چوؤرشەممە, 5 سبت 2018 – 07:57 ڕۆژنیوز – بۆتان گەرمیانی
تادێت گۆشەگیریی سەر عەبدوڵا ئۆجالان، ڕێبەری پارتی کرێکارانی کوردستان-پەکەکە تووندتر دەبێت سەدان داواکاریی خانەوادەکەی و پارێزەرانیشی بۆ سەردانیکردنی ئیمرالی ڕەتکراونەتەوە، لەوبارەیەشەوە سەلاح گەرمیانی، چاودێری سیاسیی و دانیشتووی شارۆچکەی کفری سەر بە ئیدارەی گەرمیان بۆ ڕۆژنیوز دوا.
سەلاح گەرمیانی دەڵێت، کە سەرجەم تێزەکانی ئۆجالان و ئەو بزووتنەوە ئازادیخوازەی جاڕیداوە، لەپێناو چارەسەرکردنی کێشەکانی کورد و پێکەوەژیانییەتی لەپاڵ گەلانی دیکەی ناوچەکەدا و بەمشێوەیە بەردەوامیی بە قسەکانی دا: ئەو پلانگێڕییە نێودەوڵەتییەی لەسەر ڕێبەر ئاپۆ بەڕێوەچوو، مەبەست لێی لەباربردنی مافە نەتەوەییەکانی کورد و پرسی ئاشتی بوو لە ناوچەکەدا، ئەگەر ئەو وڵاتانەش لەهەر قۆناغێکدا نییەتی بەرقەرارکردنی ئاشتی و تەباییان هەبێ، مەرجی سەرەکی ئازادکردنی ڕێبەری گەلی کورد و گەلان ئۆجالانە.
گەرمیانی پێشیوایە، کە بەردەوامیدان و تووندترکردنی گۆشەگیریی سەر ئۆجالان، لە ئاستی هەرچوار پارچەی کوردستان و ڕۆژهەڵاتی ناوەراست و جیهانیش کێشەکان ئاڵۆزتر دەکات.
ئەو چاودێرە سیاسییە باسی لەوەشکرد: مانەوەی گەلی کورد لە مەیدانی تێکۆشان و ئەو بەرەوپێشچوون و دەستکەوتانەی کە ئەمڕۆ لە کوردستان و ناوچەکە بەدەستهاتوون، نیشانەی ئەوەیە کە گەلی کورد دەستبەرداری خەبات و ڕێبەر و تێکۆشانی خۆی نەبووە، چیتر سەلماندیان بە گۆشەگیرکردنی ڕێبەرمان دەستبەرداری ڕامانی ڕێبەرمان و دۆزی ڕەوای گەلمان نابین و ڕەوڕەوەی مێژوو ناگەڕێتە دواوە.
ب.ل
