خۆپیشاندانی مووچەخۆران لە دژی پێنەدانی مووچەكانیان لە چەند ناوچەیەكی هەرێمی كوردستان دەستیپێكردەوە و خۆپیشاندەران داوای مووچەكیان دەكەن.
ئەمڕۆ، دیسانەوە بەشێک لە مووچەخۆرانی سنووری ڕانیە و كەلار و سلێمانی و هەڵەبجە لە دژی پێنەدانی مووچەكانیان هاتنەوە سەرشەقام.
لە گەرمیان مامۆستایانی زانکۆ و فەرمانبەران کە مووچەی مانگی سێیان وەرنەگرتووە، دوێنێ بایکۆتی تاقیکردنەوەکان و هۆڵەکانی خوێندنیان کرد ئەمڕۆش لە بەردەم بانکی کەلار ڕێگیریی دەکەن لە دابەشکردنی مووچە.
هاوکات لە سلێمانی بەردەم هەردوو کامپی کۆن و نوێی زانکۆی سلێمانی و لە ڕانیەش لە بەردەم بانکی ڕانیە و لە هەڵەبجەش لە بەردەم بانکی شارەکە، مامۆستایان و فەرمانبەرانی زانکۆکانی سلێمانی، ڕاپەڕین و هەڵەبجە دژی پێنەدانی مووچەکانیان خۆپیشاندانیان دەستپێکردووە.
موچەخۆران داوای مووچەكانیان دەكەن و پێیان وایە بودجە هەیە، بەڵام بە مەبەست مووچەكانیان پێنادرێت و وەك خۆیان دەڵێن؛ هێشتا موچەی مانگی سێیان وەرنەگرتووە.
بەشێك لە خانەنشینان و فەرمانبەرانی وەزارەتەكانی حكومەتی هەرێم لە سنووری پارێزگای سلێمانی و هەڵەبجە و ئیدارەكانی گەرمیان و ڕاپەڕین، مووچەی مانگی سێیان وەرنەگرتووە و لەكاتی چوونیان بۆ وەرگرتنی مووچە پێیان دەوترێت پارە لە بانكدا نییە.
دابەشنەکردنی مووچەی مانگی سێی بەشێک لە فەرمانبەران لەکاتێکدایە، ڕۆژ ٨ی ئایار وەزارەتی دارایی هەرێمی کوردستان خشتەی مووچەی مانگی نیسانی بڵاوکردەوە.
س.س
