جوتیاران: ڕێگە نەدەن خەریكی كشتوكاڵ بین گرانیی دروست دەبێت

هەینی, 10 أبر 2020 – 07:28  ڕۆژنیوز- كەركوك

ساڵانە لە وەرزی بەهاردا و بەتایبەت لەمکاتەدا، جووتیارانی سنوری پارێزگای کەرکوک دەچنە سەر كێڵگەكانیان بە مەبەستی كاری كشتوكاڵ و چاندنی بەرهەمە هاوینەكان، بەڵام بەهۆی قەدەغەی هاتووچۆەوە لەئێستادا جگە لە شەوان بەیانیان زوو، ڕێگە بە جوتیارانی سنوری پارێزگاکە نادرێت لە كەركوكەوە بچنە لادێ و كێڵگەكانیان بە مەبەستی ئەنجامدانی كاری كشتوكاڵی، هەروەها ڕێگە بە جوتیارانی گوندەكانیش نادرێت سەردانی شارەكە بكەن بە مەبەستی كڕینی پێداویستی كشتوكاڵی.

میقداد ئەحمەد، هاوڵاتیەكی گوندی جولحانە لە سنوری شارەدێی شوان لەو بارەیەوە بۆ ڕۆژنیوز، وتی: “لەوكاتەی كە نەخۆشی كۆرۆنا بڵاوبووەتەوە بازگەکانی كەركوك و دەرەوەی شار ڕێگەمان پێنادەن هاتوچۆ بكەین بۆ سەر كارەكانمان، ئەم وەرزە وەرزی چاندنی بەرهەمە هاوینەكانە ئەگەر ئێمە لەم كاتەدا سەرقاڵی چاندنی بەرهەمەكان نەبین ئەوا دە، یان پانزە ڕۆژی دیکە ناتوانین كارەكە بكەین، چونكە كەش و هەوا گەرم دەبێت، بۆیە داوا لە حكومەتی هەرێم و عێراق دەكەین كار ئاسانی بۆ جوتیاران بكەن”.

ئە جوتیارە ئەوەشی وت: “گەر دۆخەكە بەمشێوەیە بڕوات و جوتیار كار نەكات و بەرهەم نەخاتە بازاڕەوە ئەوە بە یەكجاری ژێرخانی ئابووری دەڕوخێت، خەڵكی هەیە ڕەز و باخی هەیە دەیەوێت دەست بە ئاوادانی بكات بەڵام ڕێگە نادەن، ئەگەر وەها بەردەوام بێت ئەوا ڕەز و باخەكان وشك دەكەن و زیانی زۆر بەر جوتیار دەكەوێت، ئێمە لە نێوان هەرێم و كوردستانیش ڕێگریمان لێدەكرێت بەرەو كەركوك حكومەتی عێراق ڕێگەمان نادەن و بەرەوە تەق تەق هەرێم ڕێگەمان پێنادات“.

سەمەد خورشید، جوتیارێکی دیکەیە و خەڵکی گوندی خاڵخاڵانە لە سنوری شوان لەسەر هەمان پرس بۆ ڕۆژنیوز بەمجۆرە قسەیکرد “ئەم دۆخە كاریگەری زۆر لەسەر جوتیار دەكات بە تایبەت ئەم وەزرە كە كاتی چاندنی بەروبوومی كشتوكاڵیە بە گشتی بە هەموو جۆرە بەرهەمەمێكەوە، بۆ نموونە خۆم باخی هەنجیر و هەنار و ترێم  هەیە ئەگەر لە ئەمڕۆ بە دواوە نەچم ئاوی نەدەم ئەوا وشك دەكات، جگە لەوەش ڕەنجی چەند ساڵەم بە فیڕۆ دەچێت جگە لەوەی بەرهەمەكەی دەڕوات و باخەکەش وشك دەبێت، چونكە گەرمای كەركوك زۆر بەتینە هەندێ جار دەگاتە ٥٠ پلە، ئەگەر باخ دوو ڕۆژ جارێك ئاوی نەدەیت ئەوا وشك دەكات، چەندین ساڵە ئێمە ڕەنج دەدەین پارەی تێدا خەرج دەكەین چۆن دەبێت ڕێگەمان نەدەن و ڕەنجمان بە فیڕۆ بچێت. “

ئەو جوتیارە ئەوەشی ووت: “دەبێت حكومەت ڕێگە چارەیەك بۆ جوتیاران بدۆزێتەوە باخ و كشتوكاڵ وەكو منداڵ وایە ڕۆژانە پێویستی بە خزمەت كردن هەیە، ئەگەر لەم دۆخەدا ڕێگە بە جوتیار نەدەن كە بەرهەمەكانیان بچێنن ئەوا لە چەند مانگێكی تردا گرانی دروست دەبێت”.

لە بەرامبەردا دلێر شوانی، ئەندامی شانەی قەیرانەكانی كەركوك دەربارەی كێشە و ڕێگە گرتن لە جوتیاران بۆ ڕۆژنیوز وتی: “دوای كۆبوونەوەی شانەی قەیرانەكانی كەركوك كۆمەڵێك بڕیار دەركرا، یەكێك لە بڕیارەكان ئەوە بوو كە پێویستە هەماهەنگی هەبێت لەگەڵ فەرمانگەی كشتوكاڵی كەركوك، كە كۆمەڵێك ڕێنمای تازە دەرچووە ئەو كەسانەی كەوا حەوزی ماسیان هەیە یاخود كێڵگەی پەلەوەریان هەیە كە ڕێگە پێدانیان بۆ بكرێت بۆ بازگەكان بۆ ئەوەش دەبێت بەڵگەی كارەكەی ببات بۆ كشتوكاڵی كەركوك تا ڕێگە پێدانی بۆ بكەن، وە بۆ جوتیارانیش بەهەمانشێوە كە كاتی ئەوەیە گەنم جۆ دەرمان بكرێت ڕێگە پێدانیان بۆ دەكرێت”.

بەپێی بەدواداجوونی ڕۆژنیوز سەرەڕای ئەوەی كە شانەی قەیرانەكان ئەم بڕیارەیداوە بەڵام لە سەرجەم بازگەكان وەک پێویست ڕێگە بە جوتیاران نادرێت بچنە سەر كارەكانیان.

ک.س