڕەوانەی هەولێر دەکرێن، بەڵام بەهۆی زۆری بازگە و ڕێگا گیرانەوە بەهۆی قەدەغەی هاتووچۆوە، دوای پێنج کاتژمێر ژنە دووگیانەکە دەگەیەندرێتە نەخۆشخانەی منداڵبوون لە هەولێر، بەهۆی درەنگ گەیشتنیانەوە ناتواندرێت کۆرپەکەی ناو سکی ڕزگار بکرێت و گیان لەدەستدەدات، لەکاتێکدا ماوەی حەوت ساڵە ئەو خێزانە لە چاوەڕوانیی لەدایکبوونی منداڵێکدابوون.

دوای ڕووداوەکەش، لەلایەن بەرپرسانی نەخۆشخانەی منداڵبوونی هەولێرەوە بەڵێنمایەک بە باوکەکە پڕدەکرێتەوە بەرامبەر پێدانەوەی تەرمی منداڵەکە، لە ناو بەڵێنامەکەشدا ئەوەی لێ وەرگیراوە کە نابێت بچێیتە پزیشکی داد، لە ھەمان کات نابێت بە ھیچ شێوەیک سکاڵا لەسەر ھۆکاری مردنەکەی تۆمار بکات.

سێ پەرلەمانتاری هەرێمی کوردستان لەسەر ڕووداوەکە، لە بەیاننامەیەکدا، پرسیاریان کردووە، کە بە چ یاسا و ڕێنمایی و بڕیارێک بەڵێننامەیەکی لەوجۆرە، بە باوکی ئەو منداڵە مردووە پڕکراوەتەوە؟، دەشڵێن: ئەو بەڵێننامەیە، گومانی تەواو دەخاتە سەر ھۆکاری مردنی منداڵەکە و بە شوێن ئەنجامی لێکۆڵینەوەی ئەم دۆسیە دەبن.

هەریەک لە سۆران عومەرو سەرکۆ ئازاد گەڵاڵی و ھاوڕێ مەلا ستار دۆسیەکەیان بۆ سەرۆکی حکومەت و وەزیری ناوخۆ بەرزکردووەتەوە و ڕایانگەیاندووە: چۆن ژنێکی دووگیان بە رێگەپێدانی تەندروستییەوە لە دوو بازگە چەندین کاتژمێر ڕادەگیرێت؟.

لە کۆتاییشدا دەڵێن: ئەو بەڵێنامەیە نەک هەر بەتاڵە، پێوستە رێکاریی یاسایی بەرامبەر ئەو کەسانەی کە پێشیان واژۆ کردووە بگیرێتەبەر و دەستبەجێ ھۆکاری مردنی منداڵەکەش ئاشکرا بکرێیت.

هەر لەسەر ئەو پرسە، ئەندامێکی داواکاری گشتیی لە هەولێر داوای پێکهێنانی لیژنەیەکی لێکۆڵینەوەی کردووە بۆ دەستنیشانکردنی لایەنی کەمتەرخەم و هۆکاری مردنی ئەو کۆرپەیە.

محەمەد عەلی ئەندامی داواکاری گشتی لە هەولێر ڕایگەیاندووە، ئەو خێزانەی کە بەو دەردە براوە، ماوەی حەوت ساڵە چاوەڕوانی ئەو کۆرپەیەیان کردووە، بەڵام بە مردوویی لە باوەشیان گرت.

لە بەرامبەردا وتەبێژی تەندروستی هەولێر لەبارەی مردنی منداڵەکە و پڕکردنەوەی بەڵێننامە بە هاوسەری ئەو ژنە ڕایگەیاندووە، تیمی پزیشکی سەرپەرشتیاری نەشتەرگەرییەکە هیچ کەم تەرخەمیەکیان نەبووە لە مامەڵەکردن لەگەڵ ئەو حاڵەتەدا، تەنها ئەوەندە هەبووە کە ژنەکە درەنگ گەیشتووەتە نەخۆشخانە.

هەروەها باسی لەوەشکردووە، ئەو فۆڕمەی بە پیاوەکە پڕکراوەتەوە، دەدرێت بەهەر خێزانێک کە ڕەتیبکەنەوە ئەو کەسەی گیانی لەدەستداوە ببرێتە پزیشکی داد.

ئەمە یەکەمجار نییە لە ماوەی قەدەغەی هاتووچۆدا ڕێگەی لە نەخۆش و تەنانەت بەرپرسی یەکە ئیدارییەکانی بالیسان دەکرێت لەلایەن پارتییەوە.

ڕۆژی ٢٦ی ئازاری ئەمساڵیش، دوو حاڵەتی نەخۆشیی شارەدێی بالیسان كە یەكێكیان بە هۆی برینەوە توشی خوێن بەربوون بوبوو، بە ئەمبۆڵانسی نەخۆشخانە و بەیاوەری پزیشك بەمەبەستی وەرگرتنی چارەسەر بەخیرایی دەگوازرێنەوە بۆ نەخۆشخانەی شەقلاوە، بەڵام لەلایەن هێزەكانی ئاسایشی پارتییەوە و بە بڕیاری قائیمقامی شەقڵاوە لە ڕێگەی زینەتیر رێگرییان لێدەكرێت و چارەسەریان بۆ ناكەن.

هەر دوێنێش هێمن عەبدوڵا، بەڕێوەبەری شارەدێکە بە ڕۆژنیوزی ڕاگەیاند، بە مەبەستی دابینکردنی پێداویستی بۆ سنووری شارەدێی بالیسان لە گەڵ دوو فەرمانبەری دیکە ویستوویان بەچنە شەقڵاوە، “لە بازگەی زینەتیر کە لە ژێر دەسەڵاتی پارتی دیموکراتی کوردستاندایە، ڕێگریمان لێکرا”.

سەبارەت بە ڕێگرییەکان و ئابڵوقەی سەختی سەر بالیسان، بەرێوبەرایەتیی نەخۆشخانەی گشتی شارەدێکە ئەمڕۆ ڕاگەیەندراوێکی بڵاوکردەوە و وتی: رێگە نادرێت پزیشک و کارمەند و دەرمان بگاتە نەخۆشخانەکەیان، بە تایبەت لەڕێگای زینەتیر، کە شارۆچکەکە بە شارۆچکەی شەقڵاوەوە دەبەستێتەوە.

بەپێی ڕاگەیەنراوەکە، ڕێگە نەدراوە بە ئۆتۆمبێلی نەخۆشخانەکە دەرمان و پێداویستی پزیشکی بۆ نەخۆشخانەکەیان بگوازنەوە و پێیان ڕاگەیەنراوە کە بە بڕیاری قایمقام تەنها ئەمبوڵانس بەحالەتی کتوپڕەوە دەتوانێت بەو بازگانەدا تێپەڕ بێت، نەک دەرمان و پێداویستی پزیشکی و پزیشک و کارمەندی ئێشکگر.

هەر لە ڕاگەیەندراوەکەدا هاتووە: چاوەڕێی ئەوە بوون کە بڕیارەکانی وەزارەتی ناوخۆ وەک خۆین جێبەجێ بکرێن، نەوەک لەپەنای کردنەوەی ڕێگای ئەمبولانسەکان، خەڵکانێک دەرفەتەکە بقۆزنەوە و بتوانن هاتوچۆبکەن، بەڵام پزیشک و کارمەندان و تیمی تەندروستی ڕێگایان بەڕوودا دابخرێت لە کاتێکدا شارۆچکەکە تا ئەم ساتەش هیچ حاڵەتێکی توشبوون بە ڤایرۆسی کۆڕۆنای تێدا تۆمار نەکراوە و سەلامەترین و پڕ قوربانیترین شوێنی هەرێمی کوردستانە.

شارۆچکەی بالیسان سه‌ر به‌ شارۆچکەی شه‌قڵاوه‌یه‌ له‌ پارێزگای هه‌ولێر، له‌ سه‌رده‌می دوو ئیداره‌ییدا، ئه‌و ناوچەیە لەژێر‌ سنوری قەڵەمڕەوی ئیداره‌ی سلێمانیدا بووە.

بالیسا، نزیکەی ٨٨کم لە پارێزگای ھەولێر و ٣٦کم لە  شارۆچکەی شەقڵاوە  و ٣٥ کم لە شارۆچکەی ڕانیە و ٢٩ کم لە شارەدێی خەلیفان و ٢٥ کم لە شارەدێی بێتواتەی سەر بە ڕانیە دوورە.

ش.ف