ژمارەیەک لە کەسوکاری ئەو گەریلایانەی لە بۆسەیەکی چەکدارانی پەدەکە شەهیدبوون ماوەی ١٠٢ ڕۆژە داوای تەرمی ڕۆڵەکانیان لە پەدەکە دەکەنەوە و بۆ ئەوەش لە دەروازەی سێماڵکا مانیان گرتووە.
چالاکی کەسوکاری شەهیدان بۆ وەرگرتنەوەی تەرمی ئەو شەهیدانەی کە لە بۆسەیەکی هێزەکانی پارتی دیموکراتی کوردستان (پەدەکە)لە خەلیفان شەهید بوون ١٠٢ڕۆژە بەردەوامە.
چین و توێژەکانی ڕۆژئاوای کوردستان ڕۆژانە سەردانی مانگرتوان و کەسوکاری شەهیدان دەکەن لە دەروازەی سێماڵکا و پشتیوانیان دەکەن و لەگەڵیاندا دەمێنەوە و کردەوەکانی پەدەکە شەرمەزار دەکەن و داوای تەرمی ئەو شەهیدانە دەکەنەوە.
سەرلەبەیانی ئەمڕۆ، ئەندامانی ئەنجومەنی تەندروستی هەرێمی جزیرە بۆ پشتیوانی چالاکوانان بەرەو سێمالکا بەڕێکەوتن و دوای گەیشتنیان، بێریڤان دەروێش، جێگری بۆردی تەندروستیی هەرێمی جزیرە قسەی کرد و ڕایگەیاند، ئەوان پشتگیری کەسوکاری شەهیدان و چالاکوانانی سێماڵکا دەکەن تا تەرمی شەهیدان وەردەگرنەوە.
داواشی لەدەسەڵاتدارانی هەرێمی کوردستان کرد وەڵامی داواکاری کەسوکاری شەهیدان بدەنەوە و دەروازە سنوورییەکان بکەنەوە، هاوکات داواشی لە لەڕێکخراوە یاسایی و مرۆییەکان کرد بە ئەرکی مرۆیی خۆیان هەستن و هەوڵبدەن تەرمەکان ڕادەستی خێزانەکانیان بکەنەوە و دەروازە سنوورییەکان بکەنەوە.
کەسوکاری دوو گەریلای شەهید کە لەشەوی ٢٨ی ئابدا لە کەمینێکی هێزەکانی پەدەکەدا لە ناوچەی خەلیفان شەهید کراون، ماوەی ١٠٢ ڕۆژە داوای تەرمی ڕۆڵەکانیان دەکەنەوە و تا ئێستاش پەدەکە وەڵامیان ناداتەوە.
ئەو دوو شەهیدەی ڕۆژئاوای کوردستان بە ناوەکانی شەهید تولهەڵدان ڕامان و سەردەم جودی کە سێ گەریلای دیکەشیان لەگەڵدا شەهیدبوون تا ئێستا تەرمەکانیان نازاندرێت لە کوێیە.
بە گوێرەی وتەی چەند چەکدارێکی هێزی ڕۆژ، لەلای کەسوکارەکەیان دانیان بەوەدانا وە کە بە فەرمانی بەرپرسانی پەدەکە ئەوان کەمینیان بۆ ئەو گروپەی گەریلا داناوە.
کەسوکاری ئەو دوو شەهیدەی ڕۆژئاوای کوردستان لە ٥ی مانگی تشرینی یەکەمی ٢٠٢١وە لە دەروازەی سنوری نێوان ڕۆژئاوای کوردستان و باشوری کوردستان لە مانگرتندان و داوای تەرمی شەهیدەکانیان دەکەنەوە.
ها-غ
