دژی دەستگیرکردنی ئەندامەکانیان و چالاکوانانی هەولێر، ئەمڕۆ تەڤگەری ئازادیی لە ڕێگەی هاوسەرۆکەکەیەوە دژی ئاسایشی پەدەکە لە پۆلیسی سلێمانی سکاڵایان تۆمارکرد و ڕاشیانگەیاند، کە ئەگەر ئەم سکاڵایەش نەگاتە شوێنی خۆی ئەوا لە چوارچێویەی دادگای عێراق و ئاستی نێودەوڵەتی ئەو دۆسیەیە دەجوڵێنن.
دەربارەی سکاڵاکەیان محەمەد عەبدوڵا هاوسەرۆکی تەڤگەری ئازادیی کۆمەڵگەی کوردستان وتی، بە هۆکاری گرتنی هەڤاڵانیان لە لایەن ئاسایشی هەولێرەوە، سکاڵایان لە دژی شێوازی گرتنرکان تۆمار کردووە، کە بە بێ “گەڕانەوە بۆ یاسا و بە بێ بوونی هیچ بەڵگەیەک بووە، لە کاتێکدا تەڤگەری ئازادیی فەرمیەتی خۆی هەیە”.
هاوسەرۆکی تەڤگەری ئازادیی داوایکرد، هەرچی زووە دەستگیرکراوانی هەولێر ئازادبکرێن و سەلامەتی ژیانیشی خستە ئەستۆی ئاسایشی پەدەکە لە هەولێر.
محەمەد عەبدوڵا وتیشی: ئەگەر ئەم دۆسییەیە نەگاتە شوێنی خۆی، ئێمە لە دادگای ئیتحادی لە بەغدا سکاڵا تۆمار دەکەین و لە لایەن هەڤاڵانمان لە ئەوروپا و لە سەرجەم ناوەندەکان ئەم دۆسیەیە دەجوڵێنین و ڕەنگە تا دادگای لاهای ببەین، کە هەڤاڵانمان و ئەندامانمان لە سەر هەڵوێستی نیشتمانی و تێکۆشانیان بۆ ئازادی و دیموکراسی زیندانی دەکرێن.
جێگای ئاماژەیە، سێ ئەندامی ئەنجومەنی هەولێری تەڤگەریی ئازادیی، بەناوەکانی “د.ناجی حاجی، ئەیوب حەمەد بەحرکەیی، تەحسین یاسین جەعفەر”، هەروەها سەمیرە حەمەدئەمین ئەندامی ئەنجومەنی ڕژاک و چالاکوانێک بەناوی بەهار، لە ئێستادا لە زیندانەکانی ئاسایشی هەولێردان.
س.ح
