شەممە, 8 سبت 2018 – 17:32 ڕۆژنیوز – ناوەندی هەواڵەکان
ئەمڕۆ، مەسعود بارزانی، سەرۆکی پارتی دیموکراتی کوردستان-عێراق، لەبارەی موشکەبارانکردنی بارەگاکانی حیزبی دیموكراتی کوردستانی ئێران (حدکا) و حیزبی دیموكراتی كوردستان (حدك) لە شارۆچکەی کۆیە له‌لایه‌ن ئێرانه‌وه، پەیامێکی بڵاوکردەوە.
بارزانی لە پەیامەکەدا نیگەرانیی خۆی لە پەلاماری هێرشە موشەكییەکەی کۆماری ئیسلامی ئێران بۆ سەر بارەگاکانی حیزبی دیموكرات و زیانە گیانی و مادییەکانی ئەو هێرشە دەردەبڕێت و دەڵێت: لە كاتێكدا كە ئیدانەی ئەو پەلامارە دەكەم، سەرەخۆشیی خۆم ئاراستەی كەسوكاری شەهیدانی ئەو پەلامارە دەكەم و هیوای چاكبوونەوە بۆ برینداران دەخوازم.
مەسعود بارزانی داواش لە هەموو لایەک دەكات، كە “هەرێمی كوردستان نەكرێتە گۆڕەپانی ململانێ، چونكە خودی هەرێم كێشە و تەحەددیات و هەڕەشەی گەورەی لەبەردەمە، بە پێویستیشی دەزانم ئەوە بە گشت لایەك رابگەیێنم كە كێشەی گەلی كورد بە توندووتیژی و كوشتن و بۆردوومان چارەسەر ناكرێت و رێگا و شێوازی ئاشتییانە باشترین چارەسەرە بۆ هەموو كێشەكان.
ب.ل
