داقوق، دوای چوار ساڵ ڕێگەیەكی سەرەكی گوندەكانی كاكەییەكان كرایەوە

ڕێگەی سەرەكی لە گوندی زەنقر لە باشوری شارۆچكەی داقوق كرایەوە، كە بەشێكی زۆری گوندەكانی كاكەییەكان بەیەكەوە دەبەستێتەوە، ئەوەش دوای ئەوەی لە ٢٠١٤وە بەهۆی چەتەكانی داعشەوە داخرابوو.


دوای چوار ساڵ لە داخستنی ڕێگای سەرەكی گوندەكانی كاكەییەكان لە باشوری داقوق سەربە كەركوك، دوێنێ‌ بە فەرمی ڕێگاكە لە گوندی زەنقر كرایەوە.

ئومێد حەسەن، فەرماندەی حەشدی كاكەیی لە سنوری داقوق، بە ڕۆژنیوزی ڕاگەیاند:" لە ساڵی ٢٠١٤ەوە و لە كاتی پاراستنی ئەو ناوچانە لە لایەن هێزەكانی پێشمەرگەوە، ڕێگای سەرەكی گوندەكانی باشوری شارۆچكەكە بە ئاڕاستەی داقوق داخرا، خۆشبەخاتنە بە فەرمانی فەرماندەی پۆلیسی فیدراڵی كرایەوە".

وتیشی:" ڕێگای سەرەكی كە لە گوندی زەنقرەوە دەستپێدەكات و دەچێتە داقوق داخرا بوو، ئەوەش ببوە هۆكار بۆ ئەوەی چەندین گوندی كاكەیی ماڵەكانیان چۆڵ بكەن و ناوچەكەیان بەجێبهێڵن".

ئومێد حەسەن ئەوەشی وت:" دوای ئەوەی ناوچەكە لە لایەن هێزە عێراقییەكان كێوماڵ كرا و لە مەترسی نەمانی داعش پاكرایەوە، ئێستا بە فەرمی ڕێگاكە كراوەتەوە، كردنەوەی ڕێگاكەش چەندین گوند بەیەكەوە دەبەستێتەوە، هەروەها فەرمان بە هێزەكان كراوە كارئاسانی بكرێت بۆ گەڕانەوەی هاوڵاتیانی كاكەیی بۆ سەر گوندەكانیان و زەوییە كشتوكاڵییەكانیان".

ك.ك/س