شەممە, 9 يون 2018 – 13:53 ڕۆژنیوز – ڕۆزە محەمەد
پێنج ڕۆژ پێش ئێستا و نزیک کاتژمێر 10:00ی شەو لەلایەن هیزە ئەمنیەکانی تورکیاوە پۆلیک لەپەنابەرانی کورد لە نزیک خاڵی سنوری تورکیا بۆ یۆنان دەستگیرکران و ڕادەستی چەتەکانی بەرەی نوسرە کران لە خاڵی سنوری بابل هوا لەسوریا.
ئاری جەلال، سەرپەرشتیاری گشتی فیدراسیۆنی سەراسەری پەنابەرانی هەرێم بە ڕۆژنیوزی ڕاگەیاند: بەپێی ئەو زانیاریانە لەبەر دەستماندایە ژمارەیان هەشت کەسبوون و هاوڵاتی مەدەنی عیراقین و لە نەتەوەی کورد و زۆربەیان دانیشتووی شاری سلێمانی و دەوروبەرین، ئەم پەنابەرانە لە دوای ئەوەی لەلایەن تورکیاوە دەستگیرکراون بۆ ئەوەی ئازاد بکرین خۆیان بە سوری لە قەڵەم داوە.
ئاری جلال، وتیشی: خەتای پەنابەران خۆیانە کە لەکاتی دەستگیرکردنیاندا ناسنامەکانی خۆیان شاردوەتەوە و وتویانە کە ئێمە سورین، بەڵام لە چەند مانگی ڕابردووەوە ئەوە گرنگی نەماوە کە سوری بیت یاخود هەر جێگەیەکی دیکە، لەبەر ئەوەی کە بە پێی ڕێکەوتن ڕێگە لە کۆچکردنی پەنابەران دەگیرێت بۆ وڵاتان، وە پۆلیسی تورکیا ڕیگە نادات کە پەنابەر تێپەڕ بێت، بۆیە ئەم هاوڵاتیانەش وتویانە ئێمە سورین، بۆیە پۆلیسی تورکیا دیپۆرتی سوریایی کردوونەتەوە و لە دەستی بەرەی نوسرەدان.
ناوبراو وتیشی: لایەنە پەیوەندیدارەکانی لێ ئاگادار کراوەتەوە، بەڵام هیچ هەڵوێستیان نییە، تەنانەت وەزارەتی کۆچوکۆچبەرانیش هیچ کارێکیان نەکردووە بۆ گەڕاندنەوەیان.
سەرپەرشتیاری گشتی فیدراسیۆنی سەراسەری پەنابەرانی هەرێم، داوای لەو پەنابەرانەکرد کە توشی هەر گرفتێک دەبن پەیوەندییان پێوەبکەن بۆ ئەوەی هاوکارییان بکەن، ئەویش لە ڕێگەی ئەم ژمارانەوە 009647501730707 کوردستان – 00905314001515 تورکیا.
س.ح
