تەڤگەری ئازادیی هێرشکردنە سەر کاکەییەکان ئیدانە دەکات

ئەنجومەنی گەرمیانی تەڤگەری ئازادیی كۆمه‌ڵگه‌ی كوردستان، لەبارەی هێرشەکەی شەوی یەکشەممە کە لەلایەن ژمارەیەك چەکدارەوە کرایە سەر گوندی دارا لە سنوری شارۆچکەی خانەقینی سەر بە پارێزگای دیالە کە گوندێکی کاکەیی نشینە و لە ئەنجامی هێرشەکەدا چەندین کەس کوژران و برینداربوون، ڕاگەیەندراوێکی بڵاوکردەوە.

لە بەشێکی ڕاگەیەندراوەکەدا هاتووە: لەئێستادا گەلی کورد لەهەرچوار لاوە دووچاری هێرش و پەلاماردان و پیلانگێڕی بووەتەوە، بەتایبەتی لەباشوری کوردستان ئەو هێرشانە چڕبۆتەوە ئەمەش مەترسی بۆ سەر دەستەکەوتەکانی ئەم بەشەی ووڵات دروست کردووە، لەلایەک بەڕێگای یاسایی لە حکومەتی عێراق پێگەی کورد لاواز دەکرێت، لەلایەکی دیکەوە دەوڵەتی تورکیا بە شێوەیەکی ڕاستەوخۆ لە ڕێگای سەربازی و سیاسی و ئابوریەوە هەوڵی لە باربردنی ئەم ستاتۆیە دەدات.

ئەمە دەقی ڕاگەیەندراوەکەیە:

دووژمن لە کەسایەتی کاکەییەکاندا هێرشی سەر تەواوی کورد دەکات

شەوی یەکشەممە هێرش کرایە سەر گوندی (دارا) کە گوندێکی کاکەیی نیشینە لەو هێرشەدا حەوت کەسی گوندەکە و سێ لە هێزە ئەمنیەکان کوژران

ئەمە یەکەمین جارنیە هێرش بکرێتە سەر کاکەییەکانی سنوری خانه‌قین پێشتریش چەندین جار هێرش کراوەتەسەریان لە گوندی مێخاس هەر له سنوری خانه‌قین هەروەها کاکەییەکانی سنوری کەرکوک و داقوقیش بەدەرنین لەو هێرش و پەلامارانە.

دووژمن لە کەسایەتی کاکەییەکاندا هێرشی سەر تەواوی کورد دەکات دەیانەوێت ئەو پێکهاتە ڕەسەنەی کورد بسڕنەوە بۆیە دەست لە کۆمەڵکوژکردنیان ناپارێزن، لەئێستادا گەلی کورد لەهەرچوار لاوە دووچاری هێرش و پەلاماردان و پیلانگێڕی بووەتەوە، بەتایبەتی لەباشوری کوردستان ئەو هێرشانە چڕبۆتەوە ئەمەش مەترسی بۆ سەر دەستەکەوتەکانی ئەم بەشەی ووڵات دروست کردووە، لەلایەک بەڕێگای یاسایی لە حکومەتی عێراق پێگەی کورد لاواز دەکرێت، لەلایەکی دیکەوە دەوڵەتی تورکیا بە شێوەیەکی ڕاستەوخۆ لە ڕێگای سەربازی و سیاسی و ئابووریەوە هەوڵی لە باربردنی ئەم ستاتۆیە دەدات.

ئێستا لە هەرکات زیاتر پێوستمان بە یەکڕیزی هەیە  بەتایبەت لە ناوچە کێشە لەسەرەکان، چونکە ڕەوشی ئەو ناوچانە زۆر هەستیارە بۆیە پێویستە لایەنەکان ناکۆکیەکانی نێوخۆیان بەلاوە بنێن و یەکڕیزی دروست بکەن چونکە گەلی ئێمە لەبەر مەترسی قڕکردن و ڕاگوازتن دایە، ئەرکی سەرەکی حکومەتی عێراق و هەرێمە تەواوی پێکهاتەکانی ئەو ناوچانە بپارێزن ڕێگە لە کۆمەڵکوژکردنیان بیگرێت.

وه‌ك ته‌ڤگه‌ری ئازادیی كۆمه‌ڵگه‌ی كوردستان (ئه‌نجومه‌نی گه‌رمیان) به‌ پێویستی ده‌بینین گەل ئیدی خاوەن پاراستنی جەوهەری خۆیان بن بەتایبەت پێکهاتەکان، نابێت چاوەڕێی هێزی دیکە بن بیان پارێزن چونکە نمونە زۆرن کە ئەو هێزانە توانای پاراستنی خۆیان نیە نەوەک بتوانن ئەو پێکهاتانە بپارێزن بۆیە ئەگەر بیر لە پاراستنی خۆیان نەکەنەوە بەدووری نازنین کۆمەڵکوژی گەورەتر و گران بەسەریان دا بێت، ئەگەر دەسەڵات (حکومەتی عێراق، هەرێم) ڕێگربێت لەوەی کە ئەو پێکهاتانە خۆیان بپارێزن و خاوەن پاراستنی خۆیان بن ئەوا تاوانی کۆمەڵکوژکردنیان لە ئەستۆی ئەوان دایە کە بێ پاراستن دەیان هێڵنەوە.

تەڤگەری ئازادیی كۆمه‌ڵگه‌ی كوردستان

ئەنجومەنی گەرمیان

ک.س