دووشەممە, 2 يول 2018 – 12:51 ڕۆژنیوز – كەركوک
پێشنیوەڕۆی ئەمڕۆ، شاندێکی ئەنجومەنی هەرێمی کەرکوکی تەڤگەری ئازادیی کۆمەڵگەی کوردستان، کە لە هاوسەرۆکان و ژمارەیەک لە ئەندامانی ئەنجومەنی هەرێمی کەرکوکی تەڤگەری ئازادیی پێکهاتبوون، سەردانی مەكۆی بزووتنەوەی گۆڕانیان کرد و لەگەڵ شاندێکی گۆڕان کۆبوونەوە.
لە كۆبوونەوەكەدا، تیشكخرایە سەر پێكهێنانی بەرەیەكی یەكگرتووی مەدەنیی، كە پشتگیریی خواستەكانی گەل بكات لە شارەكە و بیسەلمێنن، كە تەنها چەند لایەنێك نین لە كەركوكدا نوێنەرایەتی كورد دەكەن، بەڵكو هەمووان بە یەكگرتوویی هەوڵی باشتر بۆ پرسە نەتەوەییەكان بدەن.
هەردوولا باسیان لەوەشكرد، کە هەوڵبدرێت وەك بەرەی گەل و لایەنی كوردیی شارەكە، مانگرتن دەستپێبكرێت لەسەر خراپیی دۆخی شارەكە و بەتایبەت بە ئامانجگرتنی كوردان، ئەگەریش چارەسەرنەبوو ئەوا خۆپیشاندان دەستپێبكرێت و هەوڵبدرێت بە شێوەی مەدەنیی چارەسەربكرێت.
لەسەر پرسی گەڕانەوەی هێزە كوردییەكانیش بۆ کەرکوک، هەردوولا كۆكبوون لەسەر بوونی هێزی كوردیی، بەڵام هێزێكی نیشتیمانیی و ڕێكخراوبێت لەچوارچێوەی یاسا و وەزارەتدا و پرسی نیشتمانیی لەبەرچاوبگرێت، نەک چەكداریی بۆ حزب بكەن.
بڕیارە كۆبوونەوە و سەردانەكان تەڤگەری ئازادیی بۆ لای حزب و لایەنە کوردستانییەکانی دیکەی کەرکوک بەردەوامی پێبدریت و ئامانجیش لەو دەستپێشخەریەیی تەڤگەری ئازادیی، یەكخستنەوەی نێو ماڵی كوردە لە کەرکوک.
بڕیارە لە ئەنجامی ئەو کۆبوونەوانەدا، پرۆژەیەک لەسەر هەڵوێستی کورد بۆ پرسەکانی کەرکوک، لەگەڵ حزب و لایەنە کوردستانییەکانی دیکە ئامادەبکرێت و ڕادەستی حزبە کوردستانییە باڵادەستەکانی کەرکوک بکرێت.
ب.ل/هـ
