ئەمڕۆ ڕۆژهەڵات خۆپیشاندان ئەنجام دەدات

بڕیارە خەڵکی ڕۆژهەڵاتی کوردستان لە ساڵوەگەڕی 'سێی ڕەشەمە' بچنە سەر شەقام و ناڕەزایەتی خۆیان بەرامبەر گەلەکۆمەی نێودەوڵەتی و گۆشەگیری سەر عەبدوڵا ئۆجالان دەرببڕن.


بەپێی ڕاگەیەندراوی ژووری دەستپێشخەری گەل، بڕیارە ئەمڕۆ خەڵکی شارەکانی ڕۆژهەڵاتی کوردستان لە ساڵوەگەڕی سێی ڕەشەمە، کە ساڵی ١٩٩٩ خەڵکی ڕۆژهەڵاتی کوردستان لەدژی گەلەکۆمەی نێودەوڵەتی دژی عەبدوڵا ئۆجالان ڕێبەری پەکەکە ڕژانە مەیدانەکان و خۆپێشاندانیان کرد، جارێکی دیکە بێنە سەر شەقامەکان و بە ڕێپێوانی بێدەنگ ئەو پیلانە نێودەوڵەتییە شەرمەزار بکەن.

لە ڕاگەیەندراوەکەی ژووی دەسپێشخەری گەل لەچوارچێوەی هەڵمەتی "ئیدی بەسە"، بەو شێوەیە بانگەواژی لە خەڵکی رۆژهەڵاتی کوردستان کراوە: داوا لە هەموو پێکهاتەکانی خەڵکی بەکەرامەتی ڕۆژهەڵاتی کوردستان دەکەین، کە ڕۆژی پێنجشەمە ٢ی ڕەشەمە/ ٢١ی شوبات، بەبۆنەی ساڵوەگەڕی سەرهەڵدانی خەڵکی ڕۆژهەڵات لە دژی گەلەکۆمەی نێودەوڵەتی دژی عەبدوڵا ئۆجالان ڕێبەری گەلی کورد لەو شوێنانەی کە دەستنیشان کراون ئامادەبن و دەست بە ڕێپێوانی بێدەنگ بکەن، تا لەگەڵ شەرمەزارکردنی سەرکوتی گەل، هەنگاوێک بێت بۆ یەکێتی و یەکگرتوویی زیاتر.

لە کۆتاییشدا ژووری دەستپێشخەری گەل باسی لەوە کردووە، کە؛ "لەبیر نەکەین کە ماف نادرێت، وەردەگیرێتەوە"، هەروەها کاتی خۆپێشاندانەکان لە کاتژمێر ١٧:٠٠ بۆ ٢٠ دیاری کراوە و ئەو شوێنانەی بۆ خۆپێشاندان دەستنیشان کراون وەهایە:

سنە: مەیدانی ئازادی بەرەو سێڕێیانی ئەدەب

سەقز: مەیدانی قودس بەرەو مەیدانی هەڵۆ

مەریوان: شەقامی شەبڕەنگ بەرەو چوارڕێیانی سەرەکی

مەهاباد: مەیدانی شارداری بۆ چوارڕێیانی ئازادی

بۆکان: مەیدانی فەرمانداری

ئورمیە: شەقامی ئیمام بەرەوە مەیدانی ئەیالەت

خۆی: شەقامی ئیمام

ماکۆ: بوڵواری ڕەسالەت

کرماشان: مەیدانی شارداری بەرەو مەیدانی موسەدق

جوانڕۆ: شەقامی بهداری بەرەو مەیدانی بەسیج

شاباد: مەیدانی ئیمام بەرەو مەیدانی هدایەت

ئیلام: چوارڕێیانی سەعدی بەرەو مەیدانی ئیمام

کامیاران: چوارڕێیانی سەرەکی بەرەو مەیدانی تروە ڕێز

س.ح