پێنجشەممە, 26 يول 2018 – 11:51 ڕۆژنیوز – خورماڵ
پێشنیوەڕۆی ئەمڕۆ، کاسبکاران و کۆڵبەرانی مەرزی دەرەیمەڕ لە سنووری شارەدێی بیارەی سەر بە پارێزگای هەڵەبجە، لەسەر ڕێگای سەرەکی شارەدێی خورماڵ-شارەدێێ تەوێڵە خۆپیشاندانیان ئەنجامدا و بەهۆیەوە ڕێگاکە داخراوە.
خۆپیشاندانی ئەو کاسبارکارانە، دژی داخستنی مەرزی دەرەیمەڕ-ی سنووری بیارەیە، کە بەهۆی نافەرمییەتی مەرزەکەوە، لە ئەمڕۆوە بە فەرمانی حکومەتی عێراقیی لەلایەن پاسەوانی سنوورەوە داخراوە.
ئەنوەر عارف، نوێنەری كاسبكاران و كۆڵبەرانی مەرزی بازرگانیی دەرەیمەڕ، بە ڕۆژنیوزی وت: ئەم مەرزە بژێوی زیاتر لە ٥٠٠ كەسی لەسەرە و زۆربەی كاسبكارانیش قەرزیان كردووە تا وڵاخێك بكڕن و كاسبی پێبكەن لە مەرزەكەدا، بەڵام بەبێ هیچ ڕوونكردنەوەیەک مەرزەكەیان بەسەردا داخستووین، پۆلیسی پاسەوانیش تەنها دەڵێن فەرمانی حكومەتی عێراقی جێبەجێ دەكەین.
دوای داخستنی ڕێگای سەرەكی خورماڵ-تەوێڵە، خۆپیشاندەران بەرەو فەوجی پاسەوانی سنوور لە شارەدێی خورماڵ بەڕێكەوتن، لەوێش زیاتر لە دوو كاتژمێر نوێنەری خۆپیشاندەران و بەرپرسانی پاسەوانی سنوور لە كۆبوونەوەدابوون، بەڵام نەگەیشتنە هیچ ڕێككەوتنێك، بەرپرسانی پاسەوانی سنووریش ئامادەنەبوون لەبارەی داخستنی مەرزەکەوە هیچ لێدوانێک بۆ كەناڵەكانی ڕاگەیاندن بدەن.
خۆپیشاندەرانیش دوای کۆتاییهێنان بە ناڕەزایەتییەکەیان، ڕایانگەیاند، تا لایەنە پەیوەندیدارەکان وەڵامی ئەرێنیان نەدەنەوە، بەردەوام دەبن لە ناڕەزایەتی دەربڕین لە داهاتوودا.
س.ح
