جوتیاره‌کە‌ی هەڵەبجە ١١ هەزار نەمامی پێشکەش بە کەرکوک کرد

جوتیاره‌ نمونه‌ییه‌که‌ی هەڵەبجە، له‌ پرۆژه‌یەکی نوێیدا لە شاری که‌رکوک، ١١ هەزار نەمامی پێشکەش بە شارەکە کرد و مەبەستیش لەو کارەی، خزمەتکردنە بە زیادکردنی ڕێژەی سەوزایی لە کەرکوک.


ئەمڕۆ ئازاد محەمەد کوردستانی، ناسراو بە جوتیارە نمونەییەکەی هەڵەبجە، سەردانی شاری کەرکوکی کرد و دوای پەیوەندیکردنی بە فەرمانگەی کشتوکاڵی شارەکە و وەرگرتنی ڕێکارەکان، ١١ هەزار نەمامی پێشکەش بە کەرکوک کرد.

ئازاد کوردستانی بۆ ڕۆژنیوز وتی: پێویسته‌ کارێک بکه‌ین له‌ که‌رکوک تا ڕێژه‌ی دار و نه‌مامه‌کان زیاد بکه‌ین و وه‌کو کوردایه‌تی و وه‌فایه‌ک بۆ شاری که‌رکوک، زیاتر له‌ ١١ هه‌زار نه‌مامم هێناوه‌ بۆ که‌رکوک ته‌نها له‌به‌رئه‌وه‌ی که‌رکوک سه‌وز بکه‌ین، تاوه‌کو ژینگه‌ و هه‌وایه‌کی سازگار بۆ که‌رکوک و کوردستان دابین بکه‌ین.

لەسەر تێچوی نەمامەکان، جوتیارە نمونەییەکەی هەڵەبجە و کوردستان وتی: هه‌مووی له‌ ئه‌ستۆ و له‌سه‌ر حیسابی خۆمه‌ وه‌ک خۆشه‌ویستییه‌ک بۆ شاری که‌رکوک ئەو کارەم ئەنحامداوە.

ئه‌و نه‌مامانه‌ی ئازاد محەمەد، که‌ پێشکه‌شی که‌رکوکی کردوون بریتین له:‌ هه‌نار و هه‌نجیر، بە وتەی ئەو جوتیارە ئه‌م جۆره‌ نه‌مامانه‌ له‌گه‌ڵ که‌ش و هه‌وای که‌رکوک گونجاوه‌ بە مەرجێک بپارێزرێن و خزمەتیان بکرێت.


ک.ک