بۆ ئیدانەکردنی کۆمەڵکوژی ڕۆژئاوا لە هەڵەبجە گردبوونەوە ئەنجامدرا

دژی کۆمەڵکوژکردنی كوردانی ڕۆژئاوا، ژمارەیەك لە هاوڵاتیانی شاری هەڵەبجە گردبوونەوە و یاداشتێكیان دایە نوسینگەی مافی مرۆڤ.


لە چوارچێوەی چالاکییەکانی تایبەت بە ڕۆژی مافی مرۆڤ و دژی ئەو کۆمەڵکوژییەی دووی ئەم مانگە، سوپای داگیرکەریی تورکیا لە تل ڕفعەت ئەنجامیدا، کە بووە هۆی شەهیدبوونی ١٠ کەس و برینداربوونی ١٠ کەسی دیکە، کە زۆرینەیان منداڵ بوون، ئەمڕۆ ژمارەیەك لە هاوڵاتیانی شاری هەڵەبجە لەبەردەم نوسینگەی مافی مرۆڤ لە شاری هەڵەبجە  گردبوونەوە.

لە گردبوونەوەکەدا سۆران حسێن، بەیاننامەی دانیشتوانی شاری هەڵەبجەی خوێندەوە کە تێیدا هاتبوو: بەدرێژای سەد ساڵی ڕابردوو دوژمنان و داگیركەرانی كوردستان، لەهەر بەشێكی نیشتیمانەكەماندا هەر ڕۆژە و بەجۆرێك لەژێر ناوێكدا گەلەكەمان جینۆساید و کۆمەڵکوژ دەكەن، لە چەند ڕۆژی ڕابردووشدا، لەڕۆژئاوای كوردستان لەسەر دەستی سوپای داگیركەری تورك جارێکی دیکە كوردیان کۆمەڵکوژ كرد کە لە ناویاندا منداڵ هەبوون.

هەروەها هاتبوو: ئێمەی هەڵەبجەیی باش لەواتای ئازار و نەهامەتیەكان تێدەگەین، هەر بۆیە هەر كردەیەكی لەوجۆرە و کۆمەڵکوژکردنی گەلەکەمان بەتوندی ئیدانە دەكەین، ڕەخنەش لە وڵاتانی زلهێز دەگرین کە بە داخەوە چاویان لە ئاست ئەو تاوانانە كوێرە، نەتەوە یەكگرتووەكانیش بێدەنگی هەڵبژاردوە، وەك دانیشتوانی هەڵەبجە بانگەواز دەكەین لەحكومەتی هەرێمی كوردستان بەتایبەت وەزارەتی مافی مرۆڤ، بەجدی و لێبڕاوانە بێنە سەرخەت، كار بكەن بۆ ڕێگریکردن لەو داگیركارییانەی لەڕۆژئاوای كوردستان بەڕێوەدەچێت.

هەروەها بانگەوازی لە تەواوی پارت و لایەنە سیاسیەكان دەکەین، لەهەرچواری كوردستان، هەرچی زووە هەستن بەئەركی لەپێشینەی خۆیان بۆبەستنی كۆنگرەی نەتەوەیی، چونکە ئەگەر یەكنەگرین هەر ڕۆژە و هەڵەبجە، ئەنفال و تل ڕەفعەتێك دووبارە دەبێتەوە.

ک.س