تەڤگەری ئازادی: جوڵه‌كردن به‌هێز جێبه‌جێكردنی داخوازی داگیركه‌رانی كوردستانه‌

تەڤگەری ئازادی کۆمەڵگەی کوردستان، لەبارەی دۆخی زینی وەرتێ و جوڵاندنی هێز لە لایەن پارتییەوە بە یاننامەیەکی بڵاوکردەوە.

لە بەشێکی بە یاننامەکەدا هاتووە: “داوادەکەین هێزەکانی پێشمەرگە مەترسی سەرهەڵدانەوەی داعش لە کەرکوک و داقوق و خانەقین و کوڵەجۆ ناوچەکانی دیکە کەم بکەنەوە”.

تەڤگەری ئازادی داواشیکردوە، “بانگەوازی لە حكومه‌تی هه‌رێمی كوردستان و به‌تایبه‌تی پارتی  دیموكراتی كوردستان ده‌كه‌ین به‌هه‌ستیاری بۆ ئه‌و دۆخه‌ بڕوانن، دروست بوونی هه‌ر ئاڵۆزییه‌ك زیانی گه‌وره‌ به‌ر گەلەکەمان دەکەوێت”.

ئەمە دەقی بەیاننامەکەیە:

بەیاننامەو بانگەوازی تەڤگەری ئازادی لەسەر ئاڵۆزییەکانی وەرتێ

ماوه‌ی چه‌ند ڕۆژێكه‌ له‌ناوچه‌كانی زینی وه‌رتێ له‌لایه‌ن پارتی دیموكراتی كوردستانه‌وه‌ جووڵه‌ به‌هێزه‌كانیان ده‌كه‌ن بەبێ ئەوەی هیچ مەترسی یەک لە ئارادا بێت لەسەر ئەو ناوچانە ئه‌وه‌ش بۆته‌هۆی دروستبوونی دڵەڕاوکێ لە ناو خەڵکیدا هه‌ردوولایه‌نی ناوچه‌كه ‌(یه‌كێتی و په‌كه‌كه‌)ش كراون به‌به‌شێك له‌و ئاڵۆزیانه‌.

 ئێمه‌ پێمانوایه‌ له‌ئان وساتێكی وادا جوڵه‌ كردن به‌هێزی سه‌ربازی له‌لایه‌ن هه‌رهێزێكه‌وه‌ ته‌نها جێبه‌جێكردنی داخوازی داگیركه‌رانی كوردستانه‌ به‌تایبه‌تی ده‌وڵه‌تی توركیا كه‌هه‌میشه‌ لە هه‌وڵدایە ناکۆکی و شەڕی ناوخۆ و ئاژاوە لە باشوری کوردستان دا بنێتەوە، وەک تەڤگەری ئازادی داوادەکەین هێزەکانی پێشمەرگە مەترسی سەرهەڵدانەوەی داعش لە کەرکوک و داقوق و خانەقین و کوڵەجۆ ناوچەکانی دیکە کەم بکەنەوە کە پێش چەند ڕۆژێک حکومەتی هەرێم خۆی بانگەوازی بۆ ئەم مەترسییە کرد، نەک لەم کاتە هەستیارەدا کە گەلەکەمان ڕووبەڕووی کێشەو گرفتی جۆراو جۆر بووەتەوە، بە شەڕی ناوخۆ ئەوەندەی تر برینەکانمان قوڵ بکەنەوە، دەبێت بیرمان نەچێت هەر ئەوهێزەی کە ئێستا پارتی بە هەماهەنگی لەگەڵ تورکیا دەیەوێت هێرشی بۆ بکات لە پاراستنی مەخمور و کەرکوک و گەرمیان دا لە شەڕی داعشدا ڕۆڵێکی بەرچاوی هەبوو لەو پێناوەشدا چەند شەهیدیدا ئێستاش بە فڕۆکەی تورکیا هێرش دەکرێتە سەر گەریلاکانی پەکەکە  و خەڵکی مەدەنی  وەرتێ و قەسرێ و چۆمان و دە وروبەری دەکەنە ئامانج، هەمان ئەو فڕۆکانە پێش چەند ساڵێک لە شەڕی ناوخۆدا هێرشی دەکردە سەر پێشمەرگەکانی یه‌كێتی و زۆریشی لێ شەهیدکردن بۆیە تورکیا جیاوازی ناکات لە نێوان هیچ کوردێکدا .

بۆیە وەک تەڤگەری ئازادی بانگەوازی لە حكومه‌تی هه‌رێمی كوردستان و به‌تایبه‌تی پارتی  دیموكراتی كوردستان ده‌كه‌ین به‌هه‌ستیاری بۆ ئه‌و دۆخه‌ بڕوانن، دروست بوونی هه‌ر ئاڵۆزییه‌ك زیانی گه‌وره‌ به‌ر گەلەکەمان دەکەوێت وه‌بانگه‌وازی له‌ته‌واوی خه‌ڵكی ڕۆشنبیرو وڵاتپارێز و پارتە سیاسی یەکانی كوردستا ئه‌كه‌ین ڕێگری بكه‌ین و نه‌هێڵین پیلانی داگیركه‌رانی كوردستان سه‌ربگرێت هه‌رچی زووه‌ ببینه‌ هێزێكی فشار له‌سه‌ر حكومه‌ت و په‌رله‌مان .

ک.س