تەڤگەری ئازادی ڕایگەیاند، شەرمەزارییەکی گەورەیە بۆ حکومەتی هەرێم و عێراق و هێزە سیاسییەکان کە تا ئێستا بێ هەڵوێست و بێدەنگن لەبەرامبەر ئەو پێشێلکاری و تیرۆر و سنوور بەزاندنانەی دەوڵەتی تورک.
دەستەی بەڕێوەبەرایەتی تەڤگەری ئازادیی کۆمەڵگەی کوردستان لە بارەی هێرشەداگیرکەریەکانی دەوڵەتی تورک بەیاننامەیەکی بڵاوکردەوە وتیایدا دەڵێت: فاشیزمی دەوڵەتی ئەردۆغان و باخچەلی لەبەرامبەر فیداکاری و بەرخۆدانی گەریلای ئازادیی کوردستان تێک شکێنراوە، هەر بۆیە وەک کاری هەمیشەییان بەدوای قەرەبووی زیانەکانیانەوەن بە هاوکاری هێزە سیخوڕ و خۆفرۆشەکان.
ئاماژەی بەوەکردووە: تیرۆرکردنی محەمەد زەکی، هاوڵاتی باکووری کوردستان خاوەن و ڕێستۆرانتی دەنیز لە ١٧ی ئایار لە سلێمانی و هێرشی فڕۆکە بۆسەر ناوچەی بناری خاڵخاڵان لە ناحیەی ئاغجەلەر کە بووە هۆی شەهید بوونی دوو هاوڵاتی بەناوی ئیسماعیل ئیبراهیم و ئارام ئیسماعیل، لە هەمان ڕۆژ هێرشی سەر کەمپی شەهید ڕۆستەم جودی لە مەخموور، وێرای هاوخەمیمان بۆ کەسوکاری ئەو شەهیدە سەر بەرزانە کە بەناحەق شەهیدکراون، شەرمەزاری ئەو هێرشە تیرۆریستی و ڕەشەکوژییانەی دەوڵەتی تورکیای فاشیست دەکەین.
تەڤگەری ئازادی باسی لەوەشکردووە، دەوڵەتی تورک دڕندانە پێشێلی هەموو یاسا و ڕێسایەکی نێودەوڵەتی و هەرێمی دەکات و دەشڵێت: ئەو هێرش و پەلامارانەی تورکیا لە قووڵایی باشووری کوردستان بەتەواوی لاوازی و لەرزۆکی ئەو دەسەڵاتە سەرشۆڕەی هەرێمی لە هەموو ئاستێکدا دەرخستووە، شەرمەزارییەکی گەورەیە بۆ حکومەتی هەرێم و عێراق و هێزە سیاسییەکان کە تا ئێستا بێ هەڵوێست و بێدەنگن لەبەرامبەر ئەو پێشێلکاری و تیرۆر و سنوور بەزاندنانە.
لە بەشیکی دیکەی بەیانەکەدا تەڤگەری ئازادی هۆشداری داوە لەوەی: ئەگەر هێزی بەرگری و ئیرادەی گەلی کورد بشکێ و هێزەکانی دیکە بە بیانووی بێ بنەما بێدەنگی و سەرکزی هەڵبژێرن ئەوا جگە لە بەشداریان لەو خیانەتە ناشتوانن سەلامەت لێی دەربچن یان دەبێت جاشایەتی و سەرشۆڕی قبووڵ بکەن یان بار بکەن بڕۆن.
وتوسیەتی: بە ئاشکرا دەوڵەتی فاشیستی تورکیا پلانی داگیرکاری دەستپێکردووە لە ڕۆژئاوای کوردستان لە عەفرین و سەرێکانی تا دەگاتە زاپ و برادۆست و شەنگال و کەرکووک کراوەتە مەیدانی شەڕ، ئیدی کاتی بێدەنگی و پاساوی بێ بنەما بەسەر چووە ئەگەر ئەمڕۆ بیانوویان هێزی گەریلا بێت ئەوا سبەینێ بۆ هەر کەس و حیزبێکی دیکە تەنیا کورد بوونێکی بە کەرامەت بەسە بۆ ئەوەی هێرشت بکەنە سەر.
لە کۆتایی بەیاننامەکەدا وتوسیەتی: ئیدی کاتی هەڵوێستە کاتی کردارە لەدژی داگیرکاری و خیانەت وەرن با پێکەوە کوردستان بپارێزین هەرگیز خەڵکی قوربانیدەری باشووری کوردستان شایەنی ئەو دەسەڵاتە بێباک و سەرشۆڕییە نییە.
