وەزارەتی ڕوشنبیریی حكومەتی هەرێم لە نووسراوێكدا، ڕووماڵكردن و بڵاوكردنەوەی هەواڵی كوشتن و خۆسووتان لە میدیاكان قەدەغە دەكات.
لە نووسراوێكدا، كە ئاڕاستەی سەرجەم میدیا بیستراو و بینراوەكانی كردووە، وەزارەتی ڕۆشنبیریی حكومەتی هەرێمی كوردستان ڕووماڵی هەواڵی تاوانی”كوشتن و خۆسوتاندن و ..هتد” لە میدیاكان قەدەغە دەكات.
وەزارەتی ڕۆشنبیری هۆكاری دەركردنی ئەو بڕیارەی بۆ ئەوە گەڕاندووەتەوە، كە بڵاوكردنەوە و ڕووماڵكردنی ئەو هەواڵانە دەبێتە هۆی بە بازاڕكردن و هاندنی خەڵكی تر بۆ ئەنجامدانی ئەو تاوانانە و جەختدەكاتەوە لەوەی، هەر میدیایەك پابەند نەبێت ڕێكاری یاسایی لە بەرامبەردا دەگرنەبەر.
لە کاتێکدا پێویستە بەڕێوەبەرایەتیی و دەزگا پەیوەندییدارەکان هاوشێوەی ڕووداوەکانی دیکە ئاماری کوشتن و خۆکوشتن بڵآو بکەنەوە، تاکو هۆشیاریی هەبێت لە دۆخی کۆمەڵگا، بەڵام نە دەستەی مافی مرۆڤ و نە بەڕێوبەرایەتیی بەرنگاربوونەوەی توندوتیژیی دژی ژنان، ئاماری مانگانە بڵاو ناکەنەوە، ئەمە جگە لەوەی هیچ هەوڵێکی جدیی نابینرێت بۆ لێکۆڵینەوە لە هۆکارەکانی زیادبوونی حاڵەتەکانی کوشتن و خۆکوشتن و چۆنیەتی چارەسەرکردنی.
س.س
