گەریلاکانی هەپەگە و یەژاستار سیستمێکی کامێرای چاودێریی سوپای تورکی داگیرکەر تێکدەشکێنن، گەریلاکان لە ساتی ئەنجامدانی چالاکییەکەدا دەڵێت: سوپای تورک ئیرادەی نەماوە بەرامبەر گەریلا شەڕ بکات، بۆیە دەیەوێت لەڕێگەی تەکنیکەوە ڕووبەڕوومان ببێتەوە.
بەگوێرەی گرتە ڤیدیۆییەک کە ئاژانسی هەواڵی فورات بڵاویکردووەتەوە، گەریلاکانی هەپەگە و یەژاستار لە چالاکییەکدا لە ناوچەی وەرخەلێی ئاڤاشین، سیستمێکی کامێرای چاودێریی سوپای تورک تێکدەشکێنن.
دوو گەریلا بە ناوەکانی ڕێڤان و چالاک لە ناوچەی وەرخەلی ئاڤاشین چالاکییەکەیان ئەنجامداوە، ئەوان دەڵێن: بۆ ئەنجامدانی چالاکی هاتووین بۆ ناو ئەم سەنگەرانە، کە سوپای تورک داگیری کردوون.
گەریلاکان ڕایانگەیاند، سوپای داگیرکەر ناتوانێت بەرامبەر گەریلا شەڕ بکات شوێنەکەی خۆی جێهێشتووە و ڕایکردووە و دەڵێن: ناتوانن شەڕ بکەن، لەبەر ئەوەش هەموو جۆرە تەکنەلۆژیایەکی گەورە و پێشکەوتوو لە دژی ئێمە بەکاردەهێنن، ئێمەش لە دژی ئەو تەکنیک و تەکنەلۆژیایەى دوژمن شەڕ دەکەین، ئێمە لە چەند ساتێکی دیکەدا لێرەدا کامێرا چاودێرییەکەیان تێکدەشکێنین.
وەک لە گرتە ڤیدیۆییەکەشدا دەردەکەوێت، دوای چالاکییەکە دوو گەریلاکەی هەپەگە و یەژاستار بە سەلامەتیی دەگەڕێنەوە، بەڵام سوپای تورک لە دوورییەکی زۆرەوە تەقە دەکەن و ناتوانن ڕووبەڕووی گەریلاکان ببەنەوە.
ب.ل
