سێشەممە, 26 يون 2018 – 19:47 ڕۆژنیوز – ناوەندی هەواڵەکان
٢٤ی ئەم مانگە، هەڵبژاردنەکانی تورکیا و باکوری کوردستان بەڕێوەچوو، لە ئەنجامدا هەدەپە توانی بەربەستەکانی هەڵبژاردن لەو وڵاتە ببڕێت و سەرکەوتن بەدەستبێنێت، بەو بۆنەوەیەوە ئیوارەی ئەمڕۆ بەرەی دیموکراسی گەل پەیامێکی پیرۆزبایی بڵاوکردەوە.
لە پەیامەکەدا وێرای پیرۆزبایی لە هەدەپە و گەلانی تورکیا بەبۆنەی سەرکەوتنی هەدەپەوە، هاتووە: سەرەڕای بوونی فشارو گوشاری گەورەو تەزویراتێکی زۆر، زیندانیکردنی هاوسەرۆکانی پێشوو چەندین کادر و بەڕێوەبەریی هەدەپە، هەروەها هەوڵدانێکی زۆر بۆ ئەوەی هەدەپە بەربەستی هەڵبژاردنەکان تێنەپەڕێنێت، بەڵام بەهۆی تێکۆشانی هەدەپە و گەلی کورد و گەلانی ئازادیخوازی تورکیا، لە پێناو دیموکراتیزەکردنی کۆمەڵگەی تورکی و وەستانەوە بەرامبەر فاشیزمی ئەکەپە و ئەردۆغان، توانرا سەرکەوتنی باش تۆمار بکرێت.
هەروەها هاتووە: سەرەڕای بوونی هێرشی نەژادپەرستان و فاشیزم، خواستی گەلانی تورکیا بۆ ئازادی سەرکەوت وهەدەپەی وەک هێزی سێیەمی تورکیا و یەکەمی باکوری کوردستان پێشخست، چونکە لەم هەڵبژاردنەدا گەلانی تورکیا ئەوەیان دووپاتکردەوە، کە چارەسەری کێشەی کورد و کێشەکانی تورکیا و لە پێناو مانەوەی تورکیا وەک دەوڵەتێکی دیموکرات دەنگیان بەهەدەپەدا.
بەرەی دیموکراسی گەل لە درێژەدا ڕایگەیاندووە: جیهان وڕۆژهەڵاتی ناوەڕاست بە شەڕێکی سەختی جیهانیدا تێدەپەڕێت، دەسەڵات وحکومەتەکان، لەسەر بنچینەی پاوان و دەستبەسەرداگرتن خۆیان بۆهێرش ئامادەدەکەن، ناوچەکە بەرەو ڕەوشێک دەبەن کەکۆتاییەکەی دیار نییە، زەرەر مەندی یەکەم لە هەلومەرجی شەڕەدا گەلانن، بەتایبەت گەلی کوردە کە هێرشی کوشتارو لەناوبردنی لەسەر پەیڕەو دەکرێت، لە ڕەوشی شەڕدا خەڵکێکی زۆر کۆچبەر دەبن، ماڵوێرانی، کوشتار، داتەپینی ئابوری، بێکاری و ژن کوژی وهێرشی سەر ژنان و گەنجان وڕاگەیاندنی ئازادی بەدواوە دێت.
بەرەی دیموکراسی چارەسەریی ئەو کێشانە بەیەکترقبوڵکردن وناسینی نەتەوەو پێکهاتە جیاوازەکان دەزانێت لە دەستورێکی دیموکرات و پەیڕەوی کۆنفیدراڵیزمی دیموکراتیدا و دەشلێن: لە دەروەی ئەمانە، ناوچە بەرەو دابڕان و پارچە بوون دەڕوات، ئەوەش بۆ تورکیا ڕاستە، ئەوەی بەڕێوەبەریی فاشیزم دەکات لە تورکیادا زهنیەتی دەسەڵاتداریی یەک نەتەوەو یەک دەوڵەتە.
لە کۆتایی پەیامەکەی بەرەی دیموکراسی گەلدا، سەرنج خراوەتەسەر ڕێژەی ژنانی سەرکەوتوو لە هەدەپەدا و راشگەیەندراوە: سەرخستنی ۲٥ کاندیدی ژن و گەنجان و نەتەوە جیاوازەکان، ئەوڕێچکەیەیە کە لە پێناوی چارەسەرکردنی کێشەکان و دیموکراتیزەکردنی کۆمەڵگادا کاریگەرە، بۆیە داواکارین حیزبەکانی دیکەی تورکیا و بە تایبەت ئەکەپە، هەڵسوکەوتی بەرپرسیارانە بەرامبەر ئەو سەرکەوتنانە بکەن و بیکەنە دەسکەوت بۆ چارەسەرکردنی کێشەکانی تورکیا، چونکە شەڕ وپێکدادان جگە لە زیان و بەهەدەردانی تواناکانی کۆمەڵگەی تورکی هیچ دەسکەوتێکی تری نابێت..
س.ح
