لە زانكۆی سۆران پێشەنگایەكی كتێب كرایەوە كە بۆ ماوەی سێ ڕۆژ بەردەوام دەبێت و تیایدا ١١ دەزگای چاپ و بڵاوكردنەوەی كتێب بەشداریان كردوەو نزیكەی ٥ هەزار ناونیشانی جیاواز نمایشكراون.
زانكۆی سۆران بەهەماهەنگی ١١دەزگای چاپ و بڵاوكردنەوەی كتێب بەمەبەستی هاندان بۆ بە كەلتوركردنی خوێندنەوە، پێشەنگایەكی كتێبی کرایەوە کە داشكان لەنرخی كتێبەكاندا كراوە.
زێبار عەزیز ،فەرمانبەر لە بەشی ڕاگەیاندنی زانكۆی سۆران و سەرپەرشتیاری ئەو پێشەنگایە بۆ ڕۆژنیوز وتی: مەبەست لەم پێشەنگایە ئەوەیە كە خوێندكاران بەنرخێكی كەمتر لەبازاڕ كتێبیان دەست بكەوێت و بتوانن كتێبی دڵخوازی خۆیان بكڕن، جگەلەوەش كە وەرزی خوێندنی ئەكادیمی كۆتایی دێت و پشووی هاوین دەست پێدەكات خوێندكاران دانەبڕێن لەزانست و زانیاری.
وتیشی هەوڵیانداوە لەگەڵ دەزگاكانی چاپ و بڵاوكردنەوەی كتێب داشكانی گونجاو بۆ نرخی كتێبەكان بكەن بۆ ئەوەی زۆرترین كتێب بفرۆشرێت و خوێندكارانیش بتوانن چەند كتێبێك بكڕن.
کردنەوەی پێشەنگای کتێب لە ناو زانکۆی سۆران یەکەمجارە ئەنجام دەدرێت، بۆ ماوەی سێ ڕۆژ بەردەوام دەبێت و لە كاتژمێر هەشتی بەیانیەوە تا درەنگانی شەو کراوە دەبێت.
لای خۆشیەوە یونس محەمەد کە بەشداری پێشەنگاکەی کردووە وتی: ئەم جۆرە پێشەنگایانە دەرفەتی باشن بۆ ئەوەی خوێنەران بتوانن كتێبی دڵخوازی خۆیان بكڕن، بەڵام گلەیی هەیە لەوەی ناونیشانی كتێبەكان كەمن و ژمارەیەكی زۆری دەزگاكانی كتێب فرۆشی بەشدارنین و كتێبی دڵخوازی خۆیان دەست نەكەوتووە.
دەشڵێت: دەبوو لە داشكاندنی نرخ بۆ كتێبەكان حیسابی زیاتر بۆ گیرفانی خوێندكاران بكرایە، چونكە خوێندكاران دۆخی ئابوریان باش نیە و دەبوو زیاتر داشكان بكرێ بۆ ئەوەی بتوانن زۆرترین كتێب بكڕن، لەگەڵ ئەوەشدا ئەو جۆرە پێشەنگایە ئەگەر خوێندكاران نەتوانن كتێبیش بكڕن دەرفەتێكی باشە بۆ ئەوەی ئاشنا بن بە ناونیشانی كتێبەكان و خوودی سەردانیكردنی ئەو پێشەنگایە كارێكی باشە.
ها-غ
