زیاتر لە ١٢٠ پارت لە سەرتاسەری جیهاندا، بەشدارییان لە ٢٦هەمین کۆنگرەی سۆسیالیست ئینتەرناسیۆنال لە مەدریدی ئیسپانیا کرد و هەریەکە لە یەنەکە و پەیەدە بەشداریان تیادا کرد و هاوسەرۆکی پەیەدە باسی لە هێرشە داگیرکەریەکانی دەوڵەتی تورک کرد.
ئاسیا عەبدوڵا هاوسەرۆکی پارتی یەکێتی دیموکرات – پەیەدە و نوێنەرانی یەکێتی نیشتیمانی کوردستانیش بەشداریان کە کۆنگرەکەدا کرد و ئاسیا عەبدوڵا لە کۆنگرەکەدا وتی: ساڵانێکی زۆرە لەسەر بنەمای ئاسایش و ئاشتی و دادپەروەری و یەکسانی شەڕ دەکەین کاتێک قەیرانی سوریا دەستی پێکرد پرۆژەی نەتەوەیی دیموکراتی و برایەتی گەلان و ژیانێکی هاوبەشمان پێشکەش کرد ئێمە هێڵی سێیەممان لە جەنگدا هەڵبژارد ئێمە هێرشمان نەکردووەتە سەر کەس تێکۆشانی ئێمە تەنیا بۆ ئاشتی و ئاسایش بوو کە لە باکوور و ڕۆژهەڵاتی سووریا پێکەوە بژین کە حەوت نەتەوە و نزیکەی پێنج ملیۆن کەسن بەڵام ئێمە ڕووبەڕووی هێرشی گەورە دەبینەوە.
ئاسیا لە بەردەوامی قسەکانیدا وتی: لە ساڵی ٢٠١٢دا بەرەی نوسرە هێرشی کردە سەرمان، لە ساڵی ٢٠١٤دا چەتەکانی داعش هێرشیان کردە سەر کۆبانێ، بەڵام ئێمە لە کۆبانێ بەرخۆدانێکی بوێرانەمان بۆ مرۆڤایەتی نیشاندا و شەڕی داعش و گروپە توندڕەوەکانمان کرد و زیاتر لە ١٠ هەزار شەهید و زیاتر لە ٢٠ هەزار بریندارماندا، بەڵام دوای شەڕی داعش دەوڵەتی تورکی داگیرکەر هێرش دەکاتە سەرمان.
هاوسەرۆکی پەیەدە وتیشی: لە ساڵی ٢٠١٨دا هێرشیان کردە سەر عەفرین و پاشان هێرشیان کردە سەر گیرێ سپی و سەرێکانی ژنان لە هێرشەکاندا کرانە ئامانج و سەدان هەزار کەس لە گەلەکەمان ناچاربوون کۆچ بکەن و ئێستا لە کەمپەکاندا دەژین و گۆڕانکاری دیمۆگرافی لە هەرێمەکانماندا ڕوودەدات، مێژووی هەرێمەکە هەزاران ساڵە تاڵان دەکرێت و هەزاران ژن ئەشکەنجە دەدرێن.
سەبارەت بە هێرشەکانی ئەم دواییە، ئاسیا وتی: ڕۆژی ٢٠ی ئەم مانگە جارێکی دیکە دەوڵەتی تورک بە زیاتر لە ٥٠ فڕۆکەی جەنگی و ٢٠ فڕۆکەی بێفڕۆکەوان لە هەرێمەکانمان هێرشێکی ئاسمانی ئەنجامدا و تا ئێستاش بەردەوامە دەیان هاوڵاتی گیانیان لەدەستدا و تەنانەت ڕۆژنامەنووسانیش کرانە ئامانج و ناوەندەکانی دەوڵەتیش بۆمباران کران.
باسی لەوەشکرد: چونکە ئێمە کوردین کۆمەڵکوژ دەکرێن، خەڵکی باکوور و ڕۆژهەڵاتی سووریا کە بەرخۆدانیان کرد و لە دژی داعش وەستاون هێرش دەکرێتە سەریان، داعشیش دەرفەتی ئەوەی هەیە جارێکی تر هێرش بکاتە سەرمان .
ئەسیا عەبدوڵا لە درێژەی قسەکانیدا وتی: ئێمە پشتگیری شەڕ ناکەین، بەڵام پشتیوانی لە چارەسەری سیاسی و یەکپارچەیی خاکی سوریا دەکەین ئێمە خەبات دەکەین بۆ سیستەمێکی لامەرکەزی و دەستورێکی دیموکراسی و خەبات دەکەین بۆ مسۆگەرکردنی مافەکانی کورد و هەموو گەلانی ناوچەکە و ئازادی ژنان لە شەڕی دژی داعشدا سەدان ژن گیانیان لەدەستدا.
ئەسیا عەبدوڵا، لە کۆتاییدا وتی: ئێمە ئامادەین بۆ ئاشتی و چارەسەری سیاسی تێبکۆشین ئێمە هێرشمان نەکردووەتە سەر هیچ لایەک بەڵام ئێمە خۆمان دەپارێزین و مافی پاراستنی ڕەوامان هەیە داوا لە هەموو ڕێکخراو و ڕێکخراوەکانی ئێرە و سەرۆکی سۆسیالیست ئینتەرناسیۆنال دەکەین کە پشتگیری کۆتاییهێنان بە شەڕ لە دژی گەلەکەمان بکەن.
ها-ع
