برادۆست: بە گولـلەی سوپای تورك منداڵێك برینداربوو

بەهۆی تەقەی سوپای تورك لەدەڤەری برادۆست منداڵێكی تەمەن ١٢ ساڵ برینداربوو، دانیشتوانی گوندەكانی دەڤەری برادۆستیش داوا دەكەن توركیا خاكی هەرێم چۆڵ بكات و لەسنوورەكان بكشێتەوە.


پاش نیوەڕۆی ئەمڕۆ، لەگوندی دایلا، لەبناری چیای کەتکین، لە دەڤەری برادۆست، بە گولـلەی سوپای تورک، منداڵێک برینداربوو.

ئەو منداڵەی كەبووەتە قوربانی، ناوی شێروان سەڵاحە، دانیشتوی گوندی دایلایە لەدەڤەری برادۆست، گولـلە بەرقاچی كەوتووە و بەسەختی برینداربووە، بەمەبەستی وەرگرتنی چارەسەر لەنەخۆشخانەی فریاكەوتنی سۆران خەوێندراوە.

هاشم ئیبراهیم، خاڵی ئەو منداڵە، لەبەردەم نەخۆشخانەی ئاشتی لە شارۆچکەی سۆران بە ڕۆژنیوزی وت: ڕووداوەکە كاتژمێر ٢:٠٠ی دوای نیوەڕۆی ئەمڕۆ لەچیای كتكین لەنزیك گوندی دایلا ڕوویداوە، منداڵەكە لەناو ماڵی خۆی بووە و گولـلەی بەركەوتووە، ڕۆژانە گوندەکانی ئێمە بۆردوومان و تۆپباران دەكرێت و ژیانمان لەوپەڕی دژواریدایە، داوا لەحكومەت و سەرۆكایەتی هەرێم دەكەین چارەسەرێكمان بۆ بدۆزنەوە.

هاشم، داوا دەكات سوپای توركیا لەسەر سنوورەكانی هەرێم بكشێتەوە، ئەو دەڵێت: گەریلاكانی پەكەكە لەناو گوندو ماڵەكاندا نین، بەڵام سوپای توركیا وازناهێنێت لەبۆردوومان و تۆپبارانی گوندەكانمان.

فەریاد شێركاوەیی، چالاكوانی كۆمەڵی مەدەنی بەڕۆژنیوزی ڕاگەیاند:  كەمتەرخەمی هێزە كوردیەكانی باشور و حكومەتی هەرێم وایكردووە ڕژێمی توركیا بەئارەزووی خۆی پەلبهاوێت و سنوورەكانی هەرێم ببەزێنێت، توركیا دەیەوێت دۆزی گەلی كورد لەناوببات و تەبایی و یەكڕیزیی نێوماڵی كوردیش خاپوور بكات، داوا لەهەموو هێزە كوردیەكانی باشور و چالاكوانان دەكەم فشاری جدی دروستبكەن بۆ وەدەرنانی سوپای توركیا لەناو خاكی هەرێم.

ئەو چالاکرانە پێی وایە ئامانجی تورکیا لە هێنانی هێز بۆ هەرێمی کوردستان، داگیرکردنی هەرێم و زیندوکردنەوەی دەسەڵاتی عوسمانییە.

د.ع