خانەقین، چەتەكانی داعش هێرشێكیان كرد و چەتەیەکی خۆكوژ كوژرا

شەوی ڕابردوو ژمارەیەك چەتەی داعش هێرشیان كردە سەر بارەگای نوێنەرایەتی حەشدی شەعبی لە خانەقین و دوای ڕووبەڕووبونەوە چەتەیەكی خۆكوژ كوژرا.


بەپێی زانیارییەکانی ڕۆژنیوز کە سەرچاوەیەك لە حشدی شەعبی وەریگرتووە، شەوی ڕابردوو كاتژمێر ١١:٣٠ خولەك ژمارەیەك تیرۆرستی داعش هێرشیان كردوەتە سەر بارەگای نوێنەرایەتی حەشدی شەعبی لە خانەقین.

دوای هێرشەکەی چەتەکانی داعش، ڕووبەڕووبونەوە و شەڕ ڕوویداوە، لە ئەنجامداچەتەیەکی داعش كوژراوە، كە خۆكوژ بووە و پشتێنی بۆمبڕێژكراوی پێوەبووە، هەروەها چەكدارێكی حەشدی شەعبیش بریندار بووە.

تەرمی خۆكوژەكەی داعش سەر لەبەیانی ئەمڕۆ لەلایەن پۆلیسی فریاكەوتن هەڵگیراوەتەوە و هێشتا لێكۆڵینەوەكان لە ناسنامەی چەتەكە بەردەوامە.

ك.س