چالاكانی سۆران و ڕەواندز، جەخت دەکەنەوە، کە ئامانجی دەوڵەتی تورک سڕینەوە و لەناوبردنی گەلی کوردە، داواش دەکەن بۆ پوچەڵکردنەوەی پیلانی ئەو دەوڵەتە داگیرکەرە، کوردان یەک بگرن.
پیلان و پەلاماردانە سەربازییەکانی دەوڵەتی تورک بۆ سەر باشوری کوردستان بە هاوکاریی پەدەکە درێژەی هەیە، هاوڵاتیان و توێژە جیاوازەکانیش، نیگەرانن لەو دۆخە و لەو بارەیەوە چالاكانی مەدەنی شارۆچکەکانی سۆران و ڕەواندز بۆ ڕۆژنیوز دووان.
عامر برادۆستی، چالاكوان، نیگەرانە لەوەی، کە هەموو لایەنەکان بە گرنگییەوە باسی یەکگرتوویی دەکەن، بەڵام تەنیا قسەیە و نابێت بە کردار، “كەسیان ئامادەنین بەرژوەندیی حزبی، بنەماڵەیی و شەخس، بکەنە قوربانیی بەرژەوەندییە نەتەوەییەکان”.
بە بۆچوونی ئەو چالاكوانە، هەڵەیە كورد دان بەیەكتریدا نەنێت و لەو ڕوەوە دەڵێت:”خۆخۆریی كورد لەناودەبات و دووژمنانی گەلی كورد بەهێز دەكات، توركیا، ئێران، عێراق و سوریا بەیەك چاو سەیری كوردستان دەكەن، هەموویان دەیانەوێت كورد و كوردستان لەناوببەن بەڵام توركیا سەرمەشقیانە”.
ئەو چالاكوانە، بە پێویستی دەزانێت، کە كورد كۆدەنگ و یەك هەڵوێست بێت و خەمی كوردستانی گەورەی لەبەربێت نەك هەركەسێك خەمی پارچەكەی خۆی بێت و ئاگای لەپارچەكانی دیکەی كوردستان نەمێنێت.
نەجات ئەسعەد، چالاکوانێکی دیکەی کۆمەڵگای مەدەنییە، باس لە سیاسەتی دووژمنكارانە و داگیركەرانەی دەوڵەتی تورک دەکات، “توركیا دەیان هاوڵاتی لە باشوری كوردستان كردووەتە ئامانج و دەیان كیلۆمەتر خاكی باشوری كوردستانی بەزاندووە، ئەمەش مانای وایە توركیا دژی هەموو گەلی كوردە نەك تەنیا كوردانی باكور”.
ئاماژە بۆ ئەوەش دەکات، کە ئەگەرچی فشارەكان كاریگەرییان لەسەر سیاسەتی توركیا نەبووە بەرامبەر بەكورد، بەڵام پێیوایە توركیا تووشی شكستێكی گەورە دەبێت و چیتر ئەوەی بۆناچێتەسەر كەبەرامبەر كورد و گەلانی دیکەی دەوروبەری دەیكات.
ئەو چالاکوانە، بەستنی كۆنگرەی نەتەوەیی بە تاكە چارەسەر دەزانێت بۆ یەك هەڵوێستی كورد، دەشڵێت هەندێ لایەنی كوردیی لەژێر كاریگەریی وڵاتانی دەرەكی نایەنە ژێر باری بەستنی كۆنگرەی نەتەوەیی.
شێخە جەرجیس، چالاکوان، دەڵێت:”ئەوەی توركیا دەیكات سیاسەتی لەناوبردن و سڕینەوەی گەلی كوردە، لەباكور یا لەباشور بێت توركیا پیلانی هەیە بۆ لەناوبردنی كورد و كورستان”.
دەشڵێت: دەبێت كورد بیربكاتەوە و بڕیاربدات ئاخۆ چۆن بەیەكگرتوویی ڕێگە لەتەشەنە سەندنی سیاسەتی توركیا بگرین بەرامبەر بەكورد، چونكە دواجار توركیا بڕیاریداوە كەدژی گەلی كوردبێت، دەبێت ئێمەش لەناوخۆدا بەسیاسەتی یەكگرتوویی لەبەرامبەریدا بوەستینەوە و بەرژەوەندیە حیزبی و شەخسی و بنەماڵەییەكان وەلا بنێین.
لەدژی هەوڵی داگیرکەران بۆ بەگژیەکدادانی هێزە کوردییەکان، کۆنگرەی نەتەوەیی کوردستان لە هەوڵی لەیەک نزیککردنەوەی لایەنەکان و پێکهێنانی یەکێتیی نەتەوەیی کوردانە، لەو چوارچێوەیەشدا ڕۆژی ٢١ی ئەم مانگە بە هاوبەشیی لەگەڵ یەکێتیی پەرلەمانتارانی کوردستان و بە بەشداریی ٣٠٠ کەس لە نوێنەری لایەنەکان، ڕۆشنبیر، نووسەر، ڕۆژنامەنووس، پەرلەمانتار و چالاکوان، ڤیدیۆ کۆنفرانسێکی بەڕێوەبرد.
ک.س
