خانەقین، چەتەكانی داعش هێرشیان كردە سەر پۆلیس

لە هێرشێكی ژمارەیەك چەكداری سەر بەچەتەكانی داعش بۆ سەر لیوای ٨ی پۆلیسی پاسەوانی سنوور لە خانەقین، پۆلیسێك كوژراو پۆلیسێكیتریش بریندابوو.


كاتژمێر ١١ی شەوی ڕابردوو ژمارەیەك چەكداری چەتەكانی داعش، هێرشیان كردە سەر خاڵێكی پۆلیسی پاسەوانی سنووری سەر بەلیوای هەشت لە شارۆچکەی خانەقین-ی سەر بە پارێزگای دیالە.

سەرچاوەیەك لە لیوای ٨ی پۆلیسی پاسەوانی سنور بە ڕۆژنیوزی ڕاگەیاند، چەكدارەكان دەستڕێژی گولـلەیان ئاراستەی خاڵێكی پشكنینی لیوای ٨ی پۆلیسی پاسەوانی سنوور  كردووە لە نزیك كۆلێژی زمان و زانستە مرۆڤایەتییەكانی خانەقین، لە سەر رێگای كەلار - خانەقین.

وتیشی: پۆلیس وەڵامی هێرشی چەتەكانی داعشی داوەتەوە و دواتر بەرەو شوێنێكی نادیار هەڵهاتوون ، ئاشكراشیكرد، بەهۆی هێرشەكەوە پۆلیسێك  بەناوی مەجید حەسەن، كوژراوە و پۆلیسێكی دیکەش بریندار بووە.

جێگای ئاماژەیە، ساڵی ڕابردوو دوو بۆمبی چێنراو لە نزیك بارەگای ئەو لیوایە تەقیوەتەوە و ماوەیەكیشە جموجۆڵی چەتەكانی داعش لەو سنوورە سەریان هەڵَداوەتەوە.

'مەجید حەسەن' ئەو پۆلیسەی شەوی ڕابردوو کوژرا.

س.ح