یەكێتی خانەنشینانی كوردستان لە شاری هەولێر گردبوونەوە و داوای مووچە پاشەكەوتكرا و نەدراوەكانیان كرد و لە ئەگەری جێبەجێنەكردنی داواكارییەكیانیاندا، ڕێکاری دیکە دەگرنە بەر.
ئەمڕۆ، یەكێتی خانەنشینانی كوردستان لە شاری هەولێر گردبوونەوە و لە كۆنگرەیەكی ڕۆژنامەنووسییدا باسیان لەو “ستمانە”كرد، كە حكومەتی هەرێم لێیكردوون.
لە كۆنگرەكەدا مەغدید حاجی، ئەندامی دەستەی کارگێڕیی یەکێتی خانەنشینانی کوردستان بەیاننامەیەکی خوێندەوە و تێییدا هاتبوو: ئێمە لە یەكێتی خانەنشینان بە نوێنەرایەتی خانەنشینانی شارستانی یاسایی بە چەند خاڵێك مافە پێشێلكراوەكانمان دەخەینەڕوو، بەوهیوایەی پشتگیر و هاوكارمان بن لە ئێستا و لەكاتی گرتنەبەری هەر شێوازێكی خەباتێكی مەدەنی بۆ بەدەستهێنانەوەی مافەكانمان كە ساڵانێكە لەلایەن حكومەتی هەرێمەوە زەوتكراوە و ئەم ستەمە دێژەی پێدراوە و بەردەوامە.
ئەوەشیان وت: لە ئایندەدا ئەگەر وابڕوات سەرجەم مامۆستایان و فەرمانبەران كە خانەنشین دەكرێن، گیرۆدەی هەمان ستمەم دەبنەوە، بۆیە داوادەكەین، بڕیارێك دەربكرێت بۆ جێبەجێكردنی یاسای ژمارە نۆی ساڵی ٢٠١٤ی ئەنجومەنی نوێنەرانی عێراق لە هەرێمی كوردستان، کە تایبەتە بە پاراستنی مافی خانەنشینان.
هەروەها، گێڕانەوەی ئەو مووچە زەوتكراوانەی كە هیچ شیكردنەوەیەكی یاسایی نایانگرێتەوە، لە ساڵی ٢٠١٥ەوە كە بریتین لە، مووچەی ٢٠ مانگی تەواو و گێڕانەوەی ئەو لێبڕین و بەناو خۆگونجاندنە نایاساییەی، كە بڕی لە ٢١٪ی مووچەی خانەنشینان بوو.
كاراكردنەوەی سندووقی خانەنشینان و دەستبەركردنەوەی سەرمایەی چەندین ساڵەی ڕابردووی سندووقەكە لە ساڵی ٩٠-ەكانەوە تائێستا و مووچەی مانگانەی خانەنشینان بەبێ دواكەوتن بەشێوەیەكی شایتە دابەشبكرێت و لە ڕیزبەندی دابەشكردنی مووچەدا بخرێنە ڕیزی پێشەوە، بەشێکكی تربوو لە داوای یەكێتی خانەنشینان.
داویانكرد، حكومەتی هەرێم بەدەمیناوە بێن و وتیان: ئەگەر بە دەممانەوەنەیەن هەر شێوازێكی تری خەبات و هەوڵدانی شارستانیانە بۆ گەڕانەوەی ماف و شایستەكانمان بە كراوە و ڕەوا دەبینین لە ئایندەدا.
س.س
