خۆسەری شەنگال: ئەو هێرشەی دەوڵەتی تورک درێژەپێدەری قرکردنی ئێزیدییەکانە

مەجلیسی خۆسەری دیموکراتی شەنگال، لە ڕاگەیەندراوێکدا هێرشی فڕۆکەکانی دەوڵەتی تورکی بۆسەر شەنگال بە توندی شەرمەزارکرد و ڕایگەیاند، کە ئەو هێرشە درێژکراوەی هەوڵەکانی قڕکردنی ئێزیدییەکانە، هەروەها جەختیان لەوەکردەوە، کە ئەوان لەسەر خەباتی خۆیان بۆ بەهێزکردن و پاراستنی گەلی ئێزدی بەردەوام دەبن و ئاواتەکانی مام زەکی شەنگالی بەدی دەهێنن.


مەجلیسی خۆسەری دیموکراتی شەنگال – مەخەشەدە، ڕاگەیەندراوێکی لەبارەی هێرشی ئەمڕۆی فڕۆکە جەنگییەکانی دەوڵەتی تورک بۆسەر شەنگال بڵاوکردەوە.

لە بەشێکی ڕاگەیەندراوەکەدا هاتووە: بانگ لە هەموو گەلی ئێزدی دەکەین، کە لەهەر چوارپارچەی کوردستان و جیهان دژی ئەم هێرشانەی دەوڵەتی تورک بێدەنگ نەبن و بڕژێنە شەقامەکان و دەوڵەتی تورک شەرمەزار بکەن.

دەقی ڕاگەیەندراوەکە

وەک دەزاندرێت دەوڵەتی تورکی داگیرکەر لەمێژوو و ئێستادا بەهەموو هێزیەوە دوژمنایەتی گەلی ئێزدی و باوەڕیی ئێزدی کردووە، هەنێک جار بە شاراوەیی و زۆرجاریش بە ئاشکرا هێرشی ئەنجامداوە، فەرمانی ٧٣ دەوڵەتی تورک لەسەر گەلی ئێزیدی پێکهێنا، یان بەدەستی هاوکارەکانی جێبەجیی کرد، نمونەی هەرەدوایی وەحشییەتی داعش بوو، دەوڵەتی تورک داعشی دروستکرد و هەموو هێزی خۆی خستە خزمەتی داعش و لەبەرامبەر گەلی ئێمە هێرشی پێ ئەنجامدا، دوای ئەوەی چەتەکانی داعش لەناوچوون، دەوڵەتی تورک خۆی کەوتە ئەنجامدانی هێرش لەدژی هێزەکانی پارستنی ئێزدی، لەبەر ئەوەی هێزەکانی پاراستنی ئێزدی بەریان بە قڕکردنی ئێزیدییەکان گرت و نەیانهێشت کۆمەڵگای ئێزدی لەناوبچێ، بۆیە ئێستا دەوڵەتی تورکی داگیرکەر دەیەوێت بەم هێرشانە ڕۆڵی داعش ببیبنێ.

ئێمە وەک مەجلیسی خۆسەریی دیموکراتی شەنگال، بەتوندی ئەو هێرشە وەحشیانەی دەوڵەتی تورک شەرمەزار دەکەین، دەڵێین بەهیچ شێوەیەک دەوڵەتی تورک بەو هێرشانە ناتوانێت ئێمە لەناوبەرێت یان چۆکمان پێدابدات، دەبێت دەوڵەتی تورک ببینێت ئێمە لەدژی بیری عوسمانی ئەوان چۆن بەرۆخۆدان دەکەین و لەدژی هەوڵەکانی ئەوان بۆ قرکردنمان تێکۆشان دەکەین، زمان و کلتوری خۆمان لەوان دەپارێزین و ئاواتی شەهیدەکانمان و مام زەکی شەنگالی بەدی دەهێنین و شەنگال خۆسەر دەکەین.

وەک مەجلیسی خۆسەری شەنگال، داوا لە حکومەتی عێراق دەکەین، لە بەرامبەر ئەو هێرشانەدا هەڵوێستی خۆی دیاری بکات، چونکە ئەم هێرشانە لەسەر ئاسمانی عێراق و لەسەر خاکی عێراق ئەنجامدەدرێت، دەبێت عێراق خاوەنداریی لە خاکەکەی و سەروەریی خۆی بکات، چونکە ئەگەر عێراق بێدەنگ بێت ئەوە گومانی ئێمەی ئێزدی زیاتر دەبێت.

هەروەها داوا لە نەتەوە یەکگرتووەکان و یەکێتی ئەوروپا و ڕێکخراوە نێودەوڵەتییەکان دەکەین، لەبەرامبەر ئەم هێرشانە بێدەنگ نەبن و حساب لە دەوڵەتی تورکی داگیرکەر و قڕکەر بخوازن، بانگ لە هەموو گەلی ئێزدی دەکەین، کە لەهەر چوارپارچەی کوردستان و جیهان دژی ئەم هێرشانەی دەوڵەتی تورک بێدەنگ نەبن و بڕژێنە شەقامەکان و دەوڵەتی تورک شەرمەزار بکەن.

وەک مەجلیسی خۆسەری دیموکراتی شەنگال، سەرەخۆشی لە خانەوادەی شەهیدەکانمان دەکەین و هیوای زوو چاک بوونەوە بۆ بریندارەکان دەخوازین.

لە کۆتایی ڕاگەیەندراوەکەدا مەجلیسی خۆسەری دیموکراتی شەنگال داوای لەهاوڵاتیانی شەنگال کردووە، کە سبەینێ سەعات ٩:٠٠ بەشداریی مەراسیمی بەخاکسپاردنی شەهیدەکانیان ببن، کە لە نەخۆشخانەی خانەسۆر وەریاندەگرنەوە و بە مەراسیمێک دەیانبەنە گۆڕستانی شەهید دڵگەش و شەهید بەرخۆدا و بەخاکیان دەسپێرن.

د.ع