رۆژنیوز- چۆمان
بەهۆی بارینی بەفر و هەرەسی بەفرەوە پرۆژەی ئاوی ماڵانی چۆمان ساڵانە توشی گرفت و پەككەوتن دەبێت، ماوەی پێنج ڕۆژە بەو هۆیەوە دانیشتوانی شارۆچكەكە ئاوی خواردنەوەیان پێنەگەیشتووە و هاوڵاتیان بە تانكەر ئاو دەكڕن.
جیاواز لە ناوچەكانی تر كە بەهۆی كەمبارنییەوە ڕووبەڕووی كەمئاوی بونەتەوە، شارۆچكەی چۆمان بەهۆی زۆری بەفربارینەوە گرفتی كەمئاوی بۆ دروستبووە و سەرچاوەی ئاوی چارۆچكەكە كەتووەتە ژێر هەرەسی بەفر و هاتنی ئاوی بۆ شارۆچكەكە وەستاندووە.
دژوار جەلال، دانشتوی شارۆچكەی چۆمانە لەو بارەیەوە وتی: سەرەڕای هەبوونی دەیان سەرچاوەی ئاوی گەورەو پاك، بەڵام ساڵانە شارۆچكەی چۆمان بێ ئاو دەبێت و توشی گرفتی ئاو دەبن بەهۆی خراپی لە جێ بەجێكردنی پرۆژەی ئاوی چۆمان، چونكە لەگەڵ هاتنی وەرزی نوێی بەفر و باران هەمیشە ئاوەكە دەشكێت و پەكی دەكەوێت.
بەوتەی ئەو هاوڵاتییە، پرۆژەكە چەندین كێشەی هەیە، كە هەر لە سەرچاوەكەوە كە شوێنێكی بەرزە و گەشتیارە ئەمەش وا دەكات كە لە وەرزی گەشتیاری گەشتیاران بچنە ناو ئاوەك ەو ئاوێكی پیس بۆ ماڵەكانمان بێت و كوالێتی بۆریەكان خراپەو زۆرجار دەتەقێت زیان بەر رێگاو بانیش دەگەیێنێت.
كاروان حسێن، هاوڵاتییەكی تری شارۆچكەكەی و باس لەوە دەكات، ماوەی پێنج رۆژە ئاوی خواردنەوە بۆ ماڵان نەهاتووە و خەڵكی بە تانكی ئاو دەكڕن و داوادەكات، حكومەتی هەرێم كێشەی ئاو چارەسەربكات و پرۆژەیەكی تۆكمە و ڕێك دروست بكات.
لەسەر ئەو پرسە، بەرێوبەری فەرمانگەی ئاوی چۆمان وتی: شوێنی پرۆژەكە زۆر سەختەو دوورە، شوێنەكە بەفری زۆر دەگرێت و بەردەوام رنوی بەفری لێدێت ئەوەش پێویستی بە ئیمكانیات و كەلی پەلی باشی پەیوەست بە سیانەكردن و چاككردنەوە هەیە كە ئێمە نیمانە، بۆیە هەڵ دەدەین لە داهاتوو تیمەكان بەردەوام چاودێری بكەن و رێگەنەدەن پەكی بكەوێت.
ئازاد عەباس، بەرێوبەری فەرمانگەی ئاوی چۆمان بە رۆژنیوز وت: هەرەسی بەفر بۆ ماوەی چەند رۆژێك ئاوی چۆمانی پەكخست و شارۆچكەكەی بێ ئاوكرد، ئەم پەكستن و بێ ئاوبوونە لە وەرزەكانی زستان و داراینی بەفر ئەم كێشەیە بەردەوام دووبارە دەبێتەوە.
سەرچاوەی كانی ئاوی پرژێ كە پرۆژەی ئاوی خواردنەوەی چۆمان دابین دەكات، ١٢كم لەسەنتەری شارۆچكەی چۆمان دوورە و لە ئاستی ڕووی دەریاوە دوو هەزار و٣٠٠م بەرزە، ئەوەش وای كردووە بەبێ تەزوی كارەبا و بەشێوەی ٢٤ كاتژمێری ئاو دەگاتە چۆمان، بەڵام بەهۆی خراپی لە جێ بەجێكردنی پرۆژەكە بەردەوام لە وەرزی بەهارو زستان كێشەی ئاوی خواردنەوە بۆ شارۆچكەی چۆمان دروست بێت و یان توشی نەبوونی ئاو دەبن یاخود ئاوێكی شێلو و پیس دەگاتە ماڵەكانیان.
س.س
