شەممە, 18 أغس 2018 – 21:28 ڕۆژنیوز – شەنگال
درەنگانێکی ئێوارەی ئەمڕۆ، تەرمی زەکی شەنگالی، ئەندامی کوردۆناسیۆنی کۆمەڵگای ئێزدی، کە لە هێرشە ئاسمانییەکەی ١٥ی ئەم مانگەی دەوڵەتی تورک بۆ سەر شەنگال شەهیدببوو، لە مەزارگەی دلبەش و شەهید بەرخۆدان-ی ناوچەی سەردەشتی شەنگال بەخاکسپێردرا.
کەسوکار و خانەوادەی زەکی شەنگال و سەدان کەس لە کامپی پەنابەرانی مەخمور و باشوری کوردستان و هەزاران کەسی ئێزدیی بەشدارییان لە مەراسیمەکەدا کرد.
لە مەراسیمەکەدا، چەندین پۆستەر و وێنەی مام زەکی و ئاڵای یەبەشە و یەژەشە هەڵکرابوون، هەروەها دروشمەکانی “شەهید نامرێ”، “ئەی شەهید خوێنی تۆ لە زەوی نامێنێ” و “زەکی نامرێ” بەرزکرایەوە.
هەروەها ڕێوڕەسمێکی سەربازییش لەلایەن شەڕڤانانی یەبەشە و یەژەشەوە ئەنجامدرا.
لە مەراسیمەکەدا، زەردەشت شەنگالی، یەکێک لە فەرماندەکانی هێزەکانی یەبەشە وتارێکی پێشکەشکرد و وێڕاوی سەرەخۆشیکردن لە گەلی کورد و خانەوادەی زەکی شەنگالی، وتی: مام زەکی لە ئەنجامی هێرشێکی ترسنۆکانەدا شەهیدبوو، مانگی ئاب بۆ ئێمە مانگی کۆمەڵکوژییەکانە، لەبەر ئەوەش لەمانگێکی وەهادا مام زەکییان کردە ئامانج، مام زەکی کۆڵەکە و سیمبولی کۆمەڵگای ئێزدی بوو، دوژمنان ویستیان لە کەسایەتیی مام زەکیدا هەموو کۆمەڵگای ئێزدی لەناوببەن.
ئەو فەرماندەیەی یەبەشە بەڵێنێشی دووپاتکردەوە، کە هەتا خەونەکانی مام زەکی پێکنەهێنن، دەست لە تێکۆشان بەرنەدەن، وتیشی: بست بە بست و کۆڵان بۆ کۆڵان شەڕ بۆ پاراستنی کۆمەڵگای ئێزدی دەکەین، ئەمڕۆ تاکە ڕێگای ئێمە بەرخۆدانە، جگە لە بەرخۆدان هیچ بژاردەیەکی دیکەمان لەبەردەمدا نییە.
پاشان هاوسەری زەکی شەنگالی وتارێکی پێشکەشکرد و وتی: با دەوڵەتی تورک باش بزانێت، ئێمە هیچ کاتێک هەنگاو بۆ دواوە نانێین، هیچکاتێک دەست لە خاک و پرسی خۆمان بەرنادەین، بە شەهیدکردن ناتوانن چاوترسێنمان بکەن.
لەکۆتاییشدا، فارد حەربۆ، هاوسەرۆکی گشتیی بەڕێوبەریی شەنگال وتارێکی پێشکەشکرد و وتی: ئێمە وەک گەلی شەنگال خوێنی مام زەکی لە زەوی ناهێڵین، با دوژمن باش بزانێت کە بە شەهیدکردنی ئەو ناتوانێت ئێمە لەیەکتر دابڕێنێت، ئێمە خەونەکانی زەکی شەنگالی لە شەنگالی خۆبەڕێوەبەردا پێکدەهێنین.
بڕیارە سبەینێش لە ناوچەی سەردەشتی چیای شەنگال، پرسە بۆ زەکی شەنگالی دابنرێت.
ب.ل
