هەپەگە ڕایگەیاند، هێزەکانی پاراستنی ئاسمانیی شەهید دەلال، لە ناوچەی چەلێی جۆلەمێرگ لە دژی هێزێکی داگیرکەران کە لە گردی شەهید بیلال جێگیر ببوون، بە فڕۆکەی بێفڕۆکەوان چالاکیان ئەنجامدا.
ناوەندی ڕاگەیاندن و چاپەمەنی هەپەگە لە ڕاگەیێنراوێکدا ئاماژەی بەوە کرد، کە هێزە ئاسمانیەکانی شەهید دەلال لە ٢٧ی تشرینی دووەم، کاتژمێر ١١:٣٠ خولەک لە ناوچەی چەلێی جۆلەمێرگ لە دژی هێزێکی داگیرکەران کە لە گردی شەهید بیلال جێگیر ببوون، بە فڕۆکەی بێفڕۆکەوان چالاکیان ئەنجامدا.
هەپەگە ڕاشیگەیاند، ئەو ئامانجانەی بە فڕۆکەی بێفڕۆکەوان دەستنیشان کرابوون، پێکێنران و چالاکییەکی سەرکەوتووانە بەڕێوەچوو و وتیشی: ئەم چالاکیە بە بۆنەی ساڵیادی دامەزراندنی پەکەکە و تۆڵەی هاوڕێمان فەرماندەی قارەمان یلماز دەرسیم بەڕێوەچووە.
هێرشە ئاسمانیەکان بۆ سەر هەرێمی زاپ
لە بەشێکی تری ڕاگەیێنراوەکەدا هەپەگە ئاماژەی بە هێرشێکی ئاسمانی سوپای داگیرکەر کرد بۆ سەر هەرێمی زاپ و ڕایگەیاند، سوپای داگیرکەری دەوڵەتی تورک لە بەرواری ٢٣ی تشرینی دووەم لە کاتژمێرەکانی نێوان ١٨:١٠ بۆ ١٨:٥٠ خولەک دەوروبەری گوندەکانی کنیانش و نێروەی سەر بە هەرێمی زاپیان بوردوومان کردووە.
د.ع
