تەڤگەرى ئازادیی: ئیمراڵى بووە شوێنى قەڵەمبازێکى مێژوویى 

تەڤگەرى ئازادیی لە ساڵیادى گەلەکۆمەى نێودەوڵەتى ١٥ى شوبات دژى عەبدوڵا ئۆجالان ڕێبەرى- پەکەکە، دەڵێن: زیندان بۆ ڕێبەر ئۆجالان نەک نەبووە شوێنى سنوردارکردن و پاشەکشەکردن، بەڵکو بووە شوێنى قەڵەمبازێکى مێژوویی، هەروەها داوادەکەن هەموو گەلى کورد دژى گۆشەگیرى ئۆجالان چالاکى ئەنجامبدەن.


تەڤگەرى ئازادیی کۆمەڵگاى کوردساتان، ڕاگەیەندراوێکى بە بۆنەى گەلەکۆمەى نێودەوڵەتى ١٥ى شوباتى ساڵى ١٩٩٩ بڵاوکردەوە، کە دژى عەبدوڵا ئۆجالان، ڕێبەرى پارتى کرێکارانى کوردستان- پەکەکە، ئەنجامدرا.

لە ڕاگەیەندراوەکەدا تەڤگەرى ئازادیی- دا هاتووە: پیلانگێڕیی نێودەوڵەتى 20 ساڵ تێپەڕ دەکات، پێ دەنێتە 21 یەک ساڵیەوە، کە لەلایەن هێزە هەگەمۆنە جیهانیەکان بە هاوکاریی دەوڵەتە دەسەڵاتپارێزەکانى ناوچەکە، هێزە نۆکەرە ناوخۆییەکان بە ڕێوەچوو، ئەنجامى پیلانگێڕیی دەستگیرکردنى جەستەیى ڕێبەر ئۆجالانى لێ کەوتەوە، بەڵام بە تێکۆشان و بەرخۆدانى ڕێبەرایەتى لە ئیمراڵى، تەواوى تێکۆشەران، وڵاتپارێزان لە سەرتاسەرى کوردستان و جیهان، پیلانگێڕان لەوە زیاتر نەیانتوانى ئامانجەکانیان بپێکن.

لە درێژەى ڕاگەیەنداروەکەدا هاتووە: لە کاتێکدا کە ئامانجى سەرەکی پیلانگێڕان کۆتایى هێنان، لەناوبردنى هیڵى ئازادیی گەلى کورد، بەیەکەوە ژیانى گەلان بوو، بە پێچەوانەوە بەرخۆدانى ڕێبەر ئۆجالان لە زیندانى تاکەکەسى وێڕاى بارودۆخى دژوار بەتایبەت بە پێشکەشکردنى مانیسفێستەکانى بۆ مرۆڤایەتى، تێکۆشانى ئازادیی هەنگاو هەنگاو پیلانگێڕیی ڕووبەڕووى پوچەڵکردنەوە، شکستى گەورە کرایەوە، ئیمرالى نەک نەبووە شوێنى سنوردارکردن، پاشەکشە کردن، بەڵکو بووە شوێنى قەڵەمبازێکى مێژوویی، لە ئەمڕۆدا لەسەر ئاستى جیهان تێزەکانى کە لە زیندانەوە پێشى خستن بۆ مرۆڤایەتى بووەتە ئیلهامى هێزو پێشکەوتن بۆ پێکەوە ژیانیی گەلان.

تەڤگەرى ئازادیی، لە ڕاگەیەندراوەکەدا تیشکى خستووتەسەر داگیرکارییەکانى دەوڵەتى تورک لە باشورى کوردستان و دەڵێن: له‌باشوری كوردستان، به‌هاوپه‌یمانێتی داگیركاریی توركیا و هێڵی خیانه‌تكاریی و به‌كرێگیراویی هێزه‌ كوردییه‌كاندا به‌ ڕێگه‌ی قه‌ده‌غه‌كارییه‌كان و ڕه‌شبگیرییه‌كان و سه‌ركوتكردنی جه‌ماوه‌ری ڕاپه‌ڕیوی شێلادزێ ده‌خوازن ڕێگیریی له‌ پێشكه‌وتنی ڕه‌وتی نه‌ته‌وه‌یی دیموكراتیی بكه‌ن، بۆئه‌وه‌ی ڕۆحی به‌رخۆدانڤانیی خه‌ڵكی وڵاتپارێزی باشوری كوردستان گه‌شه‌ نه‌كات، له‌كاتێكدا ئێمه‌ هه‌ڵمه‌تی به‌رخۆدانیی مه‌زنی گه‌له‌كه‌مان به‌ پێشه‌نگایه‌تی "له‌یلا گۆڤه‌ن و ناسر یاگز" و چالاكوانانی ئازادیی و زیندانیانی سیاسی به‌رز و پیرۆز ده‌بینین، ڕایده‌گه‌یه‌نین كه‌ هیچ داپڵۆسین و قه‌ده‌غه‌كارییه‌ك ناتوانێت ڕێگیریمان لێبکات.

لەکۆتایى ڕاگەیەندراوەکەدا هاتووە: بانگه‌وازیی له‌ سه‌رجه‌م گه‌له‌كه‌مان، كه‌سایه‌تی نیشتمانپه‌روه‌ر و هێزه‌ دیموكراتیخوازه‌كانی هه‌موو شار و شارۆچكه‌كانی باشوری كوردستان ده‌كه‌ین كه‌ به‌گوڕ و تینه‌وه‌ به‌شداریی له‌ چالاكییه‌كانی شكاندنی گۆشه‌گیریی سه‌ر ڕێبه‌ر ئاپۆ و ریسواكردنی پیلانگێڕیی 15ی شوبات و پیرۆز ڕاگرتنی به‌رخۆدانی قاره‌مانانه‌ی مانگرتووان بكه‌ن.

د.ع