سێشەممە, 11 سبت 2018 – 14:04 ڕۆژنیوز – هاوار ستار
بەیانیی ئەمڕۆ، حزبەکانی لیستی برایەتی ئەنجومەنی پارێزگای کەرکوک لە شارەدێی قەرەهەنجیر-ی سەر بە پارێزگای کەرکوک لە نێو بارەگای حزبی شیوعی کۆبوونەوە.
دوای کۆبوونەوەیەکی دوو کاتژمێریی کۆنگرەیەکی رۆژنامەوانی بەسترا و تێیدا شێخ سدیق ئەحمەد، بەرپرسی کۆمیتەی حزبی شیوعی لە پارێزگای کەرکوك بەیاننامەیەکی حەوت خاڵیی خوێندەوە، کە حزبە کوردستانییەکان لەسەری ڕێککەوتبوون، کە بریتن لە:
١-کۆبوونەوە ئیدانەی هێرشی کۆماری ئیسلامی ئێران دەکات بۆسەر هەردوو حزبی دیموکراتی کوردستان و سەرەخۆشیی لە خۆمان و حزبی ناوبراو دەکەین و هیوای زوو چاکبوونەوە دەکەین بۆ بریندارەکان.
٢-بڕیاردرا کۆبوونەوەی دەوریی حزبە کوردستانیەکان چالاک بکرێتەوە لەسەر ئاستی پەیوەندیەکان و لەکاتی پێویستدا بەرپرسی یەکەمی حیزبە کوردستانییەکان.
٣-پشتگیریی لەیەک هەڵوێستیی و یەک گوتاری لایەنە کوردستانییەکان دەکەین لە پێکهێنانی حکومەتی نوێی عیراقدا و گەڕانەوەی متمانە لە نێوان لایەنەکاندا.
٤-گفتوگۆکردنی زیاتر و خۆسازدان بۆ یەک لیستی لایەنە کوردستانییەکان لە هەڵبژاردنی ئەنجومەنی پارێزگای کەرکوکدا.
٥-داوا لە حکومەتی عیراق دەکەین دەسەڵاتی سەربازیی لە کەرکوک کۆتایی پێ بهێنێت و پرۆسەی تەعریب ڕابگرێت، کە لە ئێستادا بەفراوانی بەرێوەدەچێت و ئەوەش پێشێلکردنی راستەوخۆی دەستوری عیراقە.
٦-حزبە کوردستانییەکان هاوڕابوون بۆ کارکردن بۆ کاراکردنەوەی ئەنجومەنی پارێزگای کەرکوک.
٧-کۆبوونەوە تەئکید لەوەدەکاتەوە لایەنە کوردستانییەکان بڕوایان بە پێکەوە ژیانی ئاشتیانەی نەتەوەکان هەیە لە پارێزگای کەرکوک لەگەڵ ئەوەش ناکرێت کوردستانیەتی کەرکوک وەکو پێکهاتەی سەرەکی لەکەرکوک لە بواری ئەمنیی و دەسەڵاتی مەدەنیدا پەراوێز بخرێن.
جێگای ئاماژەیە، لەدوای ١٦ی ئۆکتۆبەری ساڵی ٢٠١٧-ەوە ئەوە یەکەمین کۆبوونەوەی حزبەکانی لیستی برایەتییە، کە پارتی دیموکراتی کوردستان-عێراق بەشداریی تێدا دەکات.
حزبەکانی لیستی برایەتی ئەنجومەنی پارێزگای کەرکوک بریتن لە (یەکێتی نیشتیمانی کوردستان، پارتی دیموکراتی کوردستان-عێراق، حزبی شیوعی، کۆمەڵی ئیسلامیی، یەکگرتووی ئیسلامیی، بزوتنەوەی دیموکراتی، بزوتنەوەی ئیسلامی، زەحمەتکێشان، پارتی گەلی تورکمانیی کوردستان) و زۆرینەی کورسییەکانی ئەنجومەنەکەیان هەیە.
ش.ف
