ئەندامێكی ئەنجوومەنی پارتی ژیانی ئازادی كوردستان – پژاک ڕایدەگەیەنێت، ئامانجی سەرەكی ئیسلامیەت، رزگاركردنی مرۆڤایەتییە، بەڵام هێزە دەسەڵاتدارەكان دەیانەوێت بەكارهێنانی ئیسلام بۆ مەرامە گڵاوەكانیان مرۆڤایەتی بكەنە كوێلە و ژێردەستە و دەشڵێت: ئیسلامی ئەمڕۆكە، كە دەسەڵاتداران نوێنەرایەتی دەكەن، پێچەوانەی گەوهەری ئیسلامە.
ئامەد شاهۆ، ئەندامی ئەنجوومەنی پارتی ژیانی ئازادی كوردستان – پژاک بەشداری بەرنامەی هەفتانەی هێڵی سێی تەلەفزیۆنی ئاریەن تیڤی كرد و لەبارەی ئیسلامەوە وتی: ئامانجی سەرەكی ئیسلامیەت، رزگاركردنی مرۆڤایەتییە، رزگاركرنی مرۆڤایەتی لەكوێلایەتی و جەهالەتە، بەڵام هێزە دەسەڵاتدارەكان دەیانەوێت بەكارهێنانی ئیسلام بۆ مەرامە گڵاوەكانیان مرۆڤایەتی بكەنە كوێلە و ژێردەستە، مرۆڤایەتی لەنێو نەزانیدا دەهێڵنەوە، ئەو مرۆڤانەی بەدوای ئازادی و ئاگاهیەوەن دەستبەسەر دەكەن، سزا دەدەن و دەكوژن.
هەروەها وتیشی: ئیسلامی ئەمڕۆكە، كە دەسەڵاتداران نوێنەرایەتی دەكەن، لەرێگەى دەركەوتن و پێچەوانەی گەوهەری ئیسلامە، ئەگەر لەئیسلامیەتدا بەبێ جیاواز باس لە پێكەوەژیانی گەلان دەكرێت؛ ئەی ئاخۆ بۆچی كوردان رۆژانە لەلایەن ئەو هێزانەی، كە خۆیان بەنوێنەری ئیسلام لەقەڵەم دەدەن، رووبەرووی نکۆڵی کردن و كۆمەڵكۆژی دەبنەوە؟ واتا هەبوون و ناسنامەیان نکۆڵی دەكرێت، ئەوە نیشان دەدات، كە ئەوانەی بەو شێوەیە و لەژێر ناوی ئاینی ئیسلامدا دەجووڵێنەوە و پەیامبەر وەكو پەیامبەری خۆیان دەبیینن، ساختەكاری و مۆنافقی دەكەن.
ئاماژەی بە داوایەكی ڕێبەری گەلی كورد عەبدوڵا ئۆجالان كرد، كە وتبوی: با كۆنگرەی ئیسلامی دیموكراتیك ببەستن، بانگەوازی ئەوەی كرد، كە لەسەر بنەمای ئیسلامی دیموكراتیك رێكخستنی تایبەت دابمەزرێت و وتی: كوردان تا ئێستاكە شتێكی وەهایان بۆ خۆیان بونیاد نەناوە و تەنیا بەشداری دام و دەزگای وەها بوونە و بوونەتە بەشێك لەو دام و دەزگایانە ئەوە لەكاتێكدا، كە هەركامەیان نوێنەرایەتی زیهنیەتیەكی تایبەت بەخۆیان دەكەن.
“دەوڵەتی داگیركەری ئێران، زیاتر ئیسلامی ـ سیاسی دەسەپێنێت. بۆ ئەوەی گەل ئەو هێرشانەی رووبەروو دەبێتەوە بێكاریگەر بكات، پێویستە ئەو چەكەی بەناوی ئیسلامەوە لەدژی كۆمەڵگە بەكار دەبردرێت لەدەستی دەوڵەت دەربهێنن، هەركەس دەبێت خۆی بەرێوە ببات و ئیدارەدانی خۆی بگرێتە ئەستۆی خۆی. یەكێتی بەهێزی مامۆستایان بۆ ئەم قۆناخە پڕ گرنگە، لەدژی رژێم ناڕەزایەتی مامۆستایانی ئاینی بەهێزبوو و لەپاڵ كۆمەڵگەكە و لەپشت داوا رەواكانی گەل بوون، دەبێت ئەو هەڵوێستانە بەهێزتر بكرێن. دەبێ هەموو گۆڕەپانەكان ببنە، گۆڕەپانی ئایدئۆلۆژی، هزری و لەسەر ئەو بنەمایە شۆڕشی زیهنی پێشبكەوێت، ئەوەندە مزگەوتمان لەكوردستان هەیە، رژێم و دەوڵەتی ئیسلامی ئێران، مزگەوتەكانیان كردووەتە جێگای كۆشتنی هزر و بێ ناسنامەكردن و بێ ئێرادەكردنی مرۆڤان، پێویستە كۆمەڵگە ئەو ناوەندانە لەدەست رژێم دەربهێنن و بیانكەنەوە ناوەندی تێكۆشان، دیالۆگ، چارەسەری و خۆبەرێوەبردنی كۆمەڵگە، دەتوانن لەو ناوەندانە لەگەڵ هەموو بەشەكانی كۆمەڵگە وەكو رۆشنبیران، پارێزەران، ژن و گەنجان و … هتد بەیەكەوە لەدژی ئیسلامی سیاسی و عەقڵیەتی فاشیستی رژێم تێكۆشان بكەن” ئامەد شاهۆ وای وت.
س.س
