عوسمان زیندانی لێپرسراوی کۆمیتەی سلێمانیی حزبی شیوعیی، پشتیوانی بانگەوازییەکەی موراد قەرەیلان دەکات بۆ یەکگرتن و یەکهەڵوێستیی هێزە کوردییەکان لەبەرانبەر پرسە نەتەوەییەکان و دەڵێت: دەبێت هەڵوێستی لایەنەکان لەسەر بنەمای بەرژەوەندیی گشتیی و نەتەوەیی بێت، نەک بەرژەوەندیی تەسکی حزبایەتیی و بنەماڵەیی.
لەمیانی بەشدارییکردنیی لە بەرنامەیەکی ستێرک تیڤی، موراد قەرەیلان، ئەندامی کۆمیتەی بەڕێوبەریی پەکەکە و فەرماندەی بڕیارگەی ناوەندی هێزەکانی پاراستنی گەل بانگەوازیی لە هێزە کوردییەکان کرد و ڕایگەیاند: ئەگەر دووژمنان دژی ئێمە یەکگرتوون بۆچی ئێمە یەکناگرین، ئەگەر ناکۆکییە ناوخۆییەکانمان چارەسەرنەکەین و هەڵوێستێکی نەتەوەییمان نەبێت مێژوو سەرکۆنەمان دەکات، ئەو بەرپرسیارێتییەش دەکەوێتە ئەستۆی هەموو حزب و هێزە سیاسییەکانی باشوری کوردستان و پارچەکانی دیکە.
عوسمان زیندانی، لێپرسراوی کۆمیتەی محەلیی سلێمانیی حزبی شیوعیی کوردستان، پشتیوانیی لە بانگەوازییەکەی موراد قەرەیلان کرد و وتی: دەبێت هەڵوێست وەرگرتن و نەخشەڕێگا و کاری سیاسیی حزبەکان، لەسەر بنەمای بەرژەوەندیی گشتیی نیشتمانیی و نەتەوەیی و بنەمای دیموکراسیی بێت، نەک بەرژەوەندیی تەسکی حزبایەتیی و بنەماڵەیی، ناکرێت حزبێک لە هەرێمی کوردستان قۆرغی پرۆسەی سیاسی بکات و هەموو میکانیزمێکی نا یاسایی و نا سیاسیی بەکاربهێنێت لە ململانێدا لەگەڵ یەکتریی.
زیندانیی، ئاماژەی بەوەشدا: وتاری پارچە پارچە کۆمان ناکاتەوە، ئەگەر نەشتوانین کۆنگرەیەکی نەتەوەیی و هاوپەیمانێتییەکی نیشتمانی دروستبکەین، با هەڵوێستی هاوبەشمان هەبێت لەسەر پرسە نەتەوەییەکان.
وتیشی: دەوڵەتە داگیرکارەکانی دراوسێمان سەرباری هەموو ناکۆکییەکانی ناوخۆیان، بۆ پرسی کورد و شەڕی کورد یەکدەگرن و یەکهەڵوێستیان هەیە، بیرمانە لە ڕابردوودا کە کۆبوونەوەکانی بەغدا، ئەنقەرە، دیمەشق، تاران دەبەستران دژی کورد، لە مێژەوە دووژمنان ئەو هەماهەنگییەیان هەبووە ئەمەش وانەیەکە بۆ هێزە سیاسییەکانی کورد لە هەرچوارپارچەی کوردستان، کە هاوهەڵوێست و یەکڕیزبن لە پرسی ڕزگاریی نیشتمانیی.
ش.ف
