حکومەتی هەرێمی کوردستان داوای زوو کاراکردنەوەی سەنتەری هاوبەشی ئەمنی نێوان هێزەکانی پێشمەرگە و سوپای عێراق دەکات، بۆ پاراستنى ناوچە جێناکۆکەکان.
شەوی رابردوو چەتەکانی داعش لە ناوچەی کوڵەجۆ لە گەرمیان هێرشیان کردە سەر هێزەکانی پێشمەرگە و لە ئەنجامدا پێنج پێشمەرگە شەهیدبوون.
لە کاردانەوەی ئەو هێرشەی چەتەکانی داعش جوتیار عادل، وتەبێژى حکومەتى هەرێم لە راگەیەنراوێکدا بڵاویکردەوە “حکومەتی هەرێمی کوردستان چەندین جار حکومەتی فیدڕاڵی ئاگادارکردۆتەوە لەو بۆشاییە ئەمنییە کە لە ناوچە کوردستانییەکانی دەرەوەی ئیدارەی هەرێمدا هەیە”.
وتەبێژی حکومەتی هەرێم دەشڵێت: بەهۆی ئەو بۆشاییە ئەمنیەوە ئەو رێکخراوە تیرۆرستییە توانیویەتی ئەو دەرفەتە بقۆزێتەوە و لەو ناوچانە خۆی رێکبخاتەوە، ببێتە ھەڕەشە بۆسەر دانیشتوانی ناوچەکە.
جوتیار ئاماژەی بەوەکردووە “حکومەتی هەرێمی کوردستان جەخت لەسەر هەرچی زووی کارا کردنەوەی سەنتەری هاوبەشی ئەمنی نێوان هێزەکانی پێشمەرگە و سوپای عێراق دەکاتەوە”.
ها-غ
