تورکیا دەستێوەردانی زیاتر لە کەرکوک دەکات

باڵوێزی تورکیا لە عێراق بڕیار دەدات وڵاتەکەی قشڵەی کەرکوک نۆژەن بکاتەوە، پاش ئەوەی بەهۆی بارانەوە بەشێکی داڕووخاوە، بەوەش تورکیا زیاتر دەیەوێت دەستوەردان لە کەرکوک بکات.


دوێنێ فاتیح یەڵدز، باڵوێزی تورکیا لە عێراق، سەردانی شاری کەرکوکئ کرد و دواتر لەگەڵ پارێزگاری بە وەکالەتی کەرکوک و بەرپرسانی بەرەی تورکمانی، سەردانی قشڵەی کەرکوکیان کرد، کە ئاسەوارێکی مێژوویی شارەکەیە.

فاتیح یەڵدز باڵوێزی تورکیا لە عێراق، لە سەردانەکەیدا ڕاگەیاند: "بەهۆی ئەوەی قشڵەی کەرکوک مێژوویەکی دێرینی هەیە و ئێستا بەشێکی بەهۆی باران بارینەوە داڕوخاوە، بۆیە ئێمە ئەرکی چاکردنەوەی ئەو بەشەی قشڵەی کەرکوک لە ئەستۆی خۆمان دەگرین و چاکی دەکەینەوە".

ڕاشیگەیاند: "کەرکوک بۆ تورکیا گرنگی تایبەتی هەیە و ئێمە هەمیشه هاوکاری کەرکوک دەبین".

فاتیح یەڵدز دواتر سەردانی قەیسەری کەرکوکی کرد، کە ئێستا لە لایەن ئاژانسی تیکاوە نۆژەندەکرێتەوە.

هەر دوێنێ سه‌ردار جام، سه‌رۆکی ئاژانسی تیکا، له‌گه‌ڵ فاتیح یه‌ڵدز، باڵوێزی تورکیا له‌ عێراق، سه‌ردانی شارۆچکه‌ی خورماتووی سه‌ر به‌ پارێزگای سه‌ڵاحه‌دین ـ یان کرد و باسیان لە ئەنجامدانی چەند پرۆژەیەکی خزمەتگوزاریی کرد.

ئاژانسی تیکا، یان ئاژانسی یارمه‌تیدان و هه‌ماهه‌نگی تورکی، لە ساڵی ١٩٩٢ دامەزراوە و ڕاستەخۆ سەربە سەرۆک وەزیرانی تورکیایە، کاری ئەو ئاژانسە تەرکیزخستە سەر ئەو وڵاتانەیە، کە تورک و تورکمانی لێدەژین و لە ڕێگەی پرۆژەی خزمەتگوزارییەوە، هەژموونی تورکیی زاڵ دەکات.

دەستێوەردانەکانی دەوڵەتی تورکیا بۆ کەرکوک پێیناوەتە قۆناغێکی مەترسیدارەوە، دوای سوتانی قەیسەری کەرکوک و نۆژەنکردنەی بازاڕەکە لە لایەن ڕێکخراوێکی تورکیەوە، ئێستا تورکیا دەوێت بە بیانوی هاوکاری و نۆژەنکردنەوەی قشڵە، هەژموون و پێگەی خۆی لە شارەکە زیاد بکات، هاوکات دەوێت لە ڕێگای کارە خێرخوازییەکانەوە هەستی هاوڵاتیانی شارەکە بۆ خۆی ڕابکێشێت.

قشڵەی کەرکوک، ئاسەوارێکی دێرینە و مێژووەکەی دەگەڕێتەوە بۆ سەدەی ١٨می زاینی، قشڵە وەک بەشێک لە مۆزەخانەی شارەکە، بەشێک لە کەلوپەلی کۆنی نەتەوەکانی تێدا کۆکراوەتەوە.


ک.ک