چوؤرشەممە, 4 أبر 2018 – 08:16
ڕۆژنیوز – ڕۆزە محەمەد
ئەندامێکی دەستەی بەڕێوەبەری تەڤگەری ئازادی ڕادەگەیەنێت، هەبوونی بنکە و بارەگاکانی تورکیا لە هەرێم بۆ داگیرکردنی کوردستانە و داوا لەلایەنە سیاسییەکان دەکات کە خۆیان یەکلایی بکەنەوە لە هەڵوێستیان.
هەڕەشە و هێرشەکانی سوپای تورک لەسەر کوردستان بەردەوامە، لەبەرامبەر بێدەنگی حکومەتی هەرێم و حکومەتی عێراق وڵاتاندا، سوپای تورک پاش کۆمەڵکوژییەکانی لە عەفرین و ڕۆژئاوای کوردستان، لە ئێستادا بەنیازی داگیرکردنی باشوری کوردستان چەندین کیلۆمەتر خاکی هەرێمی بەزاندووە، لەو بارەیەوە بێریڤان محەمەد، ئەندامی دەستەی بەڕێوبەریی تەڤگەری ئازادی بۆ ڕۆژنیوز دەدوێت.
بێریڤان محەمەد، وتی: ئێمە لەسەرەتای دامەزراندنمانەوە جەختمان کردووەتەوە کە بنکەوبارەگاکانی دەوڵەتی تورکیا لەخاکی باشوری کوردستان و مانەوەیان جگە لە مەرامی داگیرکردن هیچی ترنییە.
بێریڤان، وتیشی: تورکیا تەنها بەهێزی سەربازییەوە نەوەستاوە، بەڵکو لە ڕووی ئابووریشەوە هەوڵی داگیرکاریی داوە، یاخود لەڕێی دراما تورکییەکانەوە کە پەخش دەکرێت لە کەناڵە تەلەفیزیۆنییەکان و گەیاندنی سیاسەتی تورکی لەو ڕێگایەوە، وە چەندین بنکە و بارەگای سیخوڕیشی هەیە لە باشوری کورستاندا کە دەزانین چەندین کەسی ئازادیخوازیان شەهید کردووە.
ڕاشیگەیاند: بەداخەوە بۆ حکومەتی فیدڕاڵی عێراق، که لەدنیادا نەبووە حکومەتێکی فیدڕاڵی بێدەنگ بێت له ئاست هەڵکوتانە سەریانەوە لەلایەن وڵاتانی ترەوە بۆ خاکەکەیان، هەروەها ئیدانەی بێدەنگی حکومەتی هەرێمیش دەکەین.
ئاماژەی بەوەشدا: هێزەسیاسییەکان ئیرادەیەکی سەربەخۆ و ئازادیان نییە، بەهۆی بوونی هەندێک بەرژەوەندی حزبی و شەخسی لەگەڵ دەوڵەتی تورکیا نەیان توانیوە هەڵوێستیان هەبێت لەئاست ئەو هێرشانەی تورکیا بۆ باشوری کوردستان، بەتایبەت پارتی دیموکراتی کوردستان.
بێریڤان لەسەر ناوی تەڤگەری ئازادی داوای کرد، کە خەڵکی باشوری کوردستان هەڵوێستی جدیان هەبێت، وە هێزە سیاسییەکانیش خۆیان یەک لایی بکەنەوە، چونکە گەر داگیرکاری دەوڵەتی تورکیا بەرفراوان بێت ئیرادە بۆ خەڵکی باشوری کوردستان و هێزی سیاسی نامێنێت.
س.ح
