حزبە سیاسییەکانی گەرمیان: یەکێتی نەتەوەیی وەڵامی داگیرکارییەکان دەداتەوە

بەشێک لە حزبە سیاسییەکان لە گەرمیان، ئیدانەی هێرش و داگیرکارییەکانی دەوڵەتی تورک بۆ خاکی کوردستان دەکەن و پێیان وایە ئامانجی تورکیا داگیرکردنی کوردستان و شکاندنی ئیرادەی تاکی کوردە،دەشڵێن:"تاکە وەڵام بۆ ئەو داگیرکارییانە،یەکێتی نەتەوەییە".


هێرش و داگیرکارییەکانی دەوڵەتی تورک بۆ سەر خاکی باشوری کوردستان تا دێت فراوانتر دەبێت و ڕۆژانە گوند و چیاکانی  کوردستان بۆردوومان دەکرێت و لەشکرکێشی بۆناو خاکی کوردستان زیاد دەکات، تا ئێستاش حکومەت و پەرلەمانی هەرێمی کوردستان و حکومەتی ناوەند بێ هەڵوێستن، هاوکات حزبە دەسەڵاتدارەکانیش هیچ هەڵوێستێکیان نەبووە، لەم بارەیەوە لایەنە سیاسییەکان لە گەرمیان بۆ ڕۆژنیوز دەدوێن.

جەوهەر شوکر بەرپرسی محەلی گەرمیانی حزبی شیوعی کوردستان باس لەوە دەکات، کە داگیرکارییەکانی دەوڵەتی تورک هیچکاتێک جێگای قبوڵکردنی ئەوان نەبووە، دەشڵێت:"پێویستە هیچ کوردێک ئەم داگیرکارییانە قبوڵ نەکات و بەرامبەری بێدەنگ نەبێت، پێویستە هەوڵوێستی نەتەوەیی و نیشتمانی خۆمانهەبێت، ترسی تورکیا لەوەیە کە دۆزی کورد بەرەوە پێشەوە دەڕوات و دەترسێت کورد لە پارچەکانیتروەکڕۆژئاوا بگات بە ماف و ئازادییەکانی خۆی، بۆیە پەلەقاژێی ئەوە دەکات ئەو بزوتنەوانەی کە تێکۆشان لە پێناو مافی کورددا دەکەن کپیانبکاتەوە، کە خەیاڵی خاوە لەم ئامانجەی".

سەبارەت بە پێویستییەکانی ئەم قۆناغە جەوهەر شوکر، وتی:"لەم کاتەدا کورد دەبێت لەهەموو کاتێک زیاتریەکڕیزتربێت و یەکگرتووبێت، چونکە وا دەبینرێت کە ناوچەکەوەک ساڵانیڕابردوو بەبێ ئیرادەی کورد، بەرەو پارچەکردنیتر دەڕوات و ئەمەش لە بەرژەوەندی کورددا نییە، بەیەکگرتوویی دەتوانین لەم گۆڕانکارییانەدا مافەکانی خۆمان دەستەبەربکەین".

هاوڕێ جەبار هاوسەرۆکی ئەنجومەنی گەرمیانی تەڤگەری ئازادیی،وەها باس لە هێرشەکانی تورکیا دەکات:"هێرش و داگیرکارییەکانی دەوڵەتی داگیرکەری تورک ئیدانە و شەرمەزاردەکەین، دەوڵەتی تورکیا وەک کلتوری هەمیشەیی دەستی داوەتە داگیرکردنی کوردستان، ئێمە دژ بەو داگیرکارییانەی دەوڵەتی تورک، بەبەردەوامی هەڵویستمان هەبووە و بەردەوامیش دەبین لە ناڕەزایەتی و هەڵوێست نیشاندان، ئەرک و بەرپرسیارێتییە لەسەر تاک بە تاکی کورد بەتایبەتی لایەنە سیاسییەکان کە درێغی نەکەن لە هەڵوێست نیشاندان بە کردار دژ بەم داگیرکارییە، چونکە ئامانجی تورکیا بەتەنها پەکەکەو ناوچەیەکی دیاریکراونییە، بەڵکو داگیرکردنی هەموو کوردستانە و شکاندنی ئیرادەی تاکی کوردە".

هاوڕێ جەباردەڵێت، هەندێک حزبی سیاسی لە باشوری کوردستان بوونەتە چاوساغی ئەو هێزانەی دوژمن، دەشلێت:"ئێمە هەڵوێستی ئەو حزبانە بە هەڵوێستێکی خیانەتکارانە دەبینین، داوایان لێدەکەین بە سیاسەتی خۆیاندا بچنەوە و دەست لەو خیانەتکارییە هەڵبگرن، چونکە ئەگەر بێت و دەوڵەتی تورک ئەم داگیرکارییەی بۆ بچێتە سەر لەناوچوونی ئەو حزبانەشە، وە لاوازبوونی بزوتنەوەی ئاپۆچی لاوازبوونی هەر کوردێکە لە هەر جێیەکی کوردستان، تاکەڕێگاچارەی گەلی کورد بۆ دەربازبوون لەم پیلانگێڕی و گێژاوانە تەنهایەکێتی نەتەوەییە، بۆیە بانگەوازی دەکەین لە لایەنەکان کە هەوڵی جدی بۆیەکخستنی نێوماڵی کوردی بدەن".

هەروەها گۆران ڕەحیم بەرپرسی ئەنجومەنی گەرمیانی حزبی زەحمەتکێشانی کوردستان، چڕکردنەوەی هێرشەکانی دەوڵەتی تورک بۆ خۆدزینەوە لە چارەسەریی دەزانێت و دەشڵێت: لەم ماوەیەدا دەوڵەتی تورک داگیرکارییەکانی لەسەر باشوری کوردستان چڕکردووەتەوە، بەتایبەتی ناوچە سنورییەکان، چونکە لەڕووی جوگرافیا و سیاسییەوە گرنگی خۆیان هەیە، لەژێر بیانووی لێدان لە جەنگاوەرە کوردەکانی پەکەکە بۆ پەردەپۆشکردنی داگیرکارییەکانی، وە خۆدزینەوەیە لە چارەسەرکردنی پرسی کورد بە ئاشتیانە، ئێمە ئامانج و پلانگێڕی مەترسیدار لە پشت ئەم هێرشانەوە دەبینین بۆسەر گەلی کورد.

ئەوان وەکو حزبی زەحمەتکێشانی کوردستان، داوا لە"تەواوی هاوڵاتییان و وڵاتپارێزان و ڕێکخراوەکان و حزبە سیاسییەکان و حکومەتی هەرێم و عێراق دەکەین، لە ئاست ئەم داگیرکارییانە بێدەنگ نەبن، هۆکاری هێرشەکانی دەوڵەتی تورک پەرتەوازەیی ئێمەیە، بۆیە داوا لە سەرجەم هێز و لایەن و حزبە سیاسییەکانی کوردستان دەکەین، کە کورد پێویستی بەیەکڕیزی و کۆدەنگی هەیە و پیویستەیەکێتییەکی نەتەوەیی دروستبکەین، بۆ پوجەڵکردنەوە و بەرپەرچدانەوەی داگیرکارییەکان".

س.ح